རང་སེམས་ཆོས་ལ་སྦྱོར་རྣམས་སྙིང་ནས་བསྟོད།
བཛྲ་ཚུལ་ཁྲིམས་རྒྱ་མཚོས།
བསྒྲུབ་བྱའི་དོན་རྣམས་སང་ཉིན་གནངས་ཉིན་ནམ།།
སང་ལོ་གནངས་ལོར་བསྒྲུབ་པར་བྱ་སྙམ་པའི།།
ཕྱི་བཤོལ་ལེ་ལོའི་དབང་གྱུར་ཐ་མལ་བ།།
ཅི་ཡང་མ་འགྲུབ་མི་ཚེ་ཟད་པ་མང་།།
བློ་དང་བརྩོན་པ་ཅུང་ཟད་ཡོད་ན་ཡང་།།
རང་ཉིད་གཅིག་བུ་མཆོག་འཛིན་གཞན་ཕལ་ཆེར།།
རྐང་འོག་རྡུལ་དུ་བརྩི་བའི་ང་རྒྱལ་ཅན།།
མི་ཁའི་ཀློང་ན་སྙིང་རླུང་འཕར་བ་མང་།།
རང་ལ་བཀུར་འོས་ཡོན་ཏན་ཅུང་མཆིས་ཀྱང་།།
གཞན་གྱི་ཕུན་ཚོགས་མཐོང་ཚེ་མི་བཟོད་པའི།།
ཕྲག་དོག་ཅན་རྣམས་མཐོན་པོའི་ཁྲི་སྟེང་ནས།།
སེམས་པ་མྱ་ངན་གཤོང་ན་འགྱེལ་བ་མང་།།
ཚེ་གང་གཞན་ལ་བསླབ་བྱ་བྱེད་ན་ཡང་།།
རང་གི་སེམས་རྒྱུད་མ་ཐུལ་སློབ་དཔོན་གྱི།།
མིང་བྱང་ཅན་ཡང་གྲགས་སྟོང་འཐོར་རླུང་གིས།།
འཁྱེར་ནས་སྨད་པའི་རྫབ་ཏུ་བཅུག་པ་མང་།།
བྱམས་དང་སྙིང་རྗེ་སྟོང་ཉིད་རིམ་གཉིས་སོགས།།
ཆོས་སྐད་རྫིག་པོས་འཁོར་ཚོགས་མང་བསྡུས་ཀྱང་།།
སྐྱབས་འགྲོ་ལས་འབྲས་རྨང་གཞི་མ་བཏིང་བའི།།
ཆོས་པའི་གཟུགས་བརྙན་ཆོས་དང་འགལ་བ་མང་།།
སྐབས་འགར་ཕམ་ཁའི་མུན་ནག་ལ་བྱིང་ཡང་།།
རྒྱལ་ཁའི་ཉིན་བྱེད་འོད་ལ་འཕྲད་པ་འབྱུང་།།
སྐབས་འགར་རྒྱལ་ཁའི་འོད་ཀྱིས་མྱོས་ན་ཡང་།།
གློ་བུར་ཕམ་ཁའི་སྨག་ལ་ལྷུང་བའང་མང་།།
དེ་ཕྱིར་རང་གཞན་གཉིས་ཕན་དགེ་བའི་ལས།།
ནམ་ཡང་ཕྱི་བཤོལ་མི་བྱེད་འཕྲལ་མར་སྒྲུབ།།
ཤེས་བརྩོན་བག་ཡོད་ལྡན་ཞིང་རང་གི་སེམས།།
ཆོས་ལ་ཚུལ་བཞིན་སྦྱོར་རྣམས་སྙིང་ནས་བསྟོད།།
༢༠༡༧ལོའི་ཕྱི་ལུགས་ཟླ༡༠ཚེས་༧ལ། རྭ་རྒྱ་ཤེས་རིག་ནོར་བུའི་སློབ་གླིང་ནས།
|