༄༅། །ཨ་མཁར་བླ་མ་བཀྲ་ཤིས་མགོན་པོའམ་ཡོངས་གྲགས་སུ་བླ་མ་བཀྲ་མགོན་གྱི་རྣམ་པར་ཐར་བ་ཉིང་བསྡུས་དྲི་མེད་ཤེལ་གྱི་ཕྲེང་བ་ཞེས་བྱ་བ་བཞུགས་སོ། །

བཅུད་ཀྱིས་བརྩམས།

ནང་དོན་གནད་བསྡུས།

    རྣམ་པར་ཐར་བ་འདིའི་ནང་དུ་ཉམས་ལེན་པ་ཨ་མཁར་བླ་མ་བཀྲ་ཤིས་མགོན་པོའི་སྐུ་ཚེའི་མཛད་པ་ཉིང་བསྡུས་ཏེ། སྐུ་འཁྲུངས་པའི་སྐོར་དང་བླ་མར་མཇལ་བ། སྒྲུབ་པ་ཉམས་ལེན་ཚུལ་བཞིན་བྱས་པ། དབང་ལུང་ཁྲིད་གསུམ་གསན་ཚུལ། སེམས་ཅན་གྱི་འགྲོ་དོན་མཛད་པ་སོགས་ཧ་ཅང་བསྡུས་པའི་སྒོ་ནས་བྲིས་ཡོད།

དྲི་མེད་སྙིང་རྗེ་ཆེན་པོའི་དཔལ་མངའ་ཞིང་། །

འགྲོ་རྣམས་བྱམས་བརྩེའི་ཞགས་པས་མི་གཏོང་བ། །

དཔལ་ལྡན་བླ་མའི་དགོངས་ཀློང་དབྱེར་མེད་པའི། །

འཕགས་མཆོག་མིག་མི་ཟུམ་པར་སྙིང་ནས་འདུད། །

རྒྱལ་ཀུན་བྱིན་མཐུའི་བདུད་རྩི་སྙིང་ལ་སིམ། །

ཕན་བདེའི་འོད་དཀར་འགྲོ་བའི་དཔལ་དུ་འགྱེད། །

རྣམ་དག་ཚུལ་ཁྲིམས་སྤོས་ཀྱི་དྲི་བཟང་ཅན། །

བརྩེ་ཆེན་བླ་མའི་རྣམ་ཐར་ཤེལ་ཕྲེང་སྤེལ། །

དང་བོ།    སྐུ་བལྟམས་པ་དང་འཁྲུངས་པའི་ཡུལ།

དགུང་ལོ་བཅུ་བདུན་གྱི་སྟེང་དུ་ལུང་སྔོན་དགོན་རྨད་བྱུང་ཐོས་བསམ་གླིང་དུ་ཞུགས་ནས་ཅང་མ་འགོར་བར་བླ་མ་རིན་པོ་ཆེས་ཁྱོད་འུ་གཉིས་དཔེ་ཆར་བལྟས་ནས་ཅང་ཤེས་ནི་མ་རེད། དེར་བལྟས་ན་ཁྱོད་རང་སྒྲུབ་གྲྭར་སྡོད་དང་དེས་ཡག”གསུངས་ཤིང་བླ་མ་རིན་པོ་ཆེས་ཁོང་ཉིད་མི་ལོ་བཅུ་གསུམ་ལ་སྒྲུབ་གྲྭར་འདུག་དགོས་པའི་བཀས་བསྐུལ་ཏེ་ལུང་སྔོན་དགོན་སྒྲུབ་གྲྭ་སྐུ་གསུམ་གླིང་དུ་མི་ལོ་དགུའི་ཡུན་ལ་སྒྲུབ་པ་ལྷུར་ལེན་བྱས་ཏེ་སྒོམ་སྒྲུབ་ལ་གཞོལ། སྐབས་དེའི་ཉིན་ཞིག་ཏུ་ཡང་བླ་མ་རིན་པོ་ཆེས་ད་ལོ་ནས་ཁྱོད་སྒྲུབ་གྲྭར་འདུག་མི་དགོས། ད་ལོ་འུ་གཉིས་ཡར་མར་ལ་ཅིག་འཁོར་གསུངས་ཏེ་ཉིན་ཞིག་གློ་བུར་དུ་བླ་མ་རིན་པོ་ཆེས་ཁོང་ཉིད་པེ་ཅིང་སོགས་ལ་ལྟ་སྐོར་དང་ཁམས་གསེང་ལ་ཁྲིད། དེའི་སྤྱི་ལོར་བླ་མ་རིན་པོ་ཆེ་དགོངས་པ་ཞི་དབྱིངས་སུ་བསྡུས་པའི་ཚུལ་མཛད། བླ་མ་རིན་པོ་ཆེའི་དགུང་རྫོགས་ལ་ཁོང་གིས་ཉིན་མཚན་ཆག་མེད་དུ་མཆོད་མེ་དང་མཆོད་ཆུ་བཤམས་ཤིང་བླ་མའི་དགོངས་རྫོགས་ཚར་མ་ཐག་ཏུ་དགོན་པ་ནས་རྐྱང་ཕྱག་འཚལ་ཏེ་མདོ་ལིའི་རྡོ་མཁར་རིང་མོའི་དུར་ཁྲོད་དུ་ཕེབས་ནས་ཉིན་ཉེར་བརྒྱད་ལ་མཚམས་ནག་སྒོ་བཅད་བྱས་ནས་བཞུགས། དེ་ནས་བྲག་དཀར་སྤྲེལ་རྫོང་རྡོ་རྗེའི་ཕུག་ལམ་མཚམས་ཁང་དུ་ཕེབས་ནས་ཟླ་གཅིག་དང་ཉིན་བཅོ་ལྔར་མཚམས་ལ་བཞུགས།   སྐབས་དེའི་ཉིན་ཞིག་གི་ཐུན་མཚམས་སུ་ཁོང་གི་ཉམས་སྣང་ངམ་རྨི་ལམ་ལྟ་བུ་ཞིག་གི་ངོགས་སུ་བླ་མ་རིན་པོ་ཆེས་དངོས་སུ་ཞལ་གཟིགས་གནང་ཞིང་། བླ་མ་རིན་པོ་ཆེ་རྡོ་ཕ་བོང་དཀར་བོ་ཞིག་གི་སྟེང་དུ་བྱིས་པ་ལོ་བརྒྱད་ཀྱི་ཚུལ་དུ་བཞུགས་ཏེ། ཕྱག་གཡས་པས་ནམ་མཁར་སྡིགས་མཛུབ་བྱས་ཤིང་གཡོན་དུ་མི་མགོ་རློན་པའི་ཐོད་ཕོར་ཁྲག་ཞག་འཁྱིལ་བ་ཞིག་གི་ནང་དུ་འབྲི་ཞོ་རུལ་བ་ལྟེམ་མེར་ཆགས་ཡོད་པ་ཞིག་གནང་ནས། ཚེ་འདིའི་རྐྱེན་དང་ཕྱི་མའི་བར་ཆད་སེལ༔བླ་མའི་གདམས་ངག་དལ་འབྱོར་སྙིང་ལ་ལོངས༔མཐར་ཐུག་དག་པ་མཁའ་སྤྱོད་ཞིང་ཁམས་སུ༔བླ་མ་ཁྱེད་དང་འབྲལ་མེད་བྱིན་གྱིས་རློབས༔ ཁྱོད་ཀྱིས་ཚིག་འདི་མ་བརྗེད་ཡིད་ལ་དམ་པོར་ཟུངས་ཤིག་ཅེས་གསུངས་ནས་མི་སྣང་བར་གྱུར་ཏོ། །

བཞི་བ། གཞན་དོན་ཁུར་དུ་བཞེས་ནས་བསྟན་འགྲོའི་དོན་ཆེན་མཛད་ཚུལ།

གཞན་ཡང་རྐང་ལག་ཞ་བ་དང་། མཛེ་ནད། དམུ་ཆུ་དང་གྲུམ་ནད་སོགས་ཀྱིས་མནར་བའི་ཉམ་ཐག་ནད་པ་ཁྲི་ཕྲག་མང་བོར་སྔགས་བཏབ་པ་དང་ཟངས་འཚིག་སོགས་ཀྱིས་ཕན་པ་རྒྱ་ཆེན་པོ་ཐོགས་པའི་ཚུལ་ནི། དཔེར་ན། ཡུལ་ཤུལ་ཆུ་དམར་ལེབ་ཀྱི་ནད་པ་ཀརྨ་བསམ་འགྲུབ་རྐང་བ་ཞ་ནས་དུས་ཡུན་རིང་བོ་འགོར། སྔ་རྗེས་སུ་ཟི་ལིང་། ཡུལ་ཤུལ། རྔ་བ། དགའ་བདེ། འབར་ཁམས་སོགས་སུ་སོང་ནས་བསྟན་ཡང་དྲག་སྐྱེད་ཆེན་པོ་མ་བྱུང་། རྗེས་སུ། ཁོང་གི་མདུན་དུ་ཡོང་ནས་ཟླ་གཅིག་རིང་དུ་ཡིག་ཐམ་དང་ཟངས་འཚིག་བཞག་ནས་ཕན་པ་ཆེན་པོ་བྱུང་བར་མ་ཟད། ད་ལྟ་ལག་རྟེན་མི་དགོས་པར་འགྲོ་འདུག་ཐུབ་ལ། དེ་མཚུངས་སུ། རང་དང་ཕ་ཡུལ་གཅིག་པའི་སྐུ་འབུམ་འཚོ་མཐོ་འབྲིང་གི་སྐབས་སུ་གློ་བུར་རྐང་བར་ནད་ཅིག་ཕོག་ནས་ཉལ་སར་ལྷུང་སྟེ་མགོ་ལོག་གི་གཞུང་སྒེར་སྨན་ཁང་མང་བོར་བསྟན་ཡང་དྲག་སྐྱེད་མ་བྱུང་། དེ་ནས་ཡང་ཁོང་གི་མདུན་དུ་སོང་ནས་ཡིག་ཐམ་དང་ཟངས་འཚིག་བཞག་ནས་སངས་དྲག་ཏུ་གྱུར་པ་སོགས་ཀྱིས་མཚོན་པའི་ཉམ་ཐག་ནད་པ་མང་བོ་མི་འདོད་ནད་ལས་ཐར་བར་མཛད་པ་མིག་མཐོང་ལག་ཟིན་ཏུ་གྱུར་པ་སོགས་རབ་ཏུ་མང་ངོ་། །

ལྔ་བ།   མཇུག་བསྡུ་བའི་ཚུལ། 

འདི་ནི་དམ་པ་ཁོང་གི་ཐུགས་བརྩེ་ཟབ་པའི་དད་ལྡན་པ་བསོད་ནམས་ལྷུན་གྲུབ་ཏུ་འབོད་པས་བོད་རབ་རྒྱན་ཆུ་ཕོ་སྟག་གི་ལོའི་ས་ག་ཟླ་བའི་ལྷག་སྐར་དུས་བཟང་ལ་མ་ཡུམ་གངས་ལྗོངས་ཤེས་རིག་ནོར་བུའི་སློབ་གླིང་གི་གླིང་སྟོད་རིག་པའི་གྲོང་ཁྱེར་ནས་བྲིས་སོ།།