གྲོགས་པོ་ཚོ།
གཙང་དགོན་ ཨ.སྐལ་བཟང་དོན་ལྡན།
དོ་ནུབ་ཀྱི་མཚན་ལྗོངས།
སྨུག་སྤྲིན་གྱིས་བཟུང་། སྨུག་སྤྲིན་གྱི་ཀློང་ན།
ངེད་མིང་སྲིང་ཚོ་ཁུ་སིམ་མེར།
ཞག་སྒྲོན་རྐང་གཅིག་གི་འོད་མཐའ་རུ།
ཉི་འོད་ཞིང་ལ་རེ་སྒུག་བྱས།
གྲོགས་པོ་ཚོ།
ང་ཚོས་ཇི་ལྟར་བྱས་ན་བཟང་།
ལྷིང་འཇགས་ཀྱི་མཚན་མོ་འདིར།
ཕྱི་རོལ་ན། བུ་ཡུག་གི་གདུག་རྩུབ་ལ།
སྟོན་རླུང་གིས་རམ་འདེགས་བྱེད།
རྨི་ལམ་གྱི་འཇིག་རྟེན་དྲན་པའི་ང་རང་།
ཡུལ་ལྗོངས་འདིར་རང་དབང་བྲལ་བའི།
ཉམ་ཆུང་གི་སྡོང་ལོ་བཞིན།
སྤྲིན་དཀར་གྱི་བང་རིམ་ནས་ཁྲུང་ཁྲུང་ལྷོ་རུ་བསྟར།
སྙན་འགྱུར་གྱི་མགྲིན་གླུ་ལེན་པའི་ཁུ་ལོ་མོད་དུ་ཆས།
ད་དུང་། གླེང་མི་ཕོད་པའི་གཏམ་རྒྱུད་རིང་མོ།
གྲོགས་པོ་ཚོ།
ང་ཚོས་ཇི་ལྟར་བྱས་ན་བཟང་།
གྲང་རླུང་གིས་བསྡམས་པའི་མཚན་མོ་འདིར།
ཉི་འོད་ཀྱི་ཞིང་ལ་ཇི་ལྟར་བསྐྱོད།
གྲོགས་པོ་ཚོ།
ང་ཚོ་ལམ་ལ་ཆས།
དྭངས་གཙང་གི་སེམས་པ་དམར་པོ།
ཟུག་གཟེར་གྱི་རྨ་ཁས་ཁེངས་ཡོད།
ང་ཚོས་ཁྲག་དམར་གྱི་རྐང་རྗེས་ཕབ་བཞིན།
རེ་སྒུག་གི་ཞིང་དུ་བསྐྱོད།
གྲོགས་པོ་ཚོ།
རེ་སྒུག་གི་གླིང་ཕྲན་དུ་ལྟོས་དང་།
ཕུགས་བསམ་གྱི་འོད་སྣང་སྔར་བཞིན།
ཁྲ་ལམ་མེར།
ང་ཚོས་འདི་ལྟར་འཚོལ།
དུས་རབས་འདིར་འཕུར་རྩལ་ངོམ་ཆོག
ངོ་མ་ཡིན།
གྲོགས་པོ་ཚོ།
རྩོམ་སྒྲིག་འགན་འཁུར་བ། ཁྰ་ཤེས་རབ་རྒྱ་མཚོ། མགར་རྩེ་ཉི་ཟེར། འབའ་སྣང་གྲོལ། ཨ་བུ་འབྲོང་།
|