མི་དམངས་དྲ་བའི་འཕྲིན། འབག་དཀར་ལྷ་མོ་ནི་ལྷོ་ཁ་ས་ཁུལ་འཕྱོངས་རྒྱས་རྫོང་ཤ་གསོས་ཤང་ནས་བྱུང་བ་ཡིན་ལ། མིག་སྔའི་བར་དུ་ལོ་600ལྷག་གི་ལོ་རྒྱུས་ལྡན། འབག་
དཀར་ལྷ་མོ་ནི་བོད་ཀྱི་རིག་གནས་ཀྱི“འགྱུར་རྡོ་གསོན་པོ”དང་། བོད་ཀྱི་ལྷ་མོའི་སྲོལ་གཏོད་མེས་པོ་ཡིན་པར་གྲགས། དེ་ནི་ལྷ་མོ་འདི་འཁྲབ་མཁན་གྱིས་ར་ལྤགས་དཀར་པོས་བཟོས་པའི་གདོང་འབག་སྤྲས་ཏེ་འཁྲབ་སྟོན་བྱེད་ཀྱི་ཡོད་པས་མིང་ལ་ཡང་འབག་དཀར་ལྷ་མོ་ཞེས་གྲགས་པ་རེད།
དུས་རབས་བཅུ་བཞི་པའི་དུས་མཇུག་ཏུ་ཐང་སྟོང་རྒྱལ་པོས་ཡར་ཀླུང་གཙང་པོ་སོགས་ཆུ་བོ་དང་གཙང་པོ་ཐོག་ལྕགས་ཟམ་སྐྲུན་པའི་མ་དངུལ་གྲབས་གསོག་བྱེད་ཆེད། བུ་མོ་བདུན་གྱིས་གྲུབ་པའི་ལྷ་མོ་ཚོགས་པ་ཞིག་བཙུགས་ཏེ་ཡར་ཀླུང་འཕྱོངས་རྒྱས་རྒྱུད་དུ་ལྷ་མོ་འཁྲབ་སྟོན་བྱས་པ་རེད། ཐང་སྟོང་རྒྱལ་པོས་ལྷ་མོ་འཁྲབ་སྟོན་བྱས་ཏེ་ཞལ་འདེབས་བསྡུས་པའི་རྒྱུ་དངུལ་ལ་བརྟེན་ནས་ལྕགས་ཟམ་13བསྐྲུན་པ་རེད། ཁོང་གིས་ལྕགས་ཟམ་བསྐྲུན་པ་མ་ཟད། སྙན་ཞིང་གཟིགས་མོ་ཆེ་བའི་ལྷ་མོ་ཡང་མང་པོ་བརྩམས་ཤིང་འཁྲབ་སྟོན་བྱས་པས་འབག་དཀར་ལྷ་མོ་ཡུལ་ལུང་ཀུན་ཏུ་གྲགས་པར་གྱུར།
རྗེས་སུ་བོད་ཀྱི་ལྷ་མོའི་སྒྱུ་རྩལ་མི་རབས་ནས་མི་རབས་བར་གྱི་སྒྱུ་རྩལ་པ་ཚོས་རྒྱུན་འཛིན་དང་འཕེལ་རྒྱས་བཏང་བ་མ་ཟད། ལྷ་མོ་འཁྲབ་ལུགས་མི་འདྲ་བ་མང་པོའང་བྱུང་ཞིང་། དམངས་ཁྲོད་དུ་ས་ཆ་མི་གཅིག་པ་དང་། ཡུལ་དུས་མི་འདྲ་བ། ཡུལ་སྲོལ་གོམས་གཤིས་མི་འདྲ་བ། ཆོས་ལུགས་ཆོ་ག་མི་གཅིག་པ་སོགས་ལ་གཞིགས་ནས་ཡུལ་བབ་དང་མཐུན་པའི་ལྷ་མོའི་འཁྲབ་གཞུང་གསར་རྩོམ་དང་འཁྲབ་སྟོན་བྱེད་ཀྱི་ཡོད་པ་རེད།
རྩོམ་སྒྲིག་འགན་འཁུར་བ། མགར་རྩེ་ཉི་ཟེར། འབའ་སྣང་གྲོལ། ཨ་བུ་འབྲོང་།