བོད་ཀྱི་གསོ་རིག་མཁས་དབང་སྨན་པ་ཏིང་འཛིན་ལགས་ཀྱི་མཛད་འཕྲིན།
གསར་འགོད་པ། ཀརྨ་ལམ་བཟང་།
དེ་ཡང་བོད་གངས་རིའི་ལྗོངས་ཀྱི་མཁས་གྲུབ་སྔ་མ་རྣམས་ཀྱིས་ཚད་མར་འཛིན་ཞིང་འཚོ་བྱེད་ཀུན་གྱི་སྤྱི་ནོར་ལྟ་བུའི་བོད་ཀྱི་གསོ་བ་རིག་པའི་གཞུང་ལུགས་སྔ་གྲས་སུ་གྲགས་པ་སྨན་དཔྱད་ཟླ་བའི་རྒྱལ་བོ་ནི་དུས་རབས་བརྒྱད་པ་ཙམ་དུ་བྱུང་ལ། དེ་ནས་དུས་རབས་བཅུ་གསུམ་པའི་བར་དུ་གཞུང་འདི་ལ་སློབ་གཉེར་བྱེད་པ་ཆེས་མང་དུ་བྱུང་བ་དང་། ལྷག་པར་དུ་སྨན་པ་འབུམ་རམས་པའི་སྟེགས་སུ་འཛེགས་པའི་ཐེམ་སྐས་ཀྱི་རིགས་ཡ་གྱལ་ཞིག་ཡིན། གཞུང་ལུགས་འདིར་ལུས་ཀྱི་གྲུབ་ཚུལ་དང་ནད་གཞི་ངོས་འཛིན། ཐུན་མོང་མ་ཡིན་པའི་གསོ་ཐབས་ལག་ལེན་སོགས་འཐུས་སྒོ་ཀུན་ནས་ཚང་བ་ཞིག་ཡིན་ཡང་། གཞུང་ལུགས་ཆ་ཚང་གི་ཚིག་དོན་གཉིས་ཆ་ནས་གོ་བ་བྱང་ཆུབ་པར་ལེན་པ་ཤིན་ཏུ་དཀའ་བའི་གནས་སུ་འདུག་པས་ལོ་རྒྱུས་ཐོག་གསོ་རིག་སྨྲ་བ་སུས་ཀྱང་འགྲེལ་མ་ཕོག་པར་ད་ལྟའི་བར་དུ་ལུས། དེ་བས་དུས་རབས་བཅུ་གསུམ་པ་མན་ནས་རིམ་གྱིས་ཁྲིད་རྒྱུན་ཡོངས་སུ་ཉམས་ཤིང་ད་ལྟ་གངས་རིའི་ལྗོངས་སུ་རིག་གཞུང་འདིའི་ལུང་རྒྱུན་ཙམ་ཡོད་པ་ལས་འཆད་ཁྲིད་ཀྱི་རྒྱུན་རྩ་བ་ནས་ཆད་འདུག་པ་སུས་ཀྱང་མཁྱེན་གསལ་རེད། ཡིན་ཡང་དགའ་འོས་པ་ཞིག་ལ་གངས་ལྗོངས་ཤེས་རིག་ནོར་བུའི་སློབ་གླིང་གི་གདན་ཞུས་སློབ་དཔོན། བོད་ཀྱི་གསོ་རིག་མཁས་དབང་མགོ་ལོག་དབང་ཆེན་འབུམ་གྱི་རྒན་ཏིང་འཛིན་མཆོག་གིས་བོད་ཀྱི་གསོ་བ་རིག་པའི་གཞུང་ལུགས་འགང་ཆེན་འདི་ལྟ་བུ་ཞིག་ཉམས་རྒུད་དུ་གྱུར་བ་ཐུགས་ཀྱིས་མ་བཟོད་པར་མི་ལོ་དྲུག་གི་རིང་ལ་དཀའ་བ་ཁྱད་དུ་བསད་ནས་གཞུང་འདིའི་དཔེ་གཞི་མི་འདྲ་བ་དུ་མར་ཞིབ་འཇུག་དང་དཔྱད་བསྡུར་གནད་སྨིན་པ་བྱས་ཏེ་སྨན་དཔྱད་ཟླ་བའི་རྒྱལ་བོའི་འགྲེལ་ཆེན་ལྷག་བསམ་ཟླ་བ་དཀར་བོའི་ཟེར་མདངས་ཞེས་ཁ་གསལ་ཞིང་གནད་ལ་འཁེལ་བའི་པོད་ཏི་གསུམ་གྱི་བདག་ཉིད་ཅན་གྱི་གཞུང་འགྲེལ་ཆ་ཚང་བ་ཞིག་ལེགས་པར་བརྩམས་ཤིང་གྲུབ་པ་དང་། ད་ལན་ཁོང་གིས་བོད་མདོ་དབུས་ཁམས་གསུམ་ནས་ཕེབས་པའི་འཚོ་བྱེད་དོན་གཉེར་ཅན་བརྒྱ་ཕྲག་གཉིས་ལྷག་ལ་གཞུང་ཆེན་འདིའི་རྩ་འགྲེལ་དང་གཞུང་བཤད་ལག་ལེན་ཆ་ཚང་གི་དཔེ་ཁྲིད་གནང་། དེ་དང་ཆབ་ཅིག་ཁོང་གིས་བརྩམས་པའི་དཔྱད་མཆོག་ཐུར་མའི་དགོངས་འགྲེལ་རིན་ཆེན་བཻ་ཌཱུར་སྔོན་པོའི་དོ་ཤལ་བློ་གསལ་མགུལ་རྒྱན་ཞེས་པའི་ཐུར་མའི་ལག་ལེན་གྱི་རྒྱས་འགྲེལ་དང་། རྡོ་རྗེ་དབྱུག་པའི་བཅོས་ཐབས་ཀྱི་མན་ངག་ཕྱོགས་བསྡུས་གཉིས་ཀྱང་རེ་རེ་ནས་ཞིབ་ཁྲིད་གནང་། འདི་ནི་དོན་དང་མཐུན་པའི་མི་རིགས་ཀྱི་རིག་གནས་ཉམས་པ་སླར་གསོ་ཞིག་ཡིན་ལ། བོད་ཀྱི་གསོ་བ་རིག་པའི་འོད་སྣང་གསར་བ་ཞིག་སླར་ཡང་གངས་རིའི་ལྗོངས་སུ་ཤར་བར་བྱས་པའང་ཡིན་ནོ།།
རྒན་ཏིངའཛིན་མཆོག་གིས་སྨན་དཔྱད་ཟླ་བའི་རྒྱལ་བོའི་འགྲེལ་ཆེན་གྱི་ཁྲིད་གནང་བཞིན་པ།
མདོ་དབུས་ཁམས་གསུམ་ནས་ཐེངས་འདིའི་དཔེ་ཁྲིད་ལ་སླེབས་པའི་ཁོང་གི་སློབ་མ།
ཁོང་གིས་བརྩམས་པའི་པོད་གསུམ་གྱི་བདག་ཉིད་ཅན་གྱི་སྨན་དཔྱད་ཟླ་བའི་འགྲེལ་ཆེན་ལྷག་བསམ་དཀར་པོའི་ཟེར་མདངས་ཞེས་བྱ་བ།
|