རྗེ་བཙུན་མི་ལ་རས་པའི་མགུར་གླུ་བཞུགས་སོ།།

 ༄༅།།རས་པ་ཞི་བ་འོད་ལ་གནང་བའི་མགུར།

ཨ་མཚར་པོ་ཅི་འདྲ་ཚོར་བར་འདུག།

ཚིག་གིས་སྦོས་པའི་སྟོན་པ་དེ།།

རྩོད་དུས་ཁྲོམ་པ་བསྙོན་བསྙོན་བྱེད།།

ལབ་དུས་དྲེད་མོས་ལབ་ལབ་བྱེད།།

ཉལ་དུས་མི་ཆེན་ཉལ་ཉལ་བྱེད།།

འགྲོ་དུས་ཧོར་དམག་འགྲིམ་འགྲིམ་བྱེད།།

དེས་གེགས་དང་གོལ་ས་ཅི་ཆོད་ཨང་།།

སྤྱིར་ཁམས་གསུམ་སེམས་ཅན་སོ་སོར་གོལ།།

སོ་སོ་སྐྱེ་བོ་ལས་ལ་གོལ།།

ཉན་རང་ཞི་བའི་གནས་ལ་གོལ།།

དགེ་བཤེས་ཟ་བའི་ཐབས་ལ་གོལ།།

སྟོན་པ་ཚིག་གི་རྫོང་ལ་གོལ།།

དགེ་སློང་ཟ་རྒྱུའི་ནང་དུ་གོལ།།

རྣལ་འབྱོར་སྨྱོན་པའི་གསེབས་ཏུ་གོལ།།

སྒོམ་ཆེན་སྟོང་ལྟ་ཧད་པོས་གོལ།།

དེ་བཞིན་ཐམས་ཅད་གོལ་ཚབས་ཆེ།།

བུ་སྙན་བརྒྱུད་མཁའ་འགྲོའི་ཁ་རླངས་ལ།།

གོལ་ས་ཡོད་སྙམ་བདུད་ཡིན་ཏེ།།

རས་ཆེན་དྲུང་དུ་ཞི་བ་འོད།།

གེགས་ལ་ཤོར་ན་བསླུས་པ་ཡིན།།

དམར་ཁྲིད་ལག་ལེན་མངོན་སུམ་ལ།།

གོལ་ས་བྱུང་ན་བདེན་པ་མེད།།

བུ་གོལ་སའི་སློབ་གཉེར་མ་སེམས་པར།།

རྩེ་གཅིག་ཏུ་སྒོམ་དང་མྱུར་དུ་གསལ།།