འཇིག་རྟེན་ཁྲོད་ཀྱི་སྐར་མའི་གོ་ལའི་ཆེ་ཆུང་བསྡུར་བ།
སྤྲེལ་ཉི་མ་རྒྱལ་མཚན་གྱིས་བཤུས་ཏེ་བསྒྱུར།
མིའི་རིགས་ཀྱི་ངོས་ནས་བཤད་ན་ང་ཚོ་རྐང་འོག་གི་རྒྱུ་སྐར་འདི་མཐའ་ཡས་པ་ཡིན་ཞེས་ལབ་ཆོག་ལ། འགྲུལ་བཞུད་གནམ་གྲུའི་མྱུར་ཚད་༼ཆུ་ཚོད་རེ་སྤྱི་ལེ་༨༠༠༽ཀྱིས་སའི་གོ་ལར་སྐོར་བ་གཅིག་རྒྱབ་ན་ཆུ་ཚོད་ལྔ་བཅུ་དགོས་མོད། འོན་ཀྱང་དེ་འཇིག་རྟེན་ཁྲོད་བཞག་པ་ཡིན་ན་གོ་ལ་ནི་དངོས་གནས་རྡུལ་ཙམ་ལས་མེད།
སྐར་མ་ལྷག་པ། མིག་དམར། པ་སངས། སའི་གོ་ལ་བཅས་ཀྱི་ཆེ་ཆུང་བསྡུར་བ་སྟེ། པར་རིས་ལས་མངོན་པ་ལྟར་ན། པ་སངས་དང་སའི་གོ་ལའི་བོངས་ཚད་ཉེ་བ་ཡོད། མིག་དམར་དང་ལྷག་པ་གཉིས་ལྟོས་བཅས་ཀྱིས་ཆུང་བར་སྣང་།
སའི་གོ་ལ། སྐར་མ་མཚོ་རྒྱལ། སྐར་མ་གནམ་རྒྱལ། སྐར་མ་སྤེན་པ། སྐར་མ་ཕུར་བུ་བཅས་ཀྱི་ཆེ་ཆུང་བསྡུར་ན། སའི་གོ་ལ་ནི་ཉི་མའི་ཁྱིམ་རྒྱུད་ནང་ས་ལས་གྲུབ་པའི་རྒྱུ་སྐར་བཞིའི་ཁྲོད་བོངས་ཚད་ཆེ་ཤོས་ཡིན་ནའང་། གཞན་པའི་རླངས་གཟུགས་རྒྱུ་སྐར་བཞི་དང་བསྡུར་ན་དངོས་གནས་མིའུ་ཆུང་རེད།
སྐར་མ་ཕུར་བུ། སྐར་མ་བོའོ་ཧྥུའུ་༣༥༩། ཉི་མ། སྐར་མ་ལྷ་སྤྱང་བཅས་ཀྱི་ཆེ་ཆུང་བསྡུར་ན། ཕུར་བའི་སྤུས་ཚད་འབོར་ཆེན་ཡིན་ལ། ཉི་མའི་ཁྱིམ་རྒྱུད་ཀྱི་གཞན་པའི་རྒྱུ་སྐར་གྱི་སྤུས་ཚད་ཕྱོགས་གཅིག་ཏུ་བསྣན་པ་ལས་ཀྱང་ཆེ་ནའང་། འོན་ཏེ་ཉིང་རྡུལ་འདུས་འགྱུར་དམའ་ཤོས་ཀྱི་སྤུས་ཚད་ཚད་གཞིར་ད་དུང་གཏན་ནས་སླེབས་ཐུབ་མེད། དེ་ཡི་དབང་དུ་བཏང་ནའང་ཉིང་རྡུལ་འདུས་འགྱུར་དམའ་ཤོས་ཀྱི་བརྟན་སྐར་༼དམར་མདོག་བརྟན་སྐར་ཆུང་བ་༽ དང་མཉམ་དུ་བསྡུར་ན་ཞན་པ་མངོན། ཉི་མའི་སྤུས་ཚད་ནི་སའི་གོ་ལའི་ལྡབ་སུམ་འབུམ་སུམ་ཁྲི་ཡིན་ལ། བོངས་ཚད་ནི་སའི་གོ་ལའི་ལྡབ་ས་ཡ་གཅིག་དང་སུམ་འབུམ་ཡིན། ཡིན་ཡང་སྐར་མ་ལྷ་སྤྱང་དང་བསྡུར་ན་དེ་ཡང་གཅུང་བོ་ཡིན་ནོ།།
ང་ཚོའི་དགུ་ཚིགས་མ་ལག་གི་ཚངས་ཐིག་ལ་འོད་ལོ་འབུམ་གཅིག་ཡོད།གསལ་བོར་བཤད་ན་སྐར་ཆ་རེར་སའི་གོ་ལར་སྐོར་བ་ཐེངས་བདུན་དང་ཕྱེད་ཀ་རྒྱག་ཐུབ་པའི་འོད་དེས་དགུ་ཚིགས་མ་ལག་གི་ཚངས་ཐིག་བརྒལ་བར་ལོ་ཆིག་འབུམ་གྱི་དུས་ཡུན་དགོས་ལ། དགུ་ཚིགས་ཁྱིམ་རྒྱུད་ནང་ཧ་ལམ་བརྟན་སྐར་ཁྲག་ཁྲིག་ཅིག་ཡོད།
----------------------------
❶སྤུས་ཚད། （质量）དངོས་གཟུགས་རང་སྟེང་གི་རིགས་ཤིག
❷འོད་ལོ། （光年）གནམ་རིག་པས་ངོས་འཛིན་ལ་གཟའ་སྐར་རྣམས་ཀྱི་བར་ཐག་འཇལ་བྱེད་ཀྱི་རྩི་གཞི་ཞིག་སྟེ། འོད་ཀྱིས་ལོ་གཅིག་གི་ཡུན་ལ་སྟོང་རྐྱང་གི་ཁམས་སུ་བགྲོད་པའི་བར་ཐག་ལ་འོད་ལོ་གཅིག་ཅེས་བྱ་ཞིང་། དེར་སྟོང་སྨི་དུང་ཕྱུར་༩༤༦༠༥ཙམ་ཡིན།
|