དབྱིན་ཡུལ། ལོན་ཊོན། སྤྱི་ལོ་2018ཟླ་3ཚེས་14ཉིན།  དབྱིན་ཇིའི་དངོས་ཁམས་རིག་པའི་ལྟ་གྲུབ་སྨྲ་བའི་ཚན་རིག་པ་ཁྲེ་ཧྥོན•ཝེའོ་ལེམ་•ཧོའོ་ཁན་ནི་ད་ལྟའི་དུས་རབས་ཀྱི་ཆེས་རླབས་ཆེ་བའི་དངོས་ལུགས་རིག་པ་བ་དང་དུས་རབས་ཉེར་གཅིག་པའི་འཛམ་གླིང་གི་མི་སྣ་གྲགས་ཅན་གྱི་མཚན་སྙན་པ་ཞིག་ཡིན།    ཕྱི་གླིང་(BBC)གི་གསར་འགྱུར་ཁང་ལས་ཁྱབ་བསྒྲགས་བྱས་པ་ལྟར་ན་ཁོང་གི་ཁྱིམ་མི་དག་གིས་ཁོང་ཉིད་འདས་ཟིན་པ་ཁྱབ་སྒྲགས་བྱས་པ་ཙམ་ལས་གནས་ཚུལ་གསལ་པོ་ཞིག་ད་དུང་བསྒྲགས་མེད་ལ།     ཁྱོན་དགུང་གྲངས་དོན་དྲུག་ལ་བཞུགས་པར་བཤད།

དེ་བཞིན་ཁོང་གི་དཔེ་དེབ་གྲགས་ཅན་ཐོག་མ་<<དུས་ཚོད་ཀྱི་ལོ་རྒྱུས་མདོར་བསྡུས་ཤིག/A Brief History of Time/时间简史>>ཞེས་པ་དེ་ཉིད་ཁོ་ནས་གོ་ལའི་ཁྱོན་ལ་སྙན་གྲགས་ཀྱིས་ཁྱབ་པར་བྱས་ཡོད།

     དེ་ཡང་འདས་པའི་ལོ་ངོ་20ནང་རྒྱལ་སྤྱིའི་ཁྲོམ་རར་དཔེ་དེབ་དེ་ཉིད་ཁྱོན་ས་ཡ་20ལྷག་བཙོང་ཟིན་པ་དང་།  སྐད་ཡིག་མི་འདྲ་བ་40ལྷག་གི་ནང་དུ་བསྒྱུར་ཡོད་པ་རེད། དཔེ་དེབ་དེ་ཉིད་ད་དུང་ཡང་རྒྱལ་སྤྱིའི་དཔར་སྐྲུན་ཁྲོམ་རའི་ནང་གི་ཆེས་བྲིན་རྒྱུག་ཆེ་བའི་དཔེ་དེབ་རྩེ་ཕུད་ཅིག་ཆགས་ཀྱི་ཡོད།

     མཇུག་མཐར་ཁོང་གིས་༢༠༡༧ལོའི་ཆེས་སྐད་གྲགས་ཆེ་བའི་གློག་བརྙན་<<འཚོ་བའི་འབར་འགད་ཆེན་པོ>>ལས་གསུངས་པའི་སྐད་ཆ་ཞིག་གིས་མཇུག་བསྡུ་བར་བྱ་སྟེ། ཁོ་ན་རེ། “གལ་ཏེ་ཁྱོད་ཉིད་མི་ལོ་བཞི་བཅུའི་རིང་རྐུབ་སྟེགས་ཤིག་གི་སྟེང་དུ་ལུས་སོང་བ་ཡིན་ན་འཚོ་གནས་ལ་ཡི་ཐང་ཆད་ངེས། ང་ཡང་ཡི་ཐང་ཆད་སོང་། ད་ང་འགྲོ་རན་སོང་།”བཅས་གསུངས།

གསར་འགོད་པ།  རྒྱལ་ཚང་ཀརྨ།