འབྲི་སྟོད་རྫོང་མི་རིགས་སློབ་འབྲིང་གིས་ཤེས་བྱའི་འགྲན་རྒྱུགས་སྤེལ་བ། 

སློབ་འབྲིང་སློབ་མའི་ཤེས་བྱའི་འགྲན་རྒྱུགས་སྤེལ་བཞིན་པའི་ཚོགས་རའི་རྣམ་པ།

    སྤྱི་ལོ2015ལོའི་ཟླ་བ11པའི་ཚེས11རེས་གཟའ་ལྷག་པ་ཉིན་གྱི་སྔ་དྲོའི་དུས་ཚོད་བཅུ་པ་ནས་ཉིན་གུང་དུས་ཚོད་དང་པོ་དང་ཕྱེད་ཀྱི་བར་དུ། འབྲི་སྟོད་རྫོང་མི་རིགས་སློབ་འབྲིང་གི་གཞུང་སྒྲུབ་ཐོག་ཁང་གི་ཐོག་བརྩེགས་གསུམ་པའི་ཚོགས་ཁང་དུ་ཡུལ་ཤུལ་ཁུལ་རྒྱང་སྒྲོག་བརྙན་འཕྲིན་ཁང་གིས་ལྟ་སྐུལ་འོག་འབྲི་སྟོད་རྫོང་སློབ་གསོ་ལས་ཁུངས་ཀྱི་གཙོ་འཛིན་རྒན་བཀྲ་ཤིས་དང་། འབྲི་སྟོད་རྫོང་མི་རིགས་སློབ་འབྲིང་གི་སློབ་གཙོ་རིན་ཆེན་རྡོ་རྗེ་ལགས་དང་སློབ་གྲྭའི་བོད་ཀྱི་སྐད་ཡིག་དགེ་རྒན་རྣམ་པས་ཐུགས་ཁུར་དང་རྒྱབ་སྐྱོར་འོག་འབྲི་སྟོད་རྫོང་མི་རིགས་སློབ་འབྲིང་གི་ཁྲིད་དཔྱོད་ཁང་གི་གཙོ་སྒྲུབ་གནང་སྟེ་སྐབས་དང་པོའི་ཁུལ་ཡོངས་ཀྱི་འབྲི་ཆུ་གཟེངས་བུམ་རྟགས་ཅན་གྱི་སློབ་འབྲིང་སློབ་མའི་སྐད་གཉིས་ཤེས་བྱའི་འགྲན་བསྡུར་ཞེས་པའི་བྱ་འགུལ་དེ་འབྲི་སྟོད་རྫོང་མི་རིགས་སློབ་འབྲིང་དུ་གཟབ་རྒྱས་ངང་སྤེལ།

ཁྲིད་དཔྱོད་ཁང་གི་འགན་འཛིན་དོན་འགྲུབ་རྡོ་རྗེ་ལགས་ཀྱིས་མདོ་འཛིན་གནང་བཞིན་པ།

   འགྲན་རྒྱུགས་སྐབས་ཀྱི་ཚོགས་ཁང་གི་མདུན་གྲལ་དུ་རྒན་བཀྲ་ཤིས་དང་རྒན་རིན་ཆེན་རྡོ་རྗེ། རྒན་རྒྱལ་མཚན། རྒན་ཚེ་སྐྱབས། རྒན་འབྱོར་ལྡན། རྒན་རྡོ་རྗེ་དོན་འགྲུབ། རྒན་བཟང་པོ་དོན་འགྲུབ་སོགས་བཞུགས་ཡོད་ཅིང་། དེ་ལས་གཞན་པའི་ཚོགས་ཁང་་གི་སྡོད་གནས་ཡོངས་སུ་བོད་ཀྱི་སྐད་ཡིག་དགེ་རྒན་རྣམ་པ་དང་། བོད་ཡིག་གི་རྨང་གཞི་ཆུ་ཚད་བཟང་བའི་སློབ་མ་བཞི་བརྒྱ་ལ་ཉེ་བ་ཙམ་བཞུགས། 

ཤེས་བྱའི་འགྲན་རྒྱུགས་འདིའི་སྐབས་སུ་ཨང་རིམ་དང་པོ་ཐོབ་མཁན་གྱི་སློབ་མ་རྣམ་པར་བྱ་དགའ་སྩོལ་བཞིན་པ།

    བྱེད་སྒོའི་དངོས་གཞི་སྐབས་སུ་རྒན་དོན་འགྲུབ་རྡོ་རྗེ་དང་རྒན་ཀུན་དགའ་ཆོས་འཕེལ་རྣམ་གཉིས་ཀྱིས་འགན་ཁུར་ཆེར་བཞེས་ཀྱིས་སློབ་འབྲིང་སློབ་མའི་ཤེས་བྱ་འགྲན་རྒྱུགས་དེར་སྔ་ཕྱི་གོ་རིམ་དང་སྒྲིག་གཞི་ཡོད་པའི་སྒོ་ནས་དྲི་བ་བཏོན་ཞིང་། དེ་ཡང་འགྲན་ཞུགས་སློབ་མ་རྣམས་ཚོགས་ཆུང་བདུན་དུ་བགོས་ཡོད་ཅིང་། ཚོགས་ཆུང་དེ་དག་གི་མཚན་བྱང་ལ་ཡང་ཐུན་མོང་མ་ཡིན་པའི་བོད་རང་གི་རིག་གནས་ཀྱི་ཁྱད་ཆོས་དང་དགེ་མཚན་མངའ་བར་མཛད་ཡོད་དེ། སྦྱིན་པ་ཚོགས་ཆུང་དང། ཚུལ་ཁྲིམས་ཚོགས་ཆུང་། བཟོད་པ་ཚོགས་ཆུང་། བརྩོན་འགྲུས་ཚོགས་ཆུང་། བསམ་གཏན་ཚོགས་ཆུང་།ཤེས་རབ་ཚོགས་ཆུང་ཕར་ཕྱིན་དྲུག་ཙམ་དུ་མ་ཟད་ཕར་ཕྱིན་བཅུ་པོའི་མཐའ་མ་ཡེ་ཤེས་ཚོགས་ཆུང་བཅས་སུ་ཚོགས་ཆུང་ཁག་བགོས་ཀྱིས་མཚན་བྱང་གཏན་འབེབས་གནང་སྟེ་ཚོགས་ཆུང་སོ་སོའི་སློབ་མ་རྣམ་པར་ཤེས་བྱའི་འགྲན་རྒྱུགས་ཀྱི་དྲི་བ་བཏོན་པར་མ་ཟད།

རྒན་ཚེ་སྐྱབས་ལགས་ཀྱིས་གསུང་བཤད་གནང་བཞིན་པ།

    མཇུག་བསྡུའི་སྐབས་སུ་ཡུལ་ཤུལ་ཁུལ་རྒྱང་སྒྲོག་བརྙན་འཕྲིན་ཁང་གི་ཁུལ་ཡོངས་ཀྱི་འབྲི་ཆུ་གཟེངས་བུམ་རྟགས་མའི་ཤེས་བྱ་འགྲན་རྒྱུགས་ལས་སྒྲུབ་ཚན་ཆུང་གི་འགན་འཛིན་མི་སྣ་ཚེ་སྐྱབས་ལགས་ཀྱིས་གཏམ་བཤད་གནང་ཞིང་།  སྐབས་འདིའི་ཤེས་བྱ་འགྲན་རྒྱུགས་ཁྲོད་བྱ་དགའ་ཨང་རིམ་དང་པོ་དང་གཉིས་པ། གསུམ་པ། བཞི་བ། ལྔ་པ་བཅས་ཐོབ་མཁན་གྱི་སློབ་མ་རྣམས་ལ་རིམ་པ་བཞིན་དུ་གཙོ་འཛིན་དབུ་ཁྲིད་རྣམ་པས་ཐུགས་དགྱེས་ཚོར་ཆེན་པོའི་ངང་ནས་བྱ་དགའ་བསྩལ་ནས་ཁྲིད་དཔྱོད་ཁང་གི་འགན་འཛིན་དོན་འགྲུབ་རྡོ་རྗེ་ལགས་ཀྱིས་ཁ་ལས་དགེ་བའི་བཀྲ་ཤིས་སྨོན་ཚིག་གིས་འབྲི་སྟོད་རྫོང་མི་རིགས་སློབ་འབྲིང་དུ་སྤེལ་བའི་སློབ་འབྲིང་སློབ་མའི་ཤེས་བྱའི་འགྲན་རྒྱུགས་དེ་རྒྱལ་ཁའི་ངང་ནས་མཇུག་ལེགས་པར་བསྡུས་པ་རེད། །

ཤེས་བྱའི་འགྲན་རྒྱུགས་ལ་ཞུགས་པའི་ཚོགས་ཆུང་སོ་སོ། 

རྩོམ་སྒྲིག་འགན་འཁུར་བ།  ཁཱ་ཤེས་རབ་རྒྱ་མཚོ།  མགར་ཉི་ཟེར། བན་ཤུལ་འཇམ་དབྱངས། ཨ་བུ་འབྲོང་།