གངས་ལྗོངས་ཤེས་རིག་ནོར་བུའི་སློབ་གླིང་གི་དྲ་བའི་གསར་འགོད་པའི་སྐབས་དང་བོའི་ཚོགས་འདུ།
གངས་ལྗོངས་ཤེས་རིག་ནོར་བུའི་སློབ་གླིང་གི་དྲ་བ་འདི་བོད་སྤྱི་ཚོགས་ཀྱི་དྲ་བའི་སྡིངས་ཆ་རུ་ཤར་གཏོང་བྱས་ཏེ་མི་ལོ་ཧྲིལ་བོ་གཅིག་ལྷག་འགོར་ཡོད་ཅིང་། འདིའི་རིང་ལ་དྲ་བའི་ཀློག་གྲངས་༡༤༤༦༧༢༣ལ་བུད་ཡོད་པས་སྤྱི་ཚོགས་ལས་རིགས་སོ་སོར་གནས་པའི་རྒྱ་ཆེ་བའི་ཀློག་མཁན་མང་བོའི་དགའ་བསུ་བླ་མེད་ཐོབ།
སྤྱི་ལོ་༢༠༡༦ལོའི་ཟླ་༩བའི་ཚེས་༧ཉིན་སློབ་གླིང་རང་དུ་དྲ་བའི་དོ་དམ་དང་ཁ་ཕྱོགས། རྩོམ་སྒྲིག་དང་གསར་འགོད་སོགས་ཀྱི་ཕྱོགས་ནས་ཚོགས་འདུ་འཚོགས་ཤིང་། ཚོགས་འདུའི་སྟེང་དུ་མཐར་ཕྱིན་འཛིན་གྲྭ་སོ་སོའི་དྲ་བའི་གསར་འགོད་པ་སྐལ་བཟང་ལུང་རིགས། ཉི་མ་རྒྱལ་མཚན། བློ་བཟང་ཆོས་གྲགས། རྒྱ་འདུ་སངས་རྒྱས། གཉན་བུ། ཐེབ་རྒྱ་རྟ་མགྲིན། སེར་སྐོར་འཇམ་ཚེ། རྡོ་རྗེ་ཕག་མོ། རྟ་མགྲིན་ཚེ་རིང་། འཇིགས་མེད་གྲགས་པ། མགོན་པོ་སྐྱབས། གླིང་བུའི་སྙེ་མ། སྙིང་རྒྱལ། འབུམ་རྩེ་ཡག འཇམ་དབྱངས་ཀླུ་སྒྲུབ། པདྨ་རིག་འཛིན། སྐལ་བཟང་ལུང་རྟོགས། ཁྲི་པདྨ། མཁའ་འགྲོ་རྒྱལ། བསོད་རབ། རྨ་ཆེན་སྐྱབས། པདྨ་སྙིང་འབུམ། སངས་རྒྱས་སྐྱབས་བཅས་ཞུགས།
སྔ་དྲོར་སློབ་གླིང་རང་གི་ཨ་མྱེས་ཁྲ་རྒན་རིག་གནས་ཁམས་བསང་གླིང་དུ་འཚོགས་ཏེ་དྲ་བའི་དོ་དམ་པ་ཁཱ་ཤེས་རབ་རྒྱ་མཚོས་ལོ་གཅིག་གི་རྩོམ་སྒྲིག་གི་བྱ་བ་སྤྱི་བསྡོམས་བྱས་ཤིང་། རྩོམ་སྒྲིག་པ་འབའ་སྣང་གྲོལ་དང་མགོན་པོ་རྡོ་རྗེ། འཇམ་དབྱངས་ཡེ་ཤེས་སོགས་ཀྱིས་མ་འོངས་བར་དྲ་བ་ཇི་ལྟར་རྒྱུད་འཛིན་བྱེད་པ་དང་དྲ་བའི་ནུས་པ་དང་རྩོམ་སྒྲིག་སོགས་ཀྱི་ཐད་ནས་གཏམ་བཤད་གནང་ཞིང་། དགེ་རྒན་འཇིགས་མེད་རྒྱལ་མཚན་མཆོག་གིས་དྲ་བའི་རྩ་དོན་དང་ཁ་ཕྱོགས། ཁྱད་པར་ཐོན་མིའི་སློབ་གསོ་ལས་འཕྲོས་ཏེ་བཀའ་སློབ་ཡིད་འཁུལ་བ་གནང་ཞིང་། ཐེངས་འདིར་གསར་འགོད་པ་གསེར་ལག་འཇམ་དབྱངས་ཚུལ་ཁྲིམས་དང་བློ་བཟང་ཆོས་གྲགས། སེར་སྐོར་འཇམ་ཚེ་གསུམ་ལ་ཕུལ་བྱུང་གསར་འགོད་པའི་བྱ་དགའ་གནང་བར་མ་ཟད། གསར་འགོད་པ་ཡོངས་ལ་རང་དྲ་བའི་གསར་འགོད་ཀྱི་ལག་རྟགས་གནང་།
ཕྱི་དྲོར་སློབ་གླིང་རང་གི་དཔེ་མཛོད་ཁང་སྟེ་སྒྲ་སྒྱུར་གཙུག་ལག་ཁང་དུ་དྲ་བའི་མདུན་ལམ་ཐད་ཀྱི་བགྲོ་གླེང་ཟབ་རྒྱས་ངང་འཚོགས་ཤིང་། དགེ་རྒན་འཇིགས་མེད་རྒྱལ་མཚན་མཆོག་དབུར་བཞུགས་སྒོས་གསར་འགོད་པ་གྱི་ལིང་འཇིགས་མེད་དང་སྐལ་ལྡན་རྒྱ་མཚོ། སྐལ་བཟང་ལུང་རིགས། ཉི་མ་རྒྱལ་མཚན་སོགས་གསར་འགོད་པ་སོ་སོས་རང་རེའི་དྲ་བ་འདི་ཡིས་བོད་རང་གི་ཐུན་མོང་མ་ཡིན་པའི་ཐོན་མིའི་སློབ་གསོ་རྒྱུད་འཛིན་དང་དར་སྤེལ་ཇི་ལྟར་གཏོང་དགོས་ཚུལ་སོགས་ཀྱི་ཕྱོགས་ནས་རང་རང་གི་བསམ་ཚུལ་སྣ་ཚོགས་ལྷུག་བརྗོད་གནང་སྟེ་འཁྲུག་ཆ་དོད་པོ་བྱུང་ཞིང་། མཐར་དུས་ཚོད་ཀྱི་དབང་གིས་ཚོགས་འདུ་བདེ་བླག་ངང་མཇུག་བསྡུས།
སློབ་དཔོན་ཆེན་མོ་འཇིགས་མེད་རྒྱལ་མཚན་མཆོག་གིས་བཀའ་སློབ་གནང་བ།
ཚོགས་རའི་ཟུར་དངོས་ཤིག
ཚོགས་རའི་ཡུལ་དངོས།
གངས་ལྗོངས་ཤེས་རིག་ནོར་བུའི་སློབ་གླིང་གི་དྲ་བའི་གསར་འགོད་ཚོགས་འདུའི་སྟེང་ཕེབས་པའི་ཚོགས་ཞུགས་མི་སྣའི་མཉམ་པར།
|