གཡང་འབོད་ཡིད་བཞིན་འགུགས་པའི་ལྕགས་ཀྱུ་བཞུགས་སོ༎
རྩོམ་པ་པོ། བཙུན་པ་དཀོན་མཆོག་བསྟན་པའི་སྒྲོན་མེ།
༄༅། །ཆོས་དབྱིངས་ངང་ལས་དྲེགས་པའི་སྐུར་བཞེངས་ཏེ༎
ཆོས་བཞིན་སྒྲུབ་པ་ཀུན་དང་ཁྱད་པར་དུ༎
ཆོས་གྲྭའི་འཆད་ཉན་སྒྲིག་སོགས་སྲུང་མཛད་པ༎
ཆོས་སྐྱོང་ཆེན་པོ་མ་གཡེལ་དེང་འདིར་དགོངས༎
འཇམ་དཔལ་དབྱངས་དངོས་བཞད་པའི་རྡོ་རྗེ་ཡིས༎
དགོན་གནས་བཤད་སྒྲུབ་གཉེར་དུ་གཏད་པ་བཞིན༎
དགེ་འདུན་འདུས་ཚོགས་འཆད་ཉན་ལོངས་སྤྱོད་ཀུན༎
དབྱར་གྱི་མཚོ་བཞིན་རྒྱས་པའི་སྡོང་གྲོགས་མཛོད༎
རྣམ་སྨིན་ཡོན་ཏན་བརྒྱད་ཀྱི་ལུས་རྩལ་རྫོགས༎
ཐོས་བསམ་པདྨའི་ཚལ་ལ་དགའ་བས་རྩེན༎
ལུང་རིགས་འདབ་མ་དབྱངས་སྙན་སྒྲོག་པ་ཡི༎
རྐང་དྲུག་བགྲང་ཡས་འདུ་བའི་ཕྱྭ་གཡང་སྩོལ༎
མཁས་བཙུན་ལྷག་བསམ་ཅན་གྱི་སློབ་དཔོན་དང་༎
དད་བརྩོན་ཤེས་རབ་ལྡན་པའི་སློབ་མ་གཉིས༎
རྟེན་འབྲེལ་ལྷན་ ཅིག་འཛོམས་པས་འཆད་ཉན་གྱི༎
རྒྱལ་མཚན་སྲིད་རྩེར་བསྒྲེང་བའི་ཕྱྭ་གཡང་སྩོལ༎
གཞུང་དོན་གདམས་པར་ཤར་བའི་གོ་བ་དང་༎
ཚིག་དོན་ཕྲ་ཞིབ་འབྱེད་པ་རིག་པའི་འཕྲུལ༎
ངེས་པ་སྐྱེད་བྱེད་རྒྱབ་རྟེན་ལུང་དང་བཅས༎
རྩོད་ངག་དགའ་སྟོན་འཕེལ་བའི་ཕྱྭ་གཡང་སྩོལ༎
དམ་ཆོས་འདུལ་བའི་དགོངས་དོན་འདུས་པའི་ཁྲིམས༎
ལས་འབྲས་དྲང་ཐིག་འདེབས་པའི་ལས་བྱེད་པ༎
ཚར་གཅོད་རྗེས་འཛིན་རྟིང་གནོན་མི་ཡོལ་བའི༎
བཅའ་ཁྲིམས་རྨང་གཞི་བརྟན་པའི་ཕྱྭ་གཡང་སྩོལ༎
ངན་ཤེད་བྲག་ལ་འཆའ་བའི་འུག་པ་དང་༎
བླང་དོར་ལམ་དུ་རྒྱུ་བའི་ཤན་འབྱེད་པ༎
ལས་འབྲས་བདེན་པའི་ཉི་མ་འོད་པོ་ཆེའི༎
སྣང་བ་མངོན་དུ་འགྱུར་བའི་ཕྱྭ་གཡང་སྩོལ༎
སྡིག་སྤྱོད་རྒྱན་དུ་ ངོམ་པ་ལོག་པའི་གཏམ༎
ཕྱོགས་ལྷུང་ཙམ་གྱིས་བསྔགས་པའི་མུ་ཅོར་སོགས༎
མ་ཡིན་ཆོས་ཀྱི་གྲགས་པ་ཆོས་བཞིན་དུ༎
བསྒྲགས་བྱས་སྙན་པས་ཀུན་ཁྱབ་ཕྱྭ་གཡང་སྩོལ༎
བསོད་ནམས་ཞིང་གི་མཆོག་གྱུར་དགེ་འདུན་དང་༎
བསོད་ནམས་དད་གཏོང་འཛོམས་པ་སྦྱིན་པའི་བདག།།
བསོད་ནམས་སྡིག་དང་མ་འདྲེས་རྒྱུ་སྦྱོར་གྱིས༎
བསོད་ནམས་དུས་སྟོན་དར་བའི་ཕྱྭ་གཡང་སྩོལ༎
མངོན་འདོད་ཚངས་པའི་བློ་ཡི་གཡོ་བ་ལས༎
བྱུང་མིན་བཤད་སྒྲུབ་བསྟན་པ་གནས་གྱུར་ན༎
ངང་གིས་འདུ་བ་སྲུང་མའི་འཕྲིན་ལས་གྱིས༎
ཕུན་ཚོགས་དཔལ་འབྱོར་རྒྱས་པའི་ཕྱྭ་གཡང་སྩོལ༎
ཁྱད་པར་བློ་གསལ་དོན་གཉེར་ཚུལ་མཐུན་རྣམས༎
ནད་རིམས་གདོན་བགེགས་རྐྱེན་གྱིས་མི་བརྫི་བར༎
ཐོས་བསམ་བྱ་བ་བདེ་བླག་མཐར་ཕྱིན་ཏེ༎
དོན་གཉིས་སྨོན་པ་བཞིན་དུ་འགྲུབ་པར་མཛོད༎
མདོར་ན་མི་འདོད་ཉེར་འཚེ་ཀུན་དང་བྲལ༎
ཕུན་ཚོགས་ལེགས་བྱས་མ་ལུས་ལྷུན་གྱིས་གྲུབ༎
རྒྱལ་བསྟན་ནོར་བུ་རྒྱལ་མཚན་རྩེར་མཆོད་པས༎
སྣང་སྲིད་དགེ་ལེགས་སྣང་བས་ཁྱབ་གྱུར་ཅིག།།
བསོད་ནམས་དར་རྒྱས་རི་རྒྱལ་ལྷུན་པོ་བཞིན༎
སྙན་གྲགས་ཆེན་པོ་ནམ་མཁའ་བཞིན་དུ་ཁྱབ༎
ཚེ་རིང་ནད་མེད་གཞན་དོན་ལྷུན་གྱིས་གྲུབ༎
ཡོན་ཏན་རྒྱ་མཚོ་མཆོག་གི་བཀྲ་ཤིས་ཤོག།།
ཅེས་པ་འདི་ནི་ཐོས་བསམ་གླིང་གི་སྤྱི་གཉེར་དད་བརྩོན་ལྡན་པ་རབ་འབྱམས་པ་བློ་བཟང་དཔལ་ལྡན་གྱིས་གྲྭ་ཚང་གི་ལས་དོན་དང་འབྲེལ་བའི་གཡང་འབོད་བྱ་ཚུལ་རྒྱལ་གསོལ་གྱི་མཇུག་ཏུ་འདོན་རྒྱུ་ཞིག་དགོས་ཚུལ་ཟེར་བར་དགེ་འདུན་སྤྱིའི་གཡང་འབོད་ཚུལ་ཁྲིམས་རྣམ་པར་དག་པ་དང་།སྒོས་སུ་མཚན་ཉིད་གྲྭ་ཚང་གི་གཡང་འབོད་བཀའ་པོད་ལྔའི་འཆད་ཉན།སྔགས་གྲྭ་རྣམས་ཀྱི་གཡང་འབོད་རྒྱུད་དོན་རིམ་གཉིས་ཀྱི་བཤད་སྒྲུབ།འདོན་ཕྱག་ལེན་སོགས་ཡིན་གྱི།གཡང་མགྲོན་པོ་འབོད་པ་བཞིན་བྱེད་པ་དཀའ་ནའང་།རང་རང་གིས་རྒྱུ་བསྒྲུབས་པའི་ཐོག་ཏུ་རྐྱེན་སྲུང་མའི་ཐུགས་རྒྱུད་བསྐུལ་ན་ཕན་པར་བསམས་ཏེ།༧བཙུན་པ་དཀོན་མཆོག་བསྟན་པའི་སྒྲོན་མེས་བྲིས་པའོ༎༧དཔོན་སློབ་དགོན་གནས་དགེ་འདུན་ བཅས་པ་ཡིས༎བསྒྲུབས་བསྒྲུབ་བསྟེན་པའི་སྲུང་མ་ཁྱོད་མིན་པ༎རེ་ས་གཞན་ན་མེད་དོ་བརྩེར་དགོངས་ཏེ༎གཞི་ལམ་བྱེས་གསུམ་ཀུན་ཏུ་སྐྱབས་མཛོད་ཅིག། ཉིན་གསུམ་འབོད་དོ་ཉིན་གྱི་བྱ་ར་མཛོད༎མཚན་གསུམ་འབོད་དོ་མཚན་གྱི་མེལ་ཚེ་མཛོད༎མི་ནད་ཕྱུགས་ནད་ཁ་སྨྲས་ཆོམ་རྐུན་སོགས༎མི་འདོད་ཉེར་འཚེ་ཐམས་ཅད་ཕྱིར་ཟློག་ཅིག། ཟས་ནོར་ལོངས་སྤྱོད་རྐང་འགྲོ་རིན་ཆེན་སོགས༎མཁོ་དགུའི་འབྱོར་བ་དབྱར་གྱི་སྤྲིན་བཞིན་འདུས༎རྣམ་དཀར་ཆོས་ཀྱི་བྱ་བ་མ་ལུས་པ༎སྨོན་པ་བཞིན་དུ་འགྲུབ་པའི་སྡོང་གྲོགས་མཛོད༎ ཅེས་པ་འདི་ཡང་རྗེ་ཉིད་ཀྱིས་གསུངས་པའོ༎ ༧ རིགས་གསུམ་སྒྱུ་འཕྲུལ་བློ་བཟང་གྲགས་པ་དང་༎བཞད་པའི་རྡོ་རྗེའི་སྐུ་ཚེའི་འཕྲེང་བརྒྱུད་ཀྱི༎རྨད་བྱུང་ཐུགས་བསྐྱེད་བདེན་པའི་མཐུ་བྱིན་གྱིས༎ནག་ཕྱོགས་གདུག་པའི་བསམ་སྦྱོར་ཞི་བར་མཛོད༎༎ སརྦ་མངྒ་ལཾ།
རྩོམ་ཡིག་ཕབ་བཤུ་བ། སེང་དཀར།
|