དགེ་སློབ་སྟོང་ཕྲག་གིས་སློབ་དཔོན་ཐོན་མིའི་བཀའ་དྲིན་དྲན་ཚུལ།
རྒྱུས་ལོན་བྱས་པ་ལྟར་ན།
མཚོ་སྔོན་ཞིང་ཆེན་མཚོ་ལྷོ་ཁུལ་གསེར་ཆེན་རྫོང་ངམ་གུང་ཧོ་རྫོང་མི་རིགས་སློབ་འབྲིང་གིས་དུས་རྒྱུན་གཟའ་ཟླ་བའི་ཞོགས་པར་དགེ་སློབ་ཚང་མས་རྒྱལ་གླུ་གཏོང་ཞིང་རྒྱལ་དར་སྒྲེང་བཞིན་ཡོད་ལ།
ད་དུང་དགེ་སློབ་སྟོང་ཕྲག་མང་པོས་སློབ་གླིང་གི་ཐོན་མིའི་སྐུ་བརྙན་མདུན་ནས་ལག་ཟུང་ཐར་མོ་སྙིང་ཁར་སྦྱར་ཏེ་ཁོང་གི་བཀའ་དྲིན་རྗེས་སུ་དྲན་པའི་སྡོམ་ཚིག་གམ་དམ་བཅའ་དད་འདུན་གདུང་དབྱངས་ཀྱིས་སྐྱོར་པ་དེས་མི་མང་པོ་ཞིག་ལ་བག་ཆགས་ཟབ་མོ་བཞག་ཡོད།
ཁོང་གི་སྐུ་བརྙན་མདུན་ནས་བཀའ་དྲིན་རྗེས་སུ་དྲན་པའི་སྡོམ་ཚིག་དམ་བཅའ་དབྱངས་ཀྱིས་སྐྱོར་བ་དེ་གཤམ་དུ་བཀོད་ཡོད།
ཚིག ཐར་ཤུལ་བློ་བཟང་སྙན་གྲགས།
སློབ་དཔོན་ལགས། ཐོན་མི། ཁྱེད་ཀྱི་བཀའ་དྲིན་ནི་རི་རབ་ལས་དཔང་མཐོ་ལ། ཁྱེད་ཀྱི་མཛད་རྗེས་ནི་ཉི་ཟླ་ལས་མདངས་གསལ། ཁྱེད་ནི་བོད་གངས་ཅན་གྱི་དཔྲལ་བའི་མིག་དང་། ཁོང་གི་སྙིང་། འཚོ་བའི་སྲོག་ཤིང་གཅིག་པུ་ཡིན། ཁྱེད་མེད་ཀྱི་ན། ང་ཚོས་འཇིག་རྟེན་གྱི་ལྟད་མོ་མཐོང་མི་ཐུབ་ལ།
ཁྱེད་མེད་ཀྱི་ན། ང་ཚོའི་འཚོ་བར་དོན་སྙིང་མེད། ཚེ་སྲོག་གི་མར་མེ་ཇི་ལྟར་འབར། དེ་བས། ང་ཚོས་ཀྱང་ཁྱེད་ཀྱི་མཛད་རྗེས་ཀྱི་རི་མོ་རེ་རེ་ལག་པས་སྐྱོར་ཏེ། ཤུལ་བཞག་རིན་བྲལ་གྱི་ནོར་བུ་རུམ་ལ་བཅུག་ནས། ཁྱེད་ཀྱི་ཞུམ་པ་མེད་པའི་སྙིང་སྟོབས་དང་། བཟོད་བསྲན་གྱི་སྡུག་རུས། རྨ་འབྲིའི་རྒྱུན་ལྟར་བསྲིངས་པའི་བརྩོན་པ། ད་དུང་ཁྱེད་ཀྱི་གཤིས་སུ་ཐིམ་པའི་ངོ་ཚ་དང་ཁྲེལ་གཞུང་། ང་ཚོར་བཅངས་པའི་ལྷད་མེད་ཀྱི་བརྩེ་བ། ཐག་པའི་སྡོམ་ལྟར་སྦྲེལ་བའི་མཐུན་སྒྲིལ་གྱི་ཕུགས་བསམ་བཅས་ནི། དེ་རིང་གི་རྒྱང་བཞུད་པ་སྟེ། ང་ཚོའི་རྒྱགས་ཕྱེ་ཡིན་ལ། སང་ཉིན་གྱི་ཁོ་ཚོའི་རེ་བའང་ཅིའི་ཕྱིར་མིན། སློབ་དཔོན་ལགས། ཐོན་མི། དྲིན་ཅན་གྱི་ཐོན་མི། དེ་རིང་ང་ཚོས། ཁྱེད་ཀྱི་མདུན་ནས་ལག་ཟུང་གི་ཐལ་མོ་སྙིང་གར་སྦྱར་ནས་ཁྱེད་ལྟར་མི་ཚེ་དོན་ལྡན་དུ་བྱ་བར་འབད་ངེས་ཡིན།
བརྩོན་ངེས་ཡིན། དུས་ད་ལྟ་ནས་ཧུར་བརྩོན་བྱེད་ངེས་ཡིན།
སྨྲས་པ།
རི་རབ་ལྕིད་ཀྱིས་མི་ཐེག་ཅིང་། །
ནམ་མཁའི་མཐའ་ལ་ཤོང་མིན་པའི། །
སློབ་དཔོན་ཐོན་མིའི་བཀའ་དྲིན་ནི། །
སྟོང་གསུམ་ནོར་གྱིས་གཞལ་ནུས་མིན། །
འདི་ན་ཁྱེད་སྐུའི་གཟི་བྱིན་དེ། །
ཉི་ཟེར་ཕོག་པའི་པདྨོ་བཞིན། །
དགྱེས་པའི་འཛུམ་དང་བཞད་པའི་དབྱངས། །
ཀ་ཁའི་ངག་དང་ལྷན་ཅིག་སྡེབས། །
གང་གི་མཛད་རྣམ་ཉི་ཟླའི་ཆ། །
དབྱངས་གསལ་སྣང་བས་གསལ་བྱས་པ། །
གངས་ཅན་གཙུག་ལག་བྱེ་བའི་མཛོད། །
འཛིན་པའི་མང་ཐོས་ས་ཁྱབ་ཤོག །
གསེར་ཆེན་རྫོང་མི་རིགས་སློབ་འབྲིང་།
ཐོན་མིའི་ཡིག་ཕུད།
སློབ་དཔོན་ཐོན་མི་རྒྱ་ཡིག་གིས་ངོ་སྤྲོད་བྱས་པ།
|