འབྲོག་པའི་ཡོ་བྱད་དང་འབྲོག་ལས་ཀྱི་མིང་།

རྩོམ་པ་བོ་མི་གསལ།

             འབྲོག་པའི་ཡོ་བྱད་ཀྱི་མིང་།
འབྲོག་པར་མཁོ་བའི་ཡོ་བྱད་མིང་།།
ཅུང་ཟད་བྲིས་པ་གཤམ་དུ་གསལ།།
སྦྲ་ནག་སྦིས་གུར་རས་གུར་གསུམ།།
ངོ་ཐག་ཕུར་བ་ཆ་རུ་དང་།།
ཆོན་ཐག་ཀ་ར་མེད་མི་རུང་།།
ཁལ་མར་སྒ་འབྲེང་ཐག་གསུམ་དང་།།
བཞོན་པར་སྒ་རྨེད་གོང་ཐག་དགོས།།
མཐུར་དང་མཐུར་མདའ་སྲབ་སྐྱོག་སྲབ།།
གློ་དང་ཕྱི་གློ་ཡོབ་ཆེན་དང་།།
སྒ་གཡོག་ཤ་ཐག་རྟ་ཡི་སྒྲོག །
སྒྲོ་བ་སྒྱེ་མོ་དོ་བོ་གསུམ།།
དཀར་ཡོལ་ཟངས་ང་སྡེར་མ་གྲི །
ཐུར་མ་ཇ་ནེ་ཇ་ཚགས་སྐྱོགས།།
འོ་ཟོ་བཞོ་ཟེའུ་བཞོ་བཟུང་དོམ།།
མར་སྒམ་རྩམ་ཤིང་རྩམ་ཁུག་དང་།།
འུར་ཆ་ཐབ་ཀ་བ་མ་ཐོམ།།
མེ་ཐུར་ཐལ་གཞོང་ཁོལ་མོ་འབིགས།།
ལྕགས་རྟ་ལྕགས་ཐབ་བཟོ་འཁོར་དང་།།
བརྙན་འཕྲིན་སྒྲ་སྡུད་སྒྲ་ཕབ་སོགས།།
ཁྱིམ་ལ་མཁོ་བའི་ཡོ་བྱད་ཡིན།།
གཅེས་སྤྲས་བྱས་ན་བཀོལ་ཡུན་རིང་།།
           འབྲོག་ལས་ཀྱི་མིང་།
ནོར་ལུག་འཚོ་དང་འོ་མ་བཞོ།།
འོ་བཤིགས་མར་ལེན་ཆུར་བ་བསྐོལ།།
སྐུད་པ་འཁེལ་ཞིང་ས་འཐག་འཐག །
རྩྭ་ཆུ་བསྙེགས་ནས་མཚེར་ས་སྤོར།།
བལ་འབྲེག་རྩྭ་འབྲེག་ཟོག་ར་བསྐོར།།
བྱི་ལིང་ཨ་བྲ་ཆ་ག་གསོད།།
རྩྭ་སར་ཆུ་འདྲེན་རྩྭ་བཟང་འདེབས།།
ཚན་རིག་སྤྱད་ནས་ཕྱུགས་ཟོག་སྤེལ།།

རྩོམ་སྒྲིག་འགན་འཁུར་བ། ཁཱ་ཤེས་རབ་རྒྱ་མཚོ། མགར་རྩེ་ཉི་ཟེར། འབའ་སྣང་གྲོལ།