ཕྱོགས་རིས་ཆགས་སྡང་ཞི་བའི་གསོལ་འདེབས་འབྲེལ་ཚད་དོན་ལྡན།
ཞབས་དཀར་ཚོགས་དྲུག་རང་གྲོལ།
གསར་རྙིང་ཆོས་ལ་ཕྱོགས་རིས་མ་མཆིས་པའི།།
དགེ་བའི་བཤེས་གཉེན་རྣམས་ལ་གསོལ་བ་འདེབས།།
བོད་དུ་དར་བའི་གྲུབ་མཐའ་ཐམས་ཅད་ཀྱི།།
ཉེ་རིང་ཆགས་སྡང་ཞི་བར་བྱིན་གྱིས་རློབས།།
ཨོ་རྒྱན་པདྨ་བོད་དུ་མ་བྱོན་ན།།
བོད་ཀྱི་ལྷ་འདྲེ་ཐམས་ཅད་སུ་ཡིས་འདུལ།།
ལྷ་འདྲེ་བཏུལ་ནས་བསྟན་པ་མ་བཙུགས་ན།།
བཀའ་དང་བསྟན་བཅོས་འདི་རྣམས་གང་ནས་ཡོང་།།
བཀའ་གདམས་ས་སྐྱ་དགེ་ལྡན་མ་བྱུང་ན།།
སངས་རྒྱས་བསྟན་པའི་གཞི་མ་སུ་ཡིས་འཛིན།།
རྙིང་མ་བཀའ་བརྒྱུད་ཞི་བྱེད་གཅོད་མེད་ན།།
སྒྲུབ་བརྒྱུད་བསྟན་པའི་ཁྱད་ཆོས་སུ་ཡིས་འདོན།།
ས་པཎ་དུས་སུ་མདའ་འཕྱར་མེད་གྱུར་ན།།
འཕྲོག་བྱེད་དགའ་བོར་རྫུ་འཕྲུལ་སུ་ཡིས་འགྲན།།
ཆོས་ལུགས་གྲུབ་མཐའ་མང་པོ་མ་དར་ན།།
བསྟན་པ་དར་ཞིང་རྒྱས་པ་སུ་ཡིས་བྱེད།།
སངས་རྒྱས་བསྟན་ལས་སོ་སོར་གྱེས་པ་ཡི།།
རྒྱ་གར་ཉན་ཐོས་སྡེ་པ་བཅོ་བརྒྱད་དང་།།
བོད་དུ་དར་བའི་གྲུབ་མཐའ་མ་ལུས་པ།།
ཕྱོགས་དུས་ཀུན་ཏུ་དར་ཞིང་རྒྱས་ན་བཟང་།།
ཆོས་ལུགས་གྲུབ་མཐའ་མི་འདྲ་སོ་སོ་ཡིས།།
རང་རང་ཕྱོགས་ཀྱི་བསྟན་པ་བཟུང་གྱུར་ན།།
རིས་མེད་བསྟན་པ་དར་ཞིང་རྒྱས་པ་དང།།
མཁའ་མཉམ་འགྲོ་ལ་བདེ་སྐྱིད་ཚད་མེད་འབྱུང་།།
དེ་ཕྱིར་བོད་དུ་དར་བའི་གྲུབ་མཐའ་རྣམས།།
ཕན་ཚུན་ཆགས་སྡང་རྩོད་པ་མ་བྱེད་པར།།
རང་རང་ཕྱོགས་ཀྱི་བསྟན་པ་ཟུངས་ཤིག་ཅེས།།
ཚོགས་དྲུག་རང་གྲོལ་ཐལ་སྦྱར་གསོལ་བ་འདེབས།།
བདག་གིས་ལེགས་པར་བཤད་པའི་གཏམ་སྙན་འདི།།
ཆོས་ལུགས་གྲུབ་མཐའ་གང་གིས་གོ་ན་ཡང་།།
རྒྱུད་ཀྱི་གྲུབ་མཐའི་ཕྱོགས་རིས་ཀུན་ཞི་ནས།།
ཕྱོགས་མེད་དད་གུས་དག་སྣང་འཆར་བར་ཤོག།
རྩོམ་ཡིག་མཁོ་སྤྲོད་པ། གསར་འགོད་པ། རྒྱ་འདུ་སངས་རྒྱས།
|