|
ཉིན་ཤས་བསྟུད་མར། རྒྱ་གར་གྱི་ས་ཁུལ་མང་པོར་བསྟུད་མར་གནམ་གཤིས་ཚ་གདུག་ཤིན་ཏུ་ཆེ། རྒྱ་གར་ཤར་རྒྱུད་ཨའོ་ཏི་ཧྲ་མངའ་སྡེའི་འཕྲོད་བསྟེན་དཔོན་རིགས་ཤིག་གིས་ཚེས་11ཉིན། མངའ་སྡེ་དེར་ད་ལོའི་དབྱར་དུས་ནས་བཟུང་ཉུང་མཐར་ཡང་མི་41ཚ་བ་ཆེ་བའི་དབང་གིས་རྐྱེན་ལམ་དུ་ཤོར་ཡོད་ཅེས་བསྟན་འདུག
ཨའོ་ཏི་ཧྲ་མངའ་སྡེའི་སྤྱི་པའི་འཕྲོད་བསྟེན་ཀྲུའུ་རེན་གྱིས་ཚེས་11ཉིན་བཅར་འདྲི་དང་ལེན་བྱེད་སྐབས། ཨའོ་ཏི་ཧྲ་མངའ་སྡེའི་དམིགས་བསལ་རོགས་སྐྱོབ་ཨུ་ཡོན་ལྷན་ཁང་གིས་གསལ་བསྒྲགས་སྤེལ་བར་གཞིགས་ན། ད་ལོའི་དབྱར་དུས་ནས་བཟུང་། ཨའོ་ཏི་ཧྲ་མངའ་སྡེར་ཉུང་མཐར་ཡང་མི་41ལ་ཚ་གདུག་ཕོག་ནས་རྐྱེན་ལམ་དུ་ཤོར་བའི་བདེན་དཔང་བྱས་ཡོད་ཅེས་བཤད། དེ་སྔོན་ཨའོ་ཏི་ཧྲ་མངའ་སྡེའི་སྲིད་གཞུང་གིས་ཚེས་10ཉིན། འདས་ཟིན་པའི་ཉིན་གསུམ་ནང་། ཉུང་མཐར་ཡང་མི་8ཚ་གདུག་ཕོག་ནས་རྐྱེན་ལམ་དུ་ཤོར་བའི་དོགས་པ་ཡོད་ཅེས་བསྟན་འདུག ས་གནས་དེ་གའི་གནམ་གཤིས་སྡེ་ཁག་གིས་སྔོན་དཔག་བྱས་པ་ལྟར་ན། ཨའོ་ཏི་ཧྲ་མངའ་སྡེའི་ས་ཁུལ་མང་པོར་མ་འོངས་པའི་ཉིན་འགར་མུ་མཐུད་ཚ་བ་ཆེ་བ་དང་བརླན་བཤེར་ཆེ་བའི་གནམ་གཤིས་སྟོན་རྒྱུ་ཡིན་པ་རེད།
ཟླ་5པའི་ཟླ་དཀྱིལ་ནས་བཟུང་། རྒྱ་གར་ཤར་རྒྱུད་དང་བྱང་རྒྱུད་ཀྱི་ས་ཁུལ་མང་པོར་མུ་མཐུད་དུ་གནམ་གཤིས་ཚ་གདུག་ཆེ་བས། ས་ཁུལ་ལ་ལའི་དྲོད་ཚད་ཧྲེ་ཧྲི་ཏུའུ་50ལ་སླེབས་ཡོད། རྒྱ་གར་གྱི་རྒྱལ་ས་རྡི་ལི་གསར་པའི་ས་ཁུལ་ཁ་ཤས་སུ་ཟླ་འདིའི་ཟླ་སྟོད་དུ་ཟིན་ཐོ་གསར་པ་བཏོད་པའི་ཧྲེ་ཧྲི་ཏུའུ་49.9ལ་སླེབས་འདུག རྒྱ་གར་སྨྱན་སྦྱོར་གྱིས་དེ་སྔོན་གནས་ཚུལ་སྤེལ་བར་གཞིགས་ན། ཟླ་3པ་ནས་ཟླ་5པའི་བར། རྒྱལ་ཁབ་དེར་ཚ་གདུག་ནད་ཕོག་པར་དོགས་པ་ཡོད་པའི་ནད་པ་ཧ་ལམ་ཁྲི་2.5ཡོད་པ་རེད།
ཡོང་ཁུངས། ཀྲུང་དབྱང་བོད་སྐད་རླུང་འཕྲིན་སྤྱི་སྟེགས།
|