བཅུ་གཅིག
མི་ལ་ལས་བཤད་ན་བུད་མེད་དེས་ར་ལོ་དྲང་ལམ་དུ་ཁྲིད་སོང་ཟེར། ཡང་ལ་ལས་བཤད་ན་བུད་མེད་དེ་ར་ལོའི་ཨ་མའི་རྣམ་ཤེས་ཡིན་སྲིད་ཟེར། གང་ལྟར་ཡང་བུ་མོ་དེ་དང་མཉམ་དུ་བསྡད་པ་ནས་བཟུང་ར་ལོ་དངོས་གནས་མི་གཞན་ཞིག་ཏུ་འགྱུར་སོང་། ཐ་ན་ཁོའི་སྣ་མདོའི་སྣབས་དེའང་ལྡབ་འགྱུར་གྱིས་ཇེ་ཉུང་དུ་སོང་ཡོད།
འོན་ཀྱང་བློ་ཡུལ་ལས་འདས་པ་ཞིག་ལ་ཉིན་ཞིག་སྤྱི་བདེ་མི་སྣ་གཉིས་ཡོང་ནས་ར་ལོ་བཟའ་ཟླ་གཉིས་རྫོང་ཐོག་ཏུ་ཁྲིད་སོང་།
ཁྲིམས་ཁང་གིས་བཤད་ན་བུ་མོ་དེས་གཉེན་རྩེག་སྒྲིག་གི་ཉེས་པ་བསགས་ཡོད་པས་དུས་བཅད་བཙོན་འཇུག་ཟླ་དྲུག་ལ་བྱེད་རྒྱུའི་ཐག་བཅད། ར་ལོའི་མིག་ཆུ་སྣབས་དང་འདྲེས་ཤིང་སྣབས་མ་ནེའི་སྟེང་ལ་ལུག་ཡོང་། འོན་ཀྱང་བུ་མོ་དེ་ར་ལོའི་གམ་ནས་འགྲོ་ཞོར་དུ“ར་ལོ། སེམས་མ་ཕམ། ཟླ་དྲུག་འཁོར་རྒྱུ་སླ་མོ་རེད། ང་རང་ནམ་ཡང་ཁྱོད་ཀྱི་ཡིན”ཟེར།
ཇི་འདྲའི་གཡོ་ཟོལ་བྲལ་ཞིང་བྱམས་བརྩེ་ལྡན་པའི་ཚིག་ཅིག་རེད་ཨང་། ཚིག་འདིས་ར་ལོར་སྔོན་ལ་ཡོད་མ་མྱོང་བའི་སྤོབས་པ་ཞིག་དང་རེ་ལྟོས་ཤིག་སྦྱིན་བྱུང་བས་ཁོས་སྣབས་དང་མིག་ཆུ་གཙང་མར་ཕྱིས་ནས་ཡར་དགྱེས་ཏེ“ཁྱོད་ཀྱིས་སེམས་བདེ་མོ་བྱོས། ངས་ཁྱོད་ལ་བསྒུགས་ནས་འདུག”ཟེར།
རྩོམ་སྒྲིག་འགན་འཁུར་བ།
ཁཱ་ཤེས་རབ་རྒྱ་མཚོ། མགར་རྩེ་ཉི་ཟེར། ཨ་བུ་འབྲོང་།