མི་གཤིས་གསོ་སྦྱོང་འཛིན་གྲྭ་ངོ་སྤྲོད་རགས་བསྡུས།

       མི་གཤིས་གསོ་སྦྱོང་འཛིན་གྲྭ་ནི་གངས་ལྗོངས་ཤེས་རིག་ནོར་བུའི་སློབ་གླིང་གི་སྐབས་དྲུག་པའི་མཐར་ཕྱིན་སློབ་མ་འབུམ་རྩེ་ཡག་དང་སྐབས་བརྒྱད་པའི་མཐར་ཕྱིན་སློབ་མ་འབྲུག་ལྷ་རྒྱལ་གཉིས་ཀྱིས་༢༠༠༩ལོར་ཕ་ཡུལ་གྱི་སློབ་ཆེན་སློབ་མ་སྐོར་ཞིག་དང་གྲོས་མོལ་བྱས་པ་བརྒྱུད་ནས་གསར་དུ་བཙུགས་པ་ཡིན་ལ།  གཙོ་བོ་ད་ལྟའི་དུས་རབས་འདིའི་ཕ་ཡུལ་གྱི་ན་གཞོན་རྣམས་ཀྱི་བསམ་བློ་དང་མི་གཤིས་ཀྱི་ཕྱོགས་ནས་ལེགས་བཅོས་བྱ་རྒྱུ་དེ་ཡིན། རང་ཅག་གི་དགེ་བའི་བཤེས་གཉེན་རིན་པོ་ཆེ་དགེན་ཚུལ་ཁྲིམས་ལགས་ཀྱི་ཞལ་སྔ་ནས་མཛེས་སྡུག་གི་ཡང་རྩེ་ནི་ནང་སེམས་རྒྱུད་ཀྱི་མཛེས་པ་ཡིན་ཞེས་པ་འཛིན་གྲྭ་འདི་བསྒྲུབ་པའི་དགོངས་དོན་ཉག་གཅིག་ཏུ་བཟུང་ཡོད།  འཛིན་གྲྭ་འདི་ལོ་རེ་རེའི་ལོ་མཇུག་ཏུ་འཚོགས་པ་ཡིན་ལ། འདས་པའི་ལོ་ཤས་རིང་མང་རྫོང་ས་ཁུལ་གྱི་སློབ་གསོ་བ་དང་དགེ་རྒན་སོགས་གདན་དྲངས་ནས་མི་གཤིས་བཟང་བོ་མཁོ་ཚུལ་གྱི་འཆད་ཁྲིད་རབས་དང་རིམ་པ་བསྡུས་ཤིང་། ༢༠༡༣ལོ་ནས་ཚོ་བ་རེ་ནས་མི་བཅུ་རེ་བདམས་ཏེ་ཚོ་བ་སོ་སོར་འགྲན་བསྡུར་བྱེད་དུ་བཅུག ལོ་གཅིག་ལ་ན་གཞོན་༡༢༠ལྷག་འགྲན་བསྡུར་ལ་ཞུགས་ཤིང་།  འགྲན་བསྡུར་གྱི་ནང་དོན་ནི། སྐྱེས་པ་ལ།   སྐྱབས་འགྲོ། མདོ་གདུགས་སྒྲོལ་གསུམ། བསང་མཆོད། མག་སྐག ཕ་སྐད་རྒྱུད་འཛིན་བཅས་དང་།   སྐྱེས་མ་ལ།  སྐྱབས་འགྲོ། བཟང་སྤྱོད། སྒྲོལ་མ། བག་རེས། ཕ་སྐད་རྒྱུད་འཛིན་བཅས་ཀྱི་ནང་དོན་བློ་རྒྱུགས་བླངས་ཏེ་བྱ་དགའ་བྱིན་པ་ཡིན།

བློ་གསར་ཟབ་སྦྱོང་སློབ་གྲྭ་དང་མི་གཤིས་གསོ་སྦྱོང་འཛིན་གྲྭ་གཙོ་སྒྲུབ་གནང་མཁན་བན་ཤུལ་འབུམ་རྩེ་ཡག