༄༅།།སྙིང་རྗེའི་སྐད་དོད།

    གཞན་ཡང་དེ་རིང་གི་ཕྱི་དྲོའི་ཤེས་པ་འདི་ཉིད་ཉིན་གུང་གི་ཤེས་པ་སྔོན་དུ་སོང་བ་ལ་ལྟོས། དེ་སྔ་དྲོའི་ཤེས་པ་ལ་ལྟོས་པ་ནས་བཙས་མ་ཐག་གི་ཤེས་པའི་བར་ཤེས་པ་ཕྱི་མ་ཕྱི་མ་རྣམས་ལ་རང་རང་གི་རིགས་འདྲའི་ཤེས་པ་སྔ་མ་སྔ་མ་སྔོན་དུ་སོང་བ་ལ་ལྟོས་དགོས་ལ། བཙས་མ་ཐག་གི་ཤེས་པ་ལ་རང་གི་རིགས་འདྲའི་ཤེས་པ་སྔ་མ་སྔོན་དུ་སོང་བའི་རྒྱུ་རྐྱེན་ལ་ལྟོས་མེད་དུ་འོང་བའི་རྒྱུ་མཚན་མེད་ཚུལ་རིགས་པས་སྒྲུབ་སྟེ། མངལ་དུ་ཉིང་མཚམས་སྦྱར་མ་ཐག་པའི་རིག་པ་ཆོས་ཅན། རིག་པ་སྔ་མ་སྔོན་དུ་སོང་སྟེ། རིག་པ་ཡིན་པའི་ཕྱིར། དཔེར་ན་ད་ལྟའི་རིག་པ་བཞིན་ཞེས་པ། རིག་པའི་ཡ་མཐའ་ཐུག་མེད་དུ་སྒྲུབ་པའི་རིགས་པ་དང་། རིག་པའི་ཕྱི་མཐའ་ཐུག་མེད་དུ་སྒྲུབ་པའི་རིགས་པ་ནི། སེམས་ཅན་ཐ་མལ་བའི་འཆི་སེམས་སྐད་ཅིག་ཐ་མ་ཆོས་ཅན། རིག་པ་ཕྱི་མ་ཉིང་མཚམས་སྦྱོར་ཏེ། ཆགས་ལྡན་གྱི་རིགས་པ་ཡིན་པའི་ཕྱིར། ཞེས་འགོད་ཅིང་། དེ་ལྟར་རིག་པའི་ཡ་མཐའ་ཐུག་མེད་དུ་བསྒྲུབས་ནས། རང་གི་རིག་པ་ལ་ཐོག་མ་མེད་པ་བཞིན་དུ་སྐྱེ་བ་ལ་ཐོག་མ་མེད་ཚུལ་སོགས་བསམས་ནས་སེམས་ཅན་རྣམས་མར་གྱུར་ཚུལ་སྒོམ་དགོས།