མཐར་ཕྱིན་གྱེས་ཚིག

ལོ་ཟླའི་འཁོར་འགྲོས་དེ་ཇི་འདྲའི་མགྱོགས་པ་ལ་ཨང་། མིག་སྡེབ་དབང་ཙམ་གྱིས་མི་ལོ་དྲུག་གི་ཉིན་ཞག་དེ་དག་སྐད་ཅིག་གིས་རྫོགས་སོང་། ཕྱིར་འདང་ཞིག་བརྒྱབ་ན་མཐར་ཕྱིན་ལ་ཉེ་བའི་སློབ་བུ་ཁྱེད་ཅག་ནི་དེ་དུས་ལོ་ན་ཤིན་ཏུ་ཆུང་ཞིང་། པྲ་ཆལ་དང་རྩེད་མོར་དགའ་བའི་ན་གཞོན་བསམ་མེད་དག་དག་ཡིན། ཐོག་མར་སློབ་གླིང་དུ་འབྱོར་ཏེ་རྒྱུགས་ལ་ཞུགས་ཤིང་དེ་ནས་འཛིན་གྲྭ་བགོས་ཏེ་ང་དང་སློབ་ཁང་གཅིག་ལ་ཁེལ་བའི་བར་ལ་ཁྱེད་ཚོའི་དཀའ་སྡུག་དང་འབད་བརྩོན་ཅི་ཞིག་བརྒྱུད་པ་ངས་གཏན་ནས་མི་ཤེས། ཐ་ན་ཐོག་མར་ཁྱེད་ཚོའི་མི་ལ་ཅི་ཟེར་བ་དང་གང་ནས་འོང་བའི་ས་གནས་ཀྱང་ངས་གཏན་ནས་མི་ཤེས། འོན་ཀྱང་ཁྱོད་ཚོ་གངས་ལྗོངས་ཤེས་རིག་ནོར་བུའི་སློབ་གླིང་དུ་འབྱོར་བ་ནས་འུ་ཅག་ཆ་མེད་ནས་རྒྱུས་ཡོད་དུ་གྱུར་ཅིང་། རྒྱུས་ཡོད་ནས་ཀྱང་ཧ་ཅང་འདྲིས་ཆ་ཡོད་པར་གྱུར་སོང་། ལོ་ཟླ་དེ་དག་གི་རིང་ངས་ཁྱོད་ཚོའི་འཛིན་དགེ་རྒན་གྱི་འགན་ཁུར་ཞིང་རིག་གནས་དང་བསྡུས་གྲྭ་སོགས་ཀྱི་དཔེ་ཁྲིད་བྱས་ཏེ་འུ་ཅག་ཕན་ཚུན་བར་ལ་ཤ་འདྲིས་པགས་འདྲིས་སུ་སོང་བའི་བརྩེ་བ་ལྷད་མེད་ཅིག་ཆགས་ཡོད། དེ་བས་ཁྱེད་ཚོས་ང་ལ་དགེ་རྒན་ཞེས་འབོད་ཅིང་ད་དུང་དགེ་རྒན་བཀའ་དྲིན་ཅན་ཞེས་ཆེ་བསྟོད་ཀྱང་བྱེད་ཀྱིན་ཡོད། ངས་ཀྱང་ཁྱེད་ཚོར་སློབ་སྦྱོང་ལ་འབད་པ་བྱེད་དགོས་པའི་གནས་ལུགས་ཤེས་ཚོད་ཀྱིས་བགྲང་ཞིང་། ཁྱོད་ཚོའི་ལུས་ངག་ཡིད་གསུམ་གྱི་སྐྱོན་ཆ་ཅི་མཆིས་ཐེར་འདོན་དང་སྒྱུར་བཅོས་གཏོང་དགོས་པའི་རེ་བ་ཤུགས་ཆེན་པོས་བཏོན་པ་ཡིན། 

སློབ་གསོ་གཏོང་སྐབས་ཉན་བཞིན་པ་འདྲ་ནའང་སེམས་ཀྱི་གཏིང་ལ་གཏན་ནས་མི་འཛིན་པའི་ཁྱོད་ཚོར་གཟའ་མཇུག་རེ་རེར་ངས་མཛུབ་མོ་གདོང་ལ་བཙུགས་ཏེ་སྐུལ་འདེད་བྱེད་མྱོང་ཞིང་། ད་དུང་ཁ་མི་ཉན་པའི་ཁྱོད་ཚོར་བཙན་གྱིས་དྲག་འདེད་བྱས་པའང་ཡོད། འདི་དག་ལ་ཕྱིར་འདང་ཞིག་བརྒྱབ་ན་ང་རང་འགྱོད་པ་གཏན་ནས་མི་སྐྱེ་སྟེ། ངས་ལྷག་བསམ་ཟོལ་མེད་དང་ཁྱེད་ཚོའི་མདུན་ལམ་ཁོ་ན་བསམ་པ་ཡིན། སྤྱི་སྡོམས་རེ་རེའི་སྟེང་དུ་སློབ་མ་རེ་རེའི་འགྲོ་འདུག་སྤྱོད་གསུམ་ལ་ཉམས་འཇོག་བྱེད་སྟངས་དང་། ལུས་ངག་ཡིག་གསུམ་གྱི་ལེགས་ཉེས་ལ་བླང་དོར་འབྱེད་ཚུལ། བསླབ་གཞི་རེ་རེར་འབད་འབུངས་བྱེད་ཚུལ། གཟའ་འཁོར་རེའི་རྩོམ་ཡིག་འབྲི་སྦྱོང་བྱེད་ཚུལ། ཕ་སྐད་གཙང་མར་ཞེན་པ་དགོས་ཚུལ། ཐ་ན་ཁོར་ཡུག་གཙང་སྤྲར་ཤུགས་རྒྱག་དགོས་ཚུལ་སོགས་སློབ་གླིང་དུ་སྡོད་པའི་སྐབས་ཙམ་མ་ཡིན་པར་མི་ཚེའི་བྱ་སྤྱོད་ཇེ་ལེགས་སུ་འགྲོ་དགོས་པའི་འབོད་སྐད་ཡང་ནས་ཡང་དུ་བཏང་བ་དེ་དག་ད་ལྟ་དྲན་ངོགས་སུ་ཡོད་དམ།