སློབ་གཉེར་སྐོར་གྱི་རྒྱུན་ཤེས།

བཤད་ཐབས་ཡན་ལག་དྲུག

༡ བྱུང་ཚུལ་ཁོག་འབུབ་ཀྱི་ཡན་ལག་ཆུ་རྒྱུན་གངས་ལ་ཐུག་པ་ལྟ་བུའི་ཚུལ་གྱིས་འཆད་པ།  ༢  བསྡུས་དོན་ས་བཅད་ཀྱི་ཡན་ལག་སྟག་གི་མཆོང་པ་ལྟ་བུའི་ཚུལ་གྱིས་འཆད་པ།   ༣  མཚམས་སྦྱོར་སྐབས་སྡེབས་ཀྱི་ཡན་ལག་མཉན་པ་མཁས་པ་ལྟ་བུའི་ཚུལ་གྱིས་འཆད་པ།  ༤  འགྲེལ་འབྲུ་སྣོན་གྱི་ཡན་ལག་རུས་སྦལ་གྱི་ནུར་འགྲོས་ལྟ་བུའི་ཚུལ་གྱིས་འཆད་པ།  ༥  བརྒལ་ལན་རྩོད་པའི་ཡན་ལག་དཔའ་བོའི་རལ་གྲི་ལྟ་བུའི་ཚུལ་གྱིས་འཆད་པ།   ༦  ཟབ་གྲོལ་མན་ངག་གི་ཡན་ལག་ལོང་བ་མིག་འབྱེད་ལྟ་བུའི་ཚུལ་གྱིས་འཆད་པའོ།། ཞེས་ནང་རིག་པའི་ཚིག་མཛོད་ལས་གསུངས་སོ། །

སློབ་ཁྲིད་བྱ་ཐབས་ལྔ།

༡ བཤད་ཁྲིད་དེ།ཚིག་དོན་རྣམས་ཡིག་འབྲུ་ཡང་མ་ལུས་པར་གསལ་བར་བཤད་པ།  ༢ དམར་ཁྲིད་དེ། མིག་མཐོང་ལག་ཟིན་གྱི་དངོས་པོ་དང་རི་མོ་སོགས་དམར་རྗེན་དུ་བསྟན་ནས་བཤད་པ།  ༣ བསླང་ཁྲིད་དེ།  དྲི་བ་དྲིས་ལན་ཚུལ་གྱིས་དྲན་པ་བསླངས་ནས་དོགས་གཞི་ཆོད་པའི་བློ་སྐྱེད་པར་བཤད་པའོ། ། ༤  མྱོང་ཁྲིད་དེ།རང་གི་ཉམས་མྱོང་རྣམས་གཞན་ལ་སློབ་ཁྲིད་བྱེད་པ། ༥   ཟུར་ཁྲིད་དེ།བསླབས་ཟིན་པའི་མ་ཤེས་ས་ཟུར་དུ་བསྟན་པའོ། །

ཆོས་ཉན་པའི་འདུ་ཤེས་དྲུག   རང་ལ་ནད་པའི་འདུ་ཤེས།ཆོས་ལ་སྨན་གྱི་འདུ་ཤེས། དགེ་བའི་བཤེས་གཉེན་ལ་སྨན་པའི་འདུ་ཤེས།ཡོན་ཏན་ཉམས་སུ་ལེན་པ་ལ་ནད་འཚོ་བའི་འདུ་ཤེས།ཆོས་ཀྱི་ཚུལ་ལ་ཡུན་རིང་དུ་གནས་པའི་འདུ་ཤེས།དེ་བཞིན་གཤེགས་པ་ལ་སྐྱེས་བུ་དམ་པའི་འདུ་ཤེས་འཆངས་པ་དགེའོ། །

རྩོམ་ཡིག་མཁོ་སྤྲོད་པ།  བན་ཤུལ་འབུམ་རྩེ་ཡག