མཁས་པའི་བསླབ་བྱ།

རྫ་དཔལ་སྤྲུལ་རིན་པོ་ཆེ་ཨོ་རྒྱན་འཇིགས་མེད་ཆོས་ཀྱི་དབང་པོས།

 བཀུར་ཀྱང་གོང་མ་མཉེས་དུས་མི་འོང་གིས།།
སྐྱོང་ཡང་འོག་མ་མགུ་དུས་མི་འོང་གིས།།
བརྩེ་ཡང་ཕར་བསམ་ཚུར་ལ་མི་སེམས་པའི།།
ཚུལ་འདི་དགོངས་ལ་བློ་ཐག་ཆོད་པར་མཛོད།།
 
མཁས་ཀྱང་བསྟན་དོན་མི་འགྲུབ་རྩོད་པ་འཕེལ།།
གྲུབ་ཀྱང་གཞན་དོན་མི་འབྱུང་སྒྲོ་སྐུར་མང་།།
མཐོ་ཡང་སྡེ་ཆུས་མི་འོང་ཁེངས་ལོག་ཆེ།།
ད་ལྟའི་དུས་འདི་དགོངས་ལ་སྐྱོ་བར་མཛོད།།
 
བཤད་ཀྱང་བདེན་དུ་མི་འཛིན་གཞན་དུ་གོ།།
ཕན་སེམས་གཏང་ནས་དཀར་ཀྱང་ལོག་པར་འཛིན།།
འཁྱོག་པོས་དྲང་པོ་འཁྱོག་པོར་མཐོང་དུས་འདིར།།
སུ་ལའང་ཕན་པ་མི་འགྲུབ་རེ་ཐག་ཆོད།།
 
ཆོས་ཀུན་སྒྱུ་མ་ལྟ་བུར་རྒྱལ་བས་གསུངས།།
ད་ནི་སྒྱུ་མ་ལས་ཀྱང་སྒྱུ་ཆེན་ཏེ།།
གཡོ་སྒྱུའི་སྒྱུ་མ་ཤོམ་པའི་མིག་འཕྲུལ་མཁན།།
སྙིགས་སྤྱོད་སྒྱུ་མ་འདི་ལ་འཇིགས་པར་མཛོད།།
 
གཏམ་རྣམས་བྲག་ཅ་ལྟ་བུར་རྒྱལ་བས་གསུངས།།
ད་ནི་བྲག་ཅ་ལས་ཀྱང་བྲག་ཅ་སྟེ།།
ཁ་དང་དོན་དུ་མི་མཚུངས་བྲག་ཅའི་གཏམ།།
སླུ་ཚིག་བྲག་ཅ་འདི་ལ་སུན་པ་སྐྱེད།།
 
སུ་མཐོང་མི་མ་ལགས་ཏེ་སླུ་བྱེད་མཁན།།
སུས་མཐོང་གཏམ་མ་ལགས་ཏེ་བསླུ་བྲིད་ཚིག།།
ད་ནི་སུ་ལའང་བློ་གཏད་མི་འདུག་གིས།།
རང་ཉིད་གཅིག་པུ་རང་དགར་གནས་པར་མཛོད།།
 
ལུས་སྤྱོད་ཆོས་བཞིན་སྤྱོད་ན་ཀུན་དང་འགལ།།
ངག་གཏམ་དྲང་པོར་བཤད་ན་ཕལ་ཆེར་ཁྲོ།།
སེམས་བཟང་གཏིང་ནས་དཀར་ཀྱང་སྐྱོན་དུ་རྩི།།
ད་ནི་རང་ཚུལ་སྦེད་པའི་དུས་ལ་བབ།།
 
 ལུས་སྦས་དབེན་པའི་རི་ལ་གཅིག་པུར་སྡོད།།
ངག་སྦས་སྨྲ་བ་མ་མང་འབྲེལ་ཐག་ཆོད།།
སེམས་སྦས་རང་སྐྱོན་ཁོ་ནར་ཅེར་རེ་ལྟོས།།
སྦས་པའི་རྣལ་འབྱོར་ཟེར་ན་དེ་ལ་ཟེར།།
 
སུ་ལའང་བློ་གཏད་མི་འདུག་ཞེ་ལོག་གེ།།
གང་ལའང་སྙིང་པོ་མི་འདུག་སྐྱོ་ཆད་དེ།།
གང་བསམ་འགྲུབ་དུས་མི་འདུག་རྦད་ཐད་ཆོད།།
འདི་གསུམ་གཏན་དུ་འགྲོགས་ན་ཕན་པར་མཆིས།།

རྩོམ་ཡིག་མཁོ་སྤྲོད་པ། གསར་འགོད་པ་བན་ཤུལ་འབྲུག་ལྷ་རྒྱལ།