​​རྩོམ་རིག་གསར་བའི་གནད་དོན་འགའ་ཞིག་གླེང་བ།


རྩོམ་རིག་གསར་བའི་གནད་དོན་འགའ་ཞིག་གླེང་བ།

     དོར་ཞི་གདོང་དྲུག་སྙེམས་པའི་བློ་ལྡན།
    གངས་ཅན་བོད་མི་མི་རིགས་ནི་ལོ་རྒྱུས་ཆེས་སྔ་ཞིང་རིག་གནས་སྒྱུ་རྩལ་སོགས་ཀྱང་འཛམ་གླིང་མི་རིགས་ཁྲོད་ཀྱི་རྩོམ་དར་སྔ་ཤོས་གྲས་ཡིན་ལ།རྩོམ་རིགས་ཀྱི་དབང་དུ་བཏང་ན་དམངས་ཁྲོད་ཀྱི་རྩོམ་གླུ་གཞས་སྒྲུང་གཏམ་སོགས་ཆེས་སྔ་མོ་ཞིག་ནས་ཡོད་པ་ལོ་རྒྱུས་ཀྱི་ཡིག་ཚང་རྙིང་བ་དང་།སྒྲུང་དང་གཏམ་རྒྱུད་དམངས་གླུ་སོགས་ཀྱི་བརྡ་དང་ཐ་སྙད་འཚོ་བའི་ནང་དོན་སོགས་ལ་བརྟགས་ན་ཤེས་ཤིང་།ཡི་གེར་བཏབ་པའི་སྒྲུང་དང་གཏམ་རྒྱུད་རྟོགས་བརྗོད་རྣམ་ཐར་སྙན་ཚིག་སོགས་སྒྱུ་རྩལ་རྩོམ་རིགས་སྐོར་ད་ལྟའི་བར་མ་ཉམས་པར་ཡོད་པ་དག་ཀྱང་ལོ་སྟོང་ཕྲག་གི་སྔོན་ནས་བཟུང་རིམ་པར་བྱུང་བ་ཡིན་ལ།ཚད་གྲངས་དང་སྤུས་ཚད་གང་གི་ཐད་ནས་ཀྱང་།གནའ་དུས་རིག་གནས་སྒྱུ་རྩལ་དར་སོ་ཆེ་བའི་མི་རིགས་གཞན་དག་ལ་འགྲན་བཟོད་ཅིང་ཞན་སྐྱོན་ཟད་ཀྱང་མེད་ཅེས་སྨྲ་བར་སྤོབས།འོན་ཀྱང་དུས་རབས་བཅོ་བརྒྱད་བཅུ་དགུ་བའི་མཚམས་ནས་དེང་དུས་ཀྱི་ཚན་རིག་བཟོ་ལས་དང་མཉམ་དུ་དར་བའི་མི་དམངས་ཀྱི་འཚོ་འི་གནས་ཚུལ་རྗེན་སྟོན་བྱེད་པའི་དེང་དུས་རྩོམ་རིགས་ཕྱོགས་ལ་ངེད་ཅག་རྗེས་ལུས་ཡིན་པ་ཡང་ཁས་མི་ལེན་ཐབས་མེད་ཡིན། མི་དམངས་ཀྱི་འཚོ་བའི་གནས་སྟངས་དང་རེ་འདུན་མཚོན་པའི་སྒྱུ་རྩལ་རྩོམ་རིགས་ནི་མི་ལ་ལའི་ལྟ་ཚུལ་ལྟར་ཡོད་ཀྱང་རུང་མེད་ཀྱང་རུག་བའི་བྱ་བ་གལ་ཆུང་ཞིག་མིན་ལ།སྤྱི་ཚོགས་གོང་འཕེལ་དུ་འགྲོ་བ་དང་མི་མང་གི་བློ་རིག་དང་བསམ་པའི་དཔལ་ཡོན་ཡར་རྒྱས་སུ་འགྲོ་བའི་ཐབས་གལ་ཆེན་ཞིག་དང་།མི་རིགས་ཀྱི་བློ་རིག་སྒྱུ་རྩལ་གྱི་ཆུ་ཚད་མཚོན་པའི་རྟགས་མཚན་མངོན་གསལ་ཞིག་ཀྱང་ཡིན་པས་མིག་རྒྱངས་ཡོད་པའི་མི་སྣ་དང་སྤྱི་ཚོགས་ཡོངས་རྫོགས་ཀྱིས་མཐོང་ཆེན་བྱ་བར་འོས།ཉེ་ཆར་ལོ་འགའི་རིང་ལ་མདོ་དབུས་ཁམས་གསུམ་གྱི་ན་གཞོན་དང་དར་མའི་ཁྲོད་དུ་སྤྱི་ཚོགས་ཀྱི་གནས་སྟངས་དང་།མི་མང་གི་རར་འདུན་མཚོན་པའི་སྒྲུང་གཏམ་དང་།སྙན་ཚིག་རྩོམ་མཁན་མི་གྲངས་མི་ཉུང་བ་ཞིག་བྱུང་བས་བོད་རིགས་རང་གི་རྩོམ་པ་པོའི་རུ་ཁག་གསར་བ་ཞིག་རིམ་གྱིས་གཞི་ཆགས་ཤིང་ཉིན་རེ་བཞིན་དུ་ཤུགས་ཇེ་ཆེར་འགྲོ་བཞིན་ཡོད་པ་འདི་ནི་སྙིང་ནས་དགའ་བ་བསྐྱེད་འོས་པའི་དོན་ཆེན་ཞིག་རེད།འོན་ཀྱང་རྩོམ་པ་པོ་མང་ཤོས་ཤིག་ནི་གསར་དུ་རྩོམ་རིག་གི་ལམ་ལ་གོམ་པ་སྤོས་པ་དང་།རྩོམ་རིགས་གསར་བའི་རྩོམ་སྟངས་དང་ན་དོན་གཉིས་འཆར་ཚོད་བརྟག་བྱེད་པ་ལས་རང་ལ་ངེས་སྲོལ་ཞིག་ཆགས་མེད་པ་དང་།བོད་རང་གི་ཐུན་མོང་དང་ཐུན་ོང་མ་ཡིན་པའི་རིག་པའི་གཞུང་ལུསག་ཕྱོགས་ལ་ལྟ་རྒྱ་ཆུང་བ།བོད་སྤྱི་ཚོགས་ཀྱི་སྔོན་གྱི་ལོ་རྒྱུས་དང་།ད་ལྟའི་གནས་ཚུལ།མི་རིགས་རང་གི་ཐུན་མོང་མ་ཡིན་པའི་ཁྱད་ཆོས་སུ་གྲུབ་པའི་ལྟ་སྤྱོད་ཀྱི་ཁྱད་པར་དང་།ཡུལ་སྲོལ་གོམས་འདྲིས་འཚོ་བའི་གནས་སྟངས་སོགས་ལ་ཞིབ་འཇུག་མི་འདངས་པ་དང་།གནའ་དུས་དང་དེང་དུས་ཀྱི་རྩོམ་རིགས་སྒྱུ་རྩལ་ཕྱོགས་ཀྱི་རིག་པའི་གཞུང་ལུསག་སོགས་ལ་གོ་ཐོས་ཉུང་བ་དང་།རྩོམ་རིགས་སྒྱུ་རྩལ་གྱི་རྒྱུ་ཆའི་གཙོ་བོ་སྐད་ཡིག་གི་ཕྱོགས་ལ་བརྡར་བཅད་པ་མི་འདངས་པ་སོགས་ལས་ནང་དོན་གྱི་ཆ་ནས་ཆུ་འཁྱགས་པ་ལ་རྩམ་སྐྱ་བཞིན་དུ་ཟབ་ཁྱད་མི་འདངས་པ་དང་།སྒྱུ་རྩལ་གྱི་ཉམས་ཀྱི་ཆ་ནས་ཀློག་མཁན་རྣམས་ཀྱི་བློ་ངོར་བག་ཆགས་ཟབ་མོ་ཞོག་ཅིང་ཡིད་འགུལ་ཐེབས་པའི་ནུས་པ་མེད་པ་དང་།ཚིག་སྦྱོར་ཆ་ནས་སྦྱོར་བདེ་ཞིང་དོན་ལ་འབྱོར་ཚབས་ཆེ་བ་སོགས་ཀྱི་སྒྱུ་རྩལ་རྩོམ་གྱི་ཁྱད་ཆོས་ཐོན་མེད་པ་སོགས་ཀྱི་མཚོན་པའི་མི་འདངས་ས་འམ་སྐྱོན་ཆ་ཡང་མི་ཉུང་བ་ཞིག་ཡོད།ལམ་གསར་བར་གོམ་པ་སྤོས་པ་ད་ཚོད་བརྟག་བྱེད་པའི་གནས་སྐབས་ན་ཞན་ཆ་དང་སྐྱོན་ཆ་བྱུང་བ་ལ་ཡ་མཚན་རྒྱུ་དང་ཡ་ང་རྒྱུ་མེད་མོད་ཞན་ཆ་དང་སྐྱོན་ཆ་ངོས་ཟིན་ནས་འདོར་ཅི་ཐུབ་བྱེད་དགོས་ཏེ།སྒྱུ་རྩཀ་རིགས་ནི་མི་མང་གི་བསམ་པའི་ཟས་དད་སེམས་ཀྱི་སྨན་ཞེས་འཇིག་རྟེན་ན་རླུང་ལྟར་གྲགས་ཤིང་དོན་ལ་ཡང་དེ་ལྟར་གནས་པས།ཟས་དང་སྨན་ནི་གྲངས་མང་བ་ཙམ་གྱིས་མི་ཆོག་པཏ་ཟས་བཅུད་དང་རོ་ནུས་བཟང་དགོས་ལ།དེ་ཡང་ཟས་གཡོ་མཁན་མཁས་པ་དང་།སྨན་པ་མཁས་པས་བཟང་རུང་མི་རུང་དུག་ཡོད་མེད་ལུས་ལ་ཕན་མི་ཕན་སོགས་ཟས་དང་སྨན་གྱི་དངོས་པོའི་ནུས་པ་དང་བླང་དོར་ཤེས་པའི་ངོས་ནས་ཟས་སྨན་རོ་བཅུད་ནུས་པ་ཕུན་སུམ་ཚོགས་པར་སྦྱོར་ཞིང་།དེ་ལས་ལུས་ཟུངས་གསོ་བ་དང་ནད་སེལ་བའི་དགོས་པ་འགྲུབ་པར་བྱས་པ་ཡིན་ལ།གལ་ཏེ་ཟས་སྨན་གྱི་ནུས་པ་མི་ཤེས་ཤིང་བླང་དོར་མི་བྱེད་པར་ཤ་རིགས་འབྲུ་རིགས་རྩྭ་ལྡུམ་སོགས་ལག་ལ་གང་རྙེད་རྙེད་ཐམས་ཅད་ཟས་དང་སྨན་དུ་བྱས་ནས་ཚོང་རར་བཤམས་པ་དང་།གཞན་དག་ལ་བཟར་བཅུག་ནས་ཕན་པ་ལས་གནོད་པ་ཆེ་བ་བཞིན་དུ་བསམ་པའི་ཟས་དང་སེམས་ཀྱི་སྨན་གཡོས་སྦྱོར་བྱེད་པའི་རྩོམ་པ་རྣམས་ཀྱང་རྩོམ་གྱི་སྐྱོན་ཡོན་བླང་དོར་ཤེས་ནས་ལེགས་ཆ་སྤེལ་ཞིང་སྐྱོན་ཆ་བསལ་བའི་སྒོ་ནས་རྩོམ་སྤུས་ཇེ་ལེགས་སུ་གཏོང་བ་ཤིན་ཏུ་གལ་ཆེ་བར་སྣང་ལ།འདིར་གསར་རྩོམ་སྐོར་ལས་བྱུང་བའི་གནད་དོན་འགའ་ཞིག་གི་ཐད་ནས་རང་གི་ལྟ་ཚུལ་ཅུག་ཟད་གླེང་བར་བྱ་བ་ནི།
   དང་པོ།སྐད་ཡིག་ཕྱོགས་ཀྱི་གནད་དོནསྤྱིར་རྩོམ་རིགས་ལ།སྤྱིར་བཏང་གི་རྩོམ་རིགས་ད་སྒྱུ་རྩལ་རྩོམ་རིགས་ཏེ།ངོ་བོ་སྟེང་ནས་མི་འདྲ་བའི་རྩོམ་རིགས་གཉིས་ཡོད་ལ།དེ་གཉིས་ཀྱི་ཁྱད་པར་རྟོག་རིགས་དང་།བརྗོད་བྱའི་དོན་བདེན་བརྫུན་དང་།རྗོད་བྱེད་ཚིག་གི་ཉམས་འདོན་ཚུལ་སོགས་ཀྱི་སྟེང་ནས་ཕྱེ་བ་ཡིན་ལ།ཤེས་པས་དོན་སྤྱི་དང་སྒྲ་སྤྱི་འཛིན་པའི་ཚུལ་གྱིས་རྟོགས་པར་བྱེད་པའམ་དངོས་པོའི་སྤྱི་མཚན་འཛིན་པའི་ཚུལ་གྱིས་རྟོགས་པཏ་བྱེད་པ་དང་།དངོས་པོའི་གནས་ལུགས་ལ་སྒྲོ་སྐུར་མི་བྱེད་པར་བདེན་པར་བརྗོད་པ་དང་།ཚིག་གི་སྙན་ཆ་དང་མཛེས་ཆ་གཙོ་བོར་མི་བྱེད་པར་བརྗོད་བྱའི་དོན་གོ་བ་གཙོ་བོར་བྱེད་པའི་རྩོམ་རིགས་ལ་སྤྱིར་བཏང་གི་རྩོམ་རིགས་ཟེར་ཞིང་།མཚན་ཉིད་རིག་པའི་གཞུང་དང་འགྲེལ་བཤད།ཚན་རིག་རིག་གསན་ཀྱི་གཞུང་།ལོ་རྒྱུས།དེབ་ཐེར།ཆབ་སྲིད་ཀྱི་ཡིག་ཆ་ཟིན་བྲིས།  སྐུར་ཡིག  བྱས་རྗེས་དྲང་པོར་བརྗོད་པའི་རྣམ་ཐར་རྟོགས་བརྗོད་སོགས་སྤྱིར་བཏང་གི་རྩོམ་རིག་ཁོངས་སུ་གཏོགས་ཤིང་ཤེས་པས་མངོན་སུམ་གྱི་མྱོང་སྣང་ངམ།དངོས་པོའི་རང་མཚན་གྱི་ཁྱད་པར་འཛིན་པའི་ཚུལ་གྱིས་གནས་ཚུལ་ཞིག་མཚོན་ཕྱིར་རྟོག་བཏགས་ཅི་དགར་བརྗོད་པ་དང་།ཚིག་སྦྱོར་ཡང་གོ་དོན་བརྡ་འཕྲོད་ཐབས་ཙམ་མིན་པར་སྙན་ཞིང་རྣོ་བ།མཛེས་ཤིང་བརྗིད་ཆགས་པ་སོགས་སྒྱུ་རྩལ་གྱི་ཉམས་ཐོན་པ་གཙོ་བོར་བྱེད་པའི་རིགས་ལ་སྒྱུ་རྩལ་རྩོམ་རིགས་ཟེར་ཞིང་།སྙན་ཚིག  ཟློས་གར། སྒྲུང་དང་གཏམ་རྒྱུད། གླུ་གཞས་སོགས་དེའི་ཁོངས་སུ་བཏོགས་པ་ཡིན།དེ་ཡང་སྤྱིར་སྒྱུ་རྩལ་ཞེས་པ་ནི།རིག་འཕྲུལ་ལམ་དེ་ལས་བྱུང་བའི་མཛེས་སྡུག་གི་ཁྱད་ཆོས་དང་ལྡན་པའི་བཟོད་བཀོད་ཕུལ་བྱུང་བ་དང་ལུས་ངག་གི་ཉམས་འགྱུར་སོགས་ཀྱི་དོན་ཡིན་ལ།སྒྱུ་རྩལ་རྩོམ་རིགས་ཞེས་པ་ནི།ཚིག་སྦྱོར་སྟེང་གི་སྒྱུ་རྩལ་གྱི་ཉམས་དང་ལྡན་པའི་རྩོམ་རིགས་ཏེ།རི་མོ་ནི་ཚོན་གྱི་སྒྱུ་རྩལ་དང་།རོལ་མོ་ནི་སྒྲ་གདངས་ཀྱི་སྒྱུ་རྩལ་དང་།སྒྱུ་རྩལ་རྩོམ་རིགས་ནི་ཚིག་གི་སྒྱུ་རྩལ་ཞེས་འཛམ་གླིང་ན་རླུང་ལྟར་གྲགས་པའི་ཕྱིར་རོ།རྟགས་འཇུག་རྩ་བར།མིང་གི་ཁོངས་ནས་ཚིག་བྱུང་ནས།ཚིག་གིས་དོན་རྣམས་སྟོན་པར་བྱེད།ཅེས་པ་ལྟར།དངོས་པོའི་མིང་དང་མཚམས་སྦྱོར་གྱི་སྒྲ་འདུས་ལས་ཚིག་ཏུ་གྲུབ་ཅིང་།ཚིག་གིས་བརྗོད་བྱའི་དོན་སྟོན་པ་ཡིན་ལ།སྤྱིར་སྐད་ཀྱི་ཚིག་སྦྱོར་ལ་བྱེད་ལས་བརྗོད་དོན་གསལ་ལ་མ་ནོར་སྟོན་ཅིང་།དགོས་པ་གོ་བརྡ་འཕྲོད་པ་གཙོ་བོར་བྱེད་པའ་རིགས་ཤིག་དང་།བྱེད་ལས་བརྗོད་བྱ་གསལ་ལ་མ་ནོར་བར་སྟོན་པ་ཙམ་མིན་པར་དགའ་སྡུག་ཆགས་སྡང་སོགས་ཀྱི་ཉམས་འགྱུར་དང།སྙན་བརྗིད་མཛེས་སྡུག་གིབརོ་ནུས་ཚིག་གི་དངོས་ཟུར་ཅི་རིགས་སུ་ཐོན་ཅིང་།དགོས་པ་ཡིད་འགུལ་ཐེབས་ཤིང་སེམས་ཀྱི་འགྱུར་བ་བསྐྱེད་པ་གཙོ་བོར་བྱེད་པའི་རིགས་ཤིག་སྟེ།བྱེད་ལས་དང་དགོས་པ་མི་གཅིག་པའི་ཚིག་སྦྱོར་བྱེད་སྟངས་རིགས་ཡོད་པ་ཡིན།སྤྱིར་བཏང་གི་རྩོམ་རིགས་ལ་ཚིག་སྦྱོར་སྟེང་ནས་དོན་གྱི་གོ་བརྡ་འཕྲོད་པ་ཙམ་གྱིས་ཆོག་ཅིང་།སྒྱུ་རྩལ་རྩོམ་རིགས་ལ་དེ་ཙམ་ཞིག་གི་མ་ཆོག་པཏ་རྩོམ་ལྟ་མཁན་དང་།ཉན་མཁན་གྱི་བརྒྱུད་ལ་ཡིད་འགུལ་ཐེབས་ཤིང་།བདེ་སྡུག་གི་དགའ་སྐྱོའི་ཚོར་བ་སྐྱེད་པའི་ནུས་པ་ཞིག་ཐོན་དགོས་པ་ཡིན།གོ་བརྡ་འཕྲོད་པ་གཙོ་བོར་བྱེད་པའི་རྩོམ་རིགས་ལ་ཡང་མ་མཐའ་སྙན་ངག་གི་མེ་ལོང་དུ་བྱུང་བའི་དགོངས་པ་ཅན་གྱི་ཁྱད་ཆོས་བཞི་བོ་ཚང་དགོས་ཏེ།དེ་མ་ཚང་ན་སྤྱིར་བཏང་གི་རྩོམ་སྐྱོན་དུ་བརྩི་བ་ཡིན།ཁྱད་ཆོས་བཞི་བོ་དེ་གོ་བདེ་བར་བཤད་ན།

ཁྱད་ཆོས་དང་བོ་ནིསྨྱོན་པའི་གཏམ་ལྟར་རང་ཚིག་སྔ་ཕྱི་འགལ་བ་དང་ཕན་ཚུན་ལ་བརྗོད་དོན་གསལ་བར་བྱེད་པའི་ནུས་པ་ཡོད་པ་སྟེ།སྙན་ངག་མེ་ལོང་ལས།དངོས་པོ་ཡི་ནི་ཚིག་རྣམས་ཀུན།།ཕན་ཚུན་ཕན་པར་བྱེད་ཉིད་ཅན།།  ཞེས་བྱུང་།ཁྱད་ཆོས་གཉིས་པ་ནི།གླང་རྒན་འདམ་ལ་ཟུག་པ་ལྟ་བུ་རྫབ་རྫོབ་མ་ཡིན་པར།མི་དགོས་པའི་ཚིག་ཉོག་སྤངས་ཤིང་།དོན་འདུས་ངོས་གཙང་དགོས་པ་སྟེ།དོན་དང་བྲལ་བའི་ཁྱད་པར་རྣམས།མ་བྱས་ཞེས་བྱུང་།ཁྱད་ཆོས་གསུམ་པ་ནི།ལུས་ཀྱི་ཚད་དང་བསྟུན་ནས་ལྭ་པ་བཟོས་པ་ལྟ་བུའམ་མདའ་མཁན་མཁས་པའི་དའ་མོ།གཟས་སའི་གནད་ལ་ཕོགས་པ་བཞིན་དུ་དོན་ལ་བསྙེགས་པའམ།ངེས་པ་སྟེར་ཚབས་ཆེ་བ་དགོས་པ་སྟེ་གནས་སུ་བསྔགས་པ་དང་།ཞེས་བྱུང་།ཁྱད་ཆོས་བཞི་པ་ནི། སེང་རས་ཀྱིས་གཡོགས་པའི་མཛེས་པའི་གདོང་དང་།སྨུག་པའི་གསེབ་ཀྱི་ཡུལ་ལྗོངས་ལྟ་བུ་མིན་པར་རྫ་ཆུ་དྭངས་མོའི་ཞབས་ཀྱི་རྡེའུ་དཀར་ནག་གསལ་ལེར་མཐོང་བ་བཞིན་དུ་ཚིག་ཁ་གསལ་ཞིང་དོན་གོ་བདེ་བ་དགོས་ཏེ།བརྗོད་རིམ་སྟོབས་ལས་དངོས་པོ་ནི།ཟབ་མོ་དག་ཀྱང་གསལ་བ་སྟེ།ཞེས་བྱུང་ངོ་།སྒྱུ་རྩལ་རྩོམ་རིགས་ལ་ཁྱད་ཆོས་བཞི་པོ་འདི་ཚང་གཞིར་བཞག་གི་སྟེང་ནས་ཡིད་འགུལ་ཐེབས་ཤིང་སེམས་ཀྱི་འགྱུར་བ་བསྐྱེད་པའི་སྙན་བརྗིད་མཛེས་སྡུག་གི་ཉམས་དང་ནུས་པ་ཐོན་པར་བྱེད་དགོས།ཚིག་ཉམས་དང་དོན་ཉམས་འདོན་ཚུལ་ལ་ཡང་ད་ཎ་ཌའི་སྙན་ཚིག་རིག་པའི་གཞུང་ལས་བྱུང་བ་དང་།དམངས་ཁྲོད་ཀྱི་སྒྲུང་གཏམ།གླུ་གཞས།ཤགས།ཁ་མཚར་སོགས་ཀྱི་མཚོན་པའི་རང་སྐད་ཀྱི་སྟེང་དུ་ཆགས་པའི་ངོ་མཚར་ཡིད་དུ་འོང་བའི་ཚིག་གི་ཉམས་དང་།མི་རིགས་གཞན་དང་རྒྱལ་ཁབ་གཞན་གྱི་སྐད་དང་རྩོམ་རིགས་ལས་བྱུང་བའི་རོ་ནུས་ཕུལ་དུ་བྱུང་བའི་ཚིག་རྒྱན་སྦྱོར་ཚུལ་སོགས་མང་དུ་ཡོད་ལ།སྒྱུ་རྩལ་རྩོམ་་པོ་བཟང་བོ་བྱེད་ཤེས་པ་ཞིག་ངེས་པར་དགོས་ཏེ།ཚིག་གི་སྡེབ་སྦྱོར་འབྱོར་མོ་ཞིག་མ་འབྱོར་ཞིག་མ་འཁྱོངས་ན་ཚོན་གྱིས་སྡེབ་སྦྱོར་མི་ཤེས་པས་ཐང་ག་བཞེངས་བ་དང་།དབྱངས་ཀྱི་འདེགས་འཇོག་མི་ཤེས་པའི་པས་གླུ་ལེན་པ་དང་ཁྱད་པར་མེད་དོ།དེ་ཡང་རྩོམ་རིགས་ཀྱི་གཞུང་དང་ཚིག་རྒྱན་རིག་པའི་གཞུང་ཤེས་པ་ཙམ་གྱིས་མི་ཆོག་པར་རྩོམ་གྱི་ལག་ལེན་ལ་སྦྱོར་ཤེས་པ་དགོས།རྩོམ་འབྲི་བའི་སྐབས་སུ་ཡང་ཚིག་རྒྱན་གྱི་ཁྱད་ཆོས་ཐོན་པ་ཙམ་ལ་དམིགས་ནས་བརྗོད་བྱ་གང་འགབ་རེ་འཇོག་པའི་སྙན་ངག་གི་རྩོམ་རྒྱུག་འབུལ་བ་ལྟ་བུ་མིན་པར།བརྗོད་བྱ་གཙོ་བོར་བྱས་ནས་དེའི་དོན་སྟོན་པའི་དགོས་མཁོ་དང་བསྟུན་ནས་ཉམས་ཁྱད་མཚར་ཐོན་པའི་ཚིག་དང་ཚིག་རྒྱན་བཙལ་དགོས།དེ་ཡང་འཇིག་རྟེན་ཕོ་མོ་དང་།ལུས་བོང་ཆེ་ཆུང་དང་།ལོ་ན་རྒན་གཞོན།ཤ་མདོག་དཀར་སྨུག་སོགས་དང་བསྟུན་ནས་གང་ལ་གང་འཚམས་ཀྱི་གོས་རྒྱན་སྤྲས་པ་བཞིན་དུ་ཚིག་དང་ཚིག་རྒྱན་ཡང་བརྗོད་བྱའི་ནང་དོན་དང་འཚམ་པར་སྦྱོར་བ་གལ་ཆེ་ཞིང་།དེ་ལྟ་མིན་ན་སྤྲང་མོ་རྒྱལ་པོའི་བཙུན་མོར་གྱུར་ནས་གཟབ་སྤྲས་བྱེད་པ་བཞིན་གོས་རྒྱན་རིན་ཐང་གང་ཆེ་དང་།གོས་ཀྱི་སྟེང་དུ་གོས་དང་།རྒྱན་གྱི་སྟེང་དུ་རྒྱན་བརྩེགས་ན་དར་ཟབ་དང་རིན་ཆེན་རྒྱན་ཆ་བཤམས་སྟོན་བྱས་པ་ལྟ་བུར་གྱུར་ནས་ལུས་ཀྱི་མཛེས་སྡུག་སྒྲིབ་པའི་ཚུལ་ལས་མ་འདས་སོ།

  སྔོན་དུས་རྒྱ་གར་གྱི་ཡུལ་ཆོས་དང་།དེང་སང་ཕྱི་གླིང་ན་དར་ཆེ་ཞིང་རྒྱལ་ཁབ་ནང་ཁུལ་ཏུ་ཡང་རིམ་གྱིས་དར་གྱིན་ཡོད་པའི་བུད་མེད་ཀྱི་གོས་རྒྱན་རྒྱན་སྤྲས་སྟངས།གོས་སྲབས་ཅིང་ལུས་དབྱིབས་ཀྱི་ཁྱད་པར་གསལ་བར་མངོན་པ་དང་།རྒྱན་ཉུང་ཟད་ཅིག་ལས་མི་འདོགས་པས་ལུས་ཀྱི་ལྷན་སྐྱེས་ཀྱི་མཛེས་སྡུག་གི་ཁྱད་ཆོས་མངོན་གསལ་དུ་མཐོང་བའི་ཚུལ་འདིས་རྩོམ་ཉམས་འདོན་ཚུལ་དང་ཚིག་རྒྱན་སྦྱོར་ཚུལ་ཡང་རིག་སྒོ་མི་འདྲ་བ་ཞིག་བཏོད་ཡོད་དེ།འཇིག་རྟེན་ན་གྲགས་ཤིང་རབ་ཏུ་གསལ་བར་བརྗོད་པ་ནི་སངས་རྒྱས་ཀྱི་གསུང་དབྱངས་ཡན་ལག་དྲུག་ཅུའི་ཡ་གྱལ་གཅིག་ཏུ་བརྩིའོ།།རྩོམ་རིགས་གང་ཡིན་ཡང་སྨྲ་བརྗོད་ཀྱི་ཚིག་ལས་གྲུབ་པ་ཡིན་ལ་ཚིག་སྦྱོར་བྱེད་སྟངས་ཤེས་དགོས་ན།སྐད་ཡིག་གི་གཞི་རྩ་བཟང་ཙམ་ཞིག་འཆགས་དགོས།དེ་ཡང་སྐད་ཀྱི་དབང་དུ་བཏང་ན་མི་རིགས་ཐུན་མོང་གི་སྤྱི་སྐད་དང་།བྱེ་བྲག་པའི་ཡུལ་སྐད་གཉིས་ཡོད་ལ་སྤྱི་སྐད་ནི་སྐད་རིགས་གང་ཡིན་ཀྱང་ཐོག་མར་ཁྱབ་ཆེ་བའི་ཡུལ་སྐད་ཅིག་གཞིར་བཟུང་ནས་ཡི་གརར་བཏབ་ཅིང་།སྲིད་དོན།ཚོང་ལས་ཆོས་ལུགས་རིག་གནས་སོགས་ཀྱི་སྟེང་དུ་ཡུན་རིང་པོར་བེང་སྤྱད་ནས་ཁྱབ་ཆེ་བར་སོང་ཞིང་སྐད་ཡིག་དེའི་ས་ཁོངས་སུ་ཡུལ་གྱི་ཁྱད་པར་མེད་པར་ཕན་ཚུན་ལ་བརྡ་འཕྲོད་པའི་སྐད་ཆ་ཞིག་ཡིན་ལ།ཡུལ་སྐད་ཅེས་པ་ནི་ས་ཆ་སོ་སོའི་རྒྱུན་སྤྱོད་ཀྱི་ཁ་སྐད་ཀྱི་མིང་ཡིན།དེ་ཡང་ཡུལ་དུས་ཀྱི་དབང་གིས་མིང་ཚིག་གི་སྒྲ་གདངས་སྟེང་ནས་ཁྱད་ཤོར་བ་མ་གཏོགས།བརྡའི་མིང་གཞི་དང་།ཚིག་སྦྱོར་བྱེད་ཚུལ་གྱི་བརྡ་སྤྲོད་རྣམ་གཞག་སྟེང་ནས་སྐད་རིགས་གཅིག་གི་ཡུལ་སྐད་ཕན་ཚུན་ཁྱད་པར་ཡོད་པ་མིན་ནོ།།


    རྩོམ་གྱི་ནང་དུ་ངེས་པར་ཐུན་མོང་གི་དུ་བེད་སྤྱོད་པའི་སྤྱི་སྐད་དམ་ཡིག་སྐད་ཚད་ལྡན་དེ་བཀོལ་དགོས་ཤིང་གལ་ཏེ་ཡུལ་སྐད་ཀྱིས་བྲིས་པའམ།ཡུལ་སྐད་བསྲེས་མང་ན་ཡུལ་དེའི་མི་ལས་ཡུལ་གཞན་གྱི་མི་རྣམས་ཀྱིས་མི་གོ་བས་སྤྱི་ཚོགས་ལ་ཕན་འདོགས་ཕུལ་ཆུང་ངོ་།དེང་སང་མི་ལ་ལས་ཡིག་སྐད་ནི་ཁ་སྐད་དང་བར་ཐག་རིང་ཞིང་མང་མང་གིས་མི་གོ་བས་ཁ་སྐད་ལྟར་འབྲི་དགོས་ཟེར།།དེ་ནི་ཡི་གེ་དང་ཁ་སྐད་གཉིས་ཀྱི་རང་རང་གི་ཁྱད་ཆོས་དང་འགལ་འབྲེལ་སོགས་ལ་དཔྱད་པ་མ་ཞུགས་པའི་གཏམ་ཡིན་ལ།ཡིག་སྐད་དང་ཁ་སྐད་ལ་ཁྱད་པར་ཡོད་པ་ཡང་ཤིན་ཏུ་བདེན།ཁྱད་པར་ཡོད་ས་དང་མདོར་བསྡུས་ན་གསུམ་སྟེ།དང་པོ།ཡིག་ངོའི་སྒྲ་དང་ཡུལ་སྐད་ཀྱི་སྒྲའི་ཁྱད་པར།གཉིས་པ།ཐ་སྙད་མང་ཉུང་གི་ཁྱད་པར།གསུམ་པ།བཟོ་བཅོས་བྱས་མ་བྱས་ཀྱི་ཁྱད་པར་རོ།དང་པོ།ཡིག་སྐད་དང་ཁ་སྐད་གཉིས་སྒྲ་མི་འདྲ་ས་ཡོད་པ་དེ་བོད་ཡིག་ཁོ་ནའི་སྐྱོན་མིན་ལ།དབྱིན་ཇི་དང་ཨུ་རུ་སུ་སོགས་ཀྱི་སྦྱོར་ཀློག་ཅན་གྱི་ཡིག་རིགས་ཕལ་ཆེར་ལ་གནས་ཚུལ་དེ་འདྲ་ཡོད།དེའི་རྒྱུ་མཚན་ཡང་ཁ་སྐད་ཀྱི་སྒྲ་གདངས་ནི་ཡུལ་དུས་ཀྱི་དབང་གིས་འགྱུར་སླ་ཞིང་།ཡིག་གཟུགས་ཀྱི་སྡེབ་སྦྱོར་ནི་གོམས་གཤིས་ཀྱི་རྣམ་གཞག་གཏན་ཆགས་ཤིག་ལ་བརྟེན་དགོས་པས་ཡུལ་དུས་ཀྱི་སྒྲ་གདངས་ལྟར་འགྱུར་ཆེ་ན་གོམས་གཤིས་ཀྱི་རྣམ་གཞག་ཞིག་ནས་བརྡ་སྤྲོད་པའི་ནུས་པ་ཉམས་འགྲོ་བ་ལས་འོས་མེད་དོ།དེའི་གནད་ཀྱིས་ཁ་སྐད་ཀྱི་སྒྲ་ཇི་ལྟར་འགྱུར་ཡང་ཡི་གེའི་སྡེབ་སྦྱོར་ལ་གཏན་ཆགས་རང་བཞིན་ཞིག་དགོས་པ་ཡིན།དེང་སང་གི་དབྱིན་ཇིའི་སྐད་དང་དབྱིན་ཡིག་གི་སྡེབ་སྦྱོར་གྱིས་མཚོན་པའི་སྒྲ་གདངས་མི་འདྲ་ས་ཤིན་ཏུ་མང་བ་ཡང་ཡིག་གཟུགས་ཀྱི་སྡེབ་སྦྱོར་མ་བསྒྱུར་བར་གནའ་སྲོལ་ལྟར་བྱེད་པའི་རྒྱུ་མཚན་ཁྱད་པར་ཅན་དེ་འདྲ་ཞིག་ལ་ཐུག་ཡོད་པ་ཡིན།

   གཉིས་པ་ནི།ཁ་སྐད་ལ་འཚོ་བར་མཁོ་བའི་ཐ་སྙད་ཉུང་ཤས་ཤིག་མེད་ལ།ཡིག་ངོར་རིག་གནས་ཇི་ལྟར་དར་ཆེ་ན་ཐ་སྙད་ཡང་དེའི་ཚོད་ཀྱིས་མང་བ་ཡིན།རིག་གནས་ཀྱི་ཐ་སྙད་མང་པོ་སྦྱངས་པ་མ་བྱས་པའི་མི་དམངས་ཀྱི་ཕལ་ཆེར་གྱིས་མི་ཤེས་པར་མ་ཟད།མཁས་པ་རྣམས་ཀྱང་རངལ་རྒྱུས་མེད་པའི་རིག་གནས་ཕྱོགས་ཀྱི་ཐ་སྙད་དེ་དག་ག་ལ་ཤེས།དེ་ཡང་ཡིག་སྐད་དང་ཁ་སྐད་མི་འདྲ་ས་ཞིག་ཡིན།གསུམ་པ་ནི།གདོད་མའི་རྣམ་པར་གནས་པའི་མང་མང་གི་ཁ་སྐད་དང་མཁས་པ་རྣམས་ཀྱིས་ཞིབ་ཚགས་བྱས་པའི་ཡིག་སྐད་ཀྱི་ཁྱད་པར་ཏེ།སྔ་མ་ནི་བཞུ་བཏུལ་མ་བྱས་ཤིང་།དྭངས་སྙིགས་མ་ཕྱེ་བའི་གསེར་བྱེ་ལྟ་བུ་དང་།ཕྱི་མ་ནི་གསེར་མགར་གྱི་ལག་རྩལ་ལས་བྱུང་བའི་གསེར་གྱི་བཅའ་ལག་ལྟ་བུ་དང་།དེ་གཉིས་ཁྱད་པར་ཡོད་ཀྱང་དམངས་ཁྲོད་དུ་ཡི་གེ་དང་རིག་གནས་ཁྱབ་གདལ་དུ་སྤེལ་ཏེ་མང་མང་གི་ཁ་སྐད་ཀྱི་ཆུ་ཚོད་ཇེ་མཐོར་གཏོང་བ་ལས།ཡིག་སྐད་ཀྱི་ཆུ་ཚད་མར་ཕབ་ནས་ཁ་སྐད་དང་བསྟུན་དགོས་པ་ཞིག་ག་ལ་ཡིན།དེ་འདྲ་མིན་པར་མ་ཟད།སྒྱུ་རྩལ་རྩོམ་རིགས་ཀྱི་སྐད་ཆ་ནི་སྤྱི་བཏང་གི་རྩོམ་རིགས་ལུས་ཀྱང་གྲིམས་ཤ་ཆེ་ཞིང་།ངོས་གཙང་བ།མཛེས་ཉམས་དང་རྣོ་དབལ་ཆེ་བ་སོགས་སྒྱུ་རྩལ་གྱི་ཁྱད་ཆོས་མང་པོ་ཞིག་ཚང་དགོས་པ་ཡིན།དེ་ཡང་ཡི་གེ་ནི་གོམས་གཤིས་ཀྱི་རྣམ་གཞག་ལ་བརྟེན་དགོས་ཏེ།ཡིག་ངོའི་མིང་ཚིག་གི་སྡེབ་སྦྱོར་བྱེད་སྟངས་གོམས་གཤིས་སུ་ཆགས་པ་དེ་དོར་ནས་ཡུལ་སྐད་རེ་ཟུང་དང་བསྟུན་ཁུལ་བྱས་ནས་ཁ་ལ་གང་ཡོང་ལག་ལ་ཅི་ཐེབས་བྲིས་ན།ཡིག་ལོང་ཕར་ཞོག་མཁས་པ་རྣམས་ཀྱང་མི་གོ་བས་རྩོམ་རིགས་དེ་ལ་རིན་ཐང་ཅི་ཡོད་གནམ་སྔོན་པོས་ཤེས།དེད་སང་གི་རྩོམ་རིགས་ནང་དུ་ཡི་གེ་ལ་དག་ཆ་མེད་པ་དང་ཚིག་སྦྱོར་སྟངས་བོད་སྐད་དང་མི་མཐུན་པ་དང་ཡུལ་སྐད་ཉ་ཉོག་བསྲེས་པ་མང་དུ་ཡོད་པས་ནང་དོན་ཅུང་ཟད་ལེགས་པའི་རིགས་ཀྱིའང་རིན་ཐང་ཆེ་ཆེར་བཅག་འདུག་གོ། 

    འོ་ན་རྩོམ་གྱི་ནང་དུ་ཡུལ་སྐད་གཏན་ནས་བཀོལ་མི་རུང་མ་ཞེ་ན།དེ་ཡང་མིན་ཏེ་ཡུལ་སྐད་ནང་ན་རིན་ཐང་ཡོད་པའི་བརྡ་གསར་རྙིང་མང་དུ་ཡོད།སྔོན་གྱི་གསུང་རྩོམ་དང་དག་ཡིག་ནང་ན་མེད་ཀྱང་དོན་སྟོན་པ་ལ་ཉེ་བར་མཁོ་པའི་མིང་ཚིག་ཡུལ་སྐད་ལ་ཡོད་ན་ཡུལ་སྐད་ལས་བླངས་ཏར་ཁ་གསབ་བྱེད་པ་འཇིག་རྟེན་སྤྱིའི་འགྲོ་ལུགས་ཡིན།དེ་འདྲ་སྔོན་གྱི་ཚད་ལྡན་མཁས་པའི་གསུང་ན་ཡང་མང་དུ་ཡོད།དཔེར་ན་རྡོ་སྤིས་དགེ་བཤེས་རིན་པོ་ཆེའི་གསུང་རྩོམ་ནང་ན་ང་ལ་ངི་དང་ངེ་ཞེས་བྲིས་ཡོད་པ་ཡང་ཡོད་དེ།ལྕང་ལོ་ཅན་གུང་སྐུ་ཕྱོགས་ལ་གནང་བའི་ཡི་གེ་སྟེ།ངི་གཉིས་ཚེ་འདིར་མཇལ་བར་མ་གྱུར་ན།།ངུ་བ་སྤངས་པའི་བདེ་ལྡན་རྫོངས་ཤིག་ནས།། ངེ་ཁྱོད་མེད་པར་བརྩེ་བའི་མཛའ་གྲོགས་སུ།།ངོ་ཤེས་བཞིན་དུ་འཕྲད་པའི་སྨོན་ལམ་འདེབས།།ངོ་ངེ་བརྡ་དག་འདི་འདྲ་ཡོད་མོད་ཀྱང་།།ངུ་ངག་སྐྱོང་བའི་བྱིས་པས་ག་ལ་ཤེས།།ངེ་རང་ལྟ་བུར་གཞུང་མང་ལྟོས་ཤིག་དང་།།པོ་ཏི་བརྒྱ་སྟོང་སྙིང་ལ་ས་ལེར་འཆར།།ངི་ནི་ཡུལ་གྱི་བྱེ་བྲག་འགའ་ན་ཡོད།།ངུ་ནི་བོད་རིགས་ཀུན་ལ་ཐུན་མོག་སྟེ།།ངེ་ཡང་སྒྲ་རྒྱན་མང་པོར་སྣང་ངོ་ཞེས།།ངོ་ཤེས་ནང་མར་དངོས་མའི་གསང་གཏམ་བསྒྲགས།།ཞེས་པ་ལྟ་བུ་དང་གཞན་ཡང་།ཞང་སྟོན་བསྟན་པ་རྒྱ་མཚོའི་གསུང་རྩོམ་དང་།ཞབས་དཀར་ཚོགས་དྲུག་རང་གྲོལ་གྱི་མགུར་གླུ་སོགས་ཀྱི་མང་ན་ཡང་གོ་བདེ་ཞིང་དོན་ལ་འབྱོར་ཚབས་ཆེ་བའི་ཕལ་སྐད་ཡུལ་སྐད་མང་དུ་ཡོད།འོན་ཀྱང་ཕལ་སྐད་ཡུལ་སྐད་ཀྱི་ཐ་སྙད་ཡི་གེར་འདེབས་ཚེ་སྒྲ་གདངས་ལ་ཞིབ་ཏུ་བརྟགས་ནས་བརྡ་སྤྲོད་ཡི་གེའི་རྣམ་གཞག་དང་མི་འགལ་བ་ཞིག་བྱེད་དགོས་ཤིང་།ཡུལ་ལུང་ཁ་ཤས་ཀྱི་སྒྲ་འདོན་སྟངས་དང་བསྟུན་ནས་རང་འདོད་དུ་འབྲི་མི་རུང་།ལྷག་པར་ཡོད་པ་རེད་དང་།ཡིན་སྟབས་ལྟ་བུ་ཡིག་སྐད་ལ་ཡོད་བཞིན་དུ་ཡུལ་སྐད་ལ་བསྟུན་ནས་ཡོག་རེད་དང་།ཡིན་ཙང་ལྟ་བུའི་བརྡ་ལོག་དེ་འདྲ་སྤེལ་བ་ལ་དགོས་པ་ཡོད་པར་མ་མཐོང་ངོ་།གལ་ཏེ་ཡུལ་ལུང་སོ་སོའི་མི་རྣས་ཀྱི་རང་མཚན་གྱི་ཁྱད་ཆོས་མཚོན་ཕྱིར་ཡུལ་ལུང་གི་ཐ་སྙད་ཚིག་སྐྱག་བཀོལ་ན་ཡང་།མཇུག་མཆན་འགོད་པའི་ཐབས་ལ་བརྟེན་ནས་མང་མང་ལ་གོ་བརྡ་འཕྲོད་པར་བྱེད་དགོས།སྤྱི་ཚོགས་འཕེལ་རྒྱས་སུ་དངོས་རྫས་གསར་བ་མང་དུ་བྱུང་བ་དང་།ཚན་རིག་རིག་གནས་གསར་བ་སྔོན་ཆད་མཐོང་ཐོས་ཀྱི་ཡུལ་དུ་མ་གྱུར་པ་གྲངས་ལས་འདས་པ་ཞིག་བྱུང་བར་བརྟེན།སྤྱི་ཚོགས་ཀྱི་འཚོ་བའི་ཁྱབ་ཁོངས་སུ་དགོས་དབང་གི་ཐ་སྙད་གསར་བ་མང་པོ་ཞིག་བཀོལ་དགོསཔ་བྱུང་།ཉེ་ལམ་ལོ་ངོ་སུམ་ཅུ་ལྷག་གི་རིང་ལ་བོད་སྐད་ཀྱི་ཐ་སྙད་གསར་བ་རྒྱལ་ཁབ་ཀྱི་ཕྱི་ནང་ཀུན་ཏུ་གསར་བཟོ་གསར་བསྒྱུར་མང་དུ་བྱུང་ཞིང་།དེའི་ནང་དོན་ལ་འབྱོར་ཚབས་ཆེ་ཞིང་།བོད་སྐད་ཀྱི་མིང་ཚིག་གྲུབ་ཚུལ་གྱི་རྣམ་གཞག་དང་མི་མཐུན་ཞིང་།བསྒྱུར་བྱའི་གོ་དོན་ཇི་ལྟ་བ་བཞིན་དུ་ཐོན་མེད་པའམ་འགྱུར་ལོག་ཏུ་གྱུར་པ་དང་།གཞན་སྐད་ཐད་འགྱུར་ངན་ཤན་ཤོར་བ་དང་།རང་སྐད་ཀྱི་སྟེང་དུ་མཚོན་ནུས་བཞིན་དུ་གཞན་སྐད་ཀྱི་སྒྲ་བསྲ་མ་བསྲེ་བྱས་པ་དང་།ས་མིང་མི་མིང་ཚན་རིག་འཕྲུལ་འཁོར་སོགས་ཀྱི་མིང་ཕྱི་རྒྱལ་གྱི་སྐད་ཇི་ལྟ་བ་བཞིན་དུ་བོད་ཡིག་གིས་མཚོན་ཐུབ་བཞིན་དུ།ཕྱི་ཡིག་གི་བརྡ་ལོག་པའི་རྒྱ་སྐད་ལྟར་ཚིག་ལོག་བརྡ་ལོག་སྤེལ་བ་སོགས་ཉོག་རྫོབ་ཤིན་ཏུ་མང་བས།རྩོམ་པ་བ་རྣམས་ནས་མིང་ཚིག་གསར་བ་བེད་སྤྱོད་དུས་བརྟག་དཔྱད་འདོར་ལེན་མ་བྱས་པར་ཐ་སྙད་གསར་བའི་ཚིག་མཛོད་དང་།བསྒྱུར་རྩོམ་ཉག་ཉོག གསར་ཐོས་ཚགས་དཔར་སོགས་ཀྱི་སྟེང་དུ་རིག་ཚད་རྩོམ་ཁྲོད་དུ་བཞག་ན།རྩོམ་སྐད་ཚད་ལྡན་དུ་འགྱུར་བའི་ཕྱོགས་ལ་གནོད་པར་གོར་མ་ཆག དེའི་སྟབས་ཀྱི་རྩོམ་འབྲིའ་བའི་སྔོན་ལ།སྐད་ཡིག་ཕྱོགས་ཀྱི་རྩ་བའི་ཤེས་བྱ་སུམ་རྟགས་དག་གསུམ།སྙན་ངག་རྩོམ་གཞུང་སོགས་ལ་བརྡར་ཤ་བཅད་ཅིང་།ཡིག་སྐྱོན་ཚིག་སྐྱོན་མི་འབྱུང་བ་ཞིག་མ་མཐའ་བྱ་དགོས།ཆ་རྐྱེན་དེ་མ་འཚགས་ན་རེ་ཞིག་ཕྱོགས་དེར་འབད་པ་ལས་ཆ་རྐྱེན་མེད་པར་རྣམ་རྒྱལ་ཁང་བཟང་འཕིབ་པའི་ལས་ལ་འཇུག་པར་བྱའོ།།

             ཟླ་ཟེར་ལོ་འཁོར་༢༠དཔེ་ཚོགས་ལས་དཔྱད་རྩོམ་དོན་གཉེེར་ཡིད་ཀྱི་དགའ་སྟོན་ལས་བཤུས།

རྩོམ་ཡིག་ཕབ་བཤུ་བ། སྐབས་བཅུ་བདུན་པའི་མཐར་ཕྱིན་སློབ་མ་སེར་སྐོར་འཇམ་ཚེ་ཡིན།


 རྩོམ་སྒྲིག་འགན་འཁུར་བ།  ཁཱ་ཤེས་རབ་རྒྱ་མཚོ།  མགར་ཉི་ཟེར། བན་ཤུལ་འཇམ་དབྱངས། ཨ་བུ་འབྲོང་།

རྩོམ་སྒྲིག་པ།:   འབའ་སྣང་གྲོལ། སྤེལ་དུས:   2015-11-03 ལྟ་ཀློག (6223)