རྗེ་ཙོང་ཁ་པར་ཕུལ་བའི་འགྱོད་ཚངས་སྙན་ངག
ས་སྐྱའི་མཁས་པ་ཆེན་པོ་སྟག་ཚང་ལོ་ཙཱ་བ།
དཔག་ཡས་ཚོགས་གཉིས་ཀུན་གྱི་རྩེ་མོར་སོན།།
བགྲང་ཡས་རྒྱལ་བ་ཀུན་གྱི་རིང་ལུགས་འཛིན།།
མཐའ་ཡས་འགྲོ་བ་ཀུན་གྱི་དགེ་བའི་བཤེས།།
བསམ་ཡས་ཡོན་ཏན་ཀུན་གྱི་གཏེར་ལ་འདུད།།
གངས་ཅན་ཤར་ཕྱོགས་ཙོང་ཁའི་སྐྱེད་ཚལ་དུ།།
དལ་འབྱོར་ཡོངས་འདུའི་རྩ་བ་རབ་བརྟན་ཅིང༌།།
ཡོན་ཏན་ཡལ་གས་ཕྱོགས་ཀྱི་འཇལ་པ།།
སྙན་གྲགས་དྲི་བསུང་འཕྲོ་བ་ཁྱོད་ལ་འདུད།།
དྲི་མེད་མཁྱེན་ཡངས་འཇིགས་བྲལ་གཞོན་བློ་སོགས།།
གངས་ཅན་མཁས་པའི་མཁས་པ་ཀུན་བསྟེན་ནས།།
སྤྱི་དང་ཁྱད་པར་གཞུང་ལུགས་མཐའ་དག་ལ།།
རྨོངས་པའི་མུན་ཀུན་སྤངས་པ་ཁྱོད་ལ་འདུད།།
རྙོག་བྲལ་ཚུལ་ཁྲིམས་བརྟུལ་ཞུགས་རྒྱ་མཚོ་ཆེ།།
མང་ཐོས་ལུང་རིགས་ནོར་བུས་ལྷག་པར་གཏམས།།
མཁས་མཆོག་ཀླུ་དབང་ཀུན་གྱིས་གུས་པས་བསྟེན།།
རྣམ་དཔྱོད་གཏིང་མཐའ་མེད་ལ་གསོལ་བ་འདེབས།།
ཁྱོད་བློའི་ཉི་མ་གཞོན་ནུའི་དུས་ཀྱི་ཚེ།།
མདོ་དང་རྒྱན་གྱི་པད་ཚལ་རྒྱས་མཐོང་ནས།།
བདག་བློ་ཁེངས་པའི་ཀུ་མུད་ལྷག་པར་ཟུམ།།
ཟབ་ཡངས་མཁྱེན་པའི་གཏེར་ལ་གསོལ་བ་འདེབས།།
བྱང་ཕྱོགས་འདི་ན་ཚིག་ཙམ་བྱང་བའང་དཀོན།།
དོན་ལ་སྒྲོ་འདོགས་ཆོད་པ་དེ་བས་དཀོན།།
བསྟན་དོན་ཉམས་སུ་ལེན་པ་སྲིད་མཐའ་ཙམ།།
འདི་གསུམ་མཐར་ཕྱིན་ཁྱོད་ལ་སྙིང་ནས་འདུད།།
ལ་ལ་རིགས་བྲལ་ལུང་གི་གྲུབ་མཐའ་འཇོག།
ཁ་ཅིག་ལུང་བྲལ་རིགས་པ་ལྟར་སྣང་རྩོམ།།
ལུང་རིགས་གཉིས་ཀས་རྒྱལ་བའི་གསུང་རབ་ཀུན།།
ལེགས་པར་འབྱེད་པ་ཁྱོད་ལ་སྙིང་ནས་འདུད།།
ཁ་ཅིག་འདུལ་བ་གཙོར་བྱས་གསང་སྔགས་སྤོང༌།།
གཞན་དག་སྔགས་ལ་མོས་བློས་འདུལ་བ་འགོག།
རྒྱལ་བའི་བསྟན་པ་མཐའ་དག་འགལ་མེད་དུ།།
རྫོགས་པར་ཉམས་སུ་ལེན་མཁས་ཁྱོད་ལ་འདུད།།
མཚན་ཉིད་མཆོག་བཟུང་གསང་སྔགས་ཟ་ཆོས་དང༌།།
སྔགས་ཀྱིས་ཁེངས་ནས་མཚན་ཉིད་ཁ་བཤད་ཙམ།།
མདོ་སྔགས་མཐའ་དག་མ་ཚང་རྫོགས་བྱང་དུ།།
བགྲོད་ཐབས་མེད་པར་གཟིགས་པ་ཁྱོད་ལ་འདུད།།
ལ་ལ་སྤྱོད་པ་ཞིབ་མོས་ལྟ་བ་འགོག།
ཁ་ཅིག་ལྟ་བ་མཐོན་པོས་སྤྱོད་པ་འདོར།།
ལྟ་སྤྱོད་ཕན་ཚུན་གྲོགས་སུ་ཤར་བ་ཡི།།
དོན་འདི་ལྷག་པར་འདོམས་པ་ཁྱོད་ལ་འདུད།།
འགའ་ཞིག་བཤད་པ་གཙོར་བྱེད་སྒོམ་ལ་སྨོད།།
ལ་ལ་སྒོམ་གྱིས་ཆོག་འཛིན་ལུང་ལ་སྨོད།།
བཤད་སྒྲུབ་གཉིས་ཀས་ལུང་རྟོགས་དམ་པའི་ཆོས།།
འཛིན་ཚུལ་གསལ་མཛད་ཁྱོད་ལ་གུས་པས་འདུད།།
མདོ་སྔགས་མཐའ་དག་ཁྱད་པར་རྡོ་རྗེ་ཐེག།
རྒྱུད་སྡེ་མཐའ་དག་ཁྱད་པར་བླ་མེད་དོན།།
རིམ་གཉིས་མཐའ་དག་ཁྱད་པར་སྒྱུ་ལུས་ལ།།
སྔོན་མེད་ལེགས་བཤད་གཏེར་ཆེན་ཁྱོད་ལ་འདུད།།
མདོར་ན་ཐུབ་བསྟན་མཐའ་དག་མ་ལུས་པ།།
བཤད་སྒྲུབ་གཉིས་ཀྱིས་ཆེས་ཆེར་གསལ་མཛད་པ།།
གངས་ཅན་འདི་ན་བསྟན་འཛིན་མཐའ་དག་གིས།།
རྟག་ཏུ་བསྔགས་པར་འོས་པ་ཁྱོད་ལ་འདུད།།
བདག་ཀྱང་དེང་ནས་ཚེ་རབས་ཐམས་ཅད་དུ།།
བདག་ཉིད་ཆེན་པོ་ཁྱོད་བཞིན་རྒྱལ་བའི་བསྟན།།
བདག་བས་གཞན་གཅེས་ལྷག་བསམ་ཕུལ་བྱུང་གིས།།
བདག་གི་སྲོག་ལྟར་སྲུང་བར་བྱིན་གྱིས་རློབས།།
ཁྱོད་ལ་གཙོར་བྱས་ཧ་ཅང་མཆོག་འཛིན་གྱི།།
ཕྱོགས་ལྷུང་གདོན་གྱིས་ཐུབ་བསྟན་དཀྲུགས་པ་ཡང༌།།
དག་སྣང་ཕྱོགས་མེད་ཐུགས་མངའ་ཁྱོད་ཉིད་ཀྱིས།།
མྱུར་དུ་བསལ་ནས་བསྟན་འཛིན་མཐུན་གྱུར་ཅིག།
རྩོམ་སྒྲིག་འགན་འཁུར་བ།
ཁཱ་ཤེས་རབ་རྒྱ་མཚོ། མགར་རྩེ་ཉི་ཟེར། ཨ་བུ་འབྲོང་། བན་ཤུལ་འཇམ་དབྱངས།
|