༧ པཎ་ཆེན་བཅུ་བ་ཆེན་མོ་མྱ་ངན་ལས་འདས་ནས་ལོ་ཉེར་དགུ་འདས་པའི་རྗེས་དྲན།
བསེ་ཚང་བློ་བཟང་དཔལ་ལྡན།
བློ་བཟང་བསྟན་ལ་འཇིགས་མེད་སྙིང་སྟོབས་ཀྱིས།།
དུས་མཐར་འཕེལ་རྒྱས་ཕན་བདེ་འབྱུང་བའི་སྒོ།།
ཅིག་ཅར་ཕྱེ་བའི་མཛད་བཟང་ལྷུན་གྲུབ་པ།།
ཆོས་ཀྱི་རྒྱལ་མཚན་འཛིན་མཁས་གང་དེར་འདུད།།
སྡུག་ཀུན་མུན་པར་འཁྱམས་པའི་གངས་ཅན་འགྲོ།།
ཕན་བདེ་གངས་རིའི་རྩེ་མོར་ལེགས་བཀོད་དེ།།
དགེ་ལེགས་གངས་སེང་འོ་མས་སྐྱོང་མཁས་པ།།
སྐྱབས་མགོན་ཀུན་གཟིགས་མཆོག་གི་བཀའ་དྲིན་དྲན།།
མི་དགེ་ལས་ཀྱི་ཞགས་པས་རབ་བཅིངས་ཏེ།།
སྡུག་བསྔལ་ལས་ཀྱི་རྣམ་སྨིན་མྱོང་བའི་ཚེ།།
ཐུགས་བསྐྱེད་དུས་ལས་ཡོལ་མེད་བརྩེར་གཟིགས་པའི།།
མགོན་པོ་སྣང་བ་མཐའ་ཡས་བཀའ་དྲིན་དྲན།།
ཐུབ་བསྟན་མིང་གི་ལྷག་མར་གྱུར་པའི་ཚེ།།
བཤད་སྒྲུབ་བསྟན་པའི་གདུགས་དཀར་སྲིད་མཐའ་རུ།།
བརྟན་པོར་བཙུགས་པའི་རླབས་ཆེན་ཕྱག་རྗེས་མཆོག།
ཕན་བདེ་དཔལ་དུ་བསྐྲུན་པའི་བཀའ་དྲིན་དྲན།།
གང་གི་ཐབས་མཁས་ཐུགས་རྗེའི་སྤྲིན་ཕུང་ལས།།
ལེགས་གསུང་ཆོས་སྲིད་འབྲུག་སྟོང་ལྡིར་བའི་དབྱངས།།
ལུས་ཅན་མདོངས་མཐའ་མྱོས་པའི་སྨན་གཅིག་པུ།།
མཁའ་མཉམ་འགྲོ་བའི་གདུང་སེལ་བདུད་རྩིར་གྱུར།།
དེང་དུས་བདག་སོགས་འགྲོ་ཀུན་བདེ་སྐྱིད་ཀྱི།།
དགེ་ལེགས་རྒྱ་མཚོའི་དཔལ་ལ་ལོངས་སྤྱད་དེ།།
གཏན་བདེ་ཐབས་ལ་འབད་པའི་སྐལ་བཟང་འདི།།
མགོན་པོ་ཁྱོད་ཀྱི་བཀའ་དྲིན་ཁོ་ནར་ངེས།།
དེང་ནས་བཟུང་སྟེ་ཚེ་རབས་ཐམས་ཅད་དུ།།
མགོན་པོ་ཁྱེད་དང་ནམ་ཡང་མི་འབྲལ་ཞིང་།།
གསུང་གི་གསང་བ་ཟབ་མོའི་སྣོད་གྱུར་ནས།།
ཐེག་མཆོག་ལམ་གྱི་བགྲོད་པ་མཐར་ཕྱིན་ཤོག།
ཅེས་ཐུབ་བསྟན་ཡོངས་སུ་རྫོགས་པའི་མངའ་བདག་ཀུན་གཟིགས་སྣང་བ་མཐའ་ཡས་༧པཎ་ཆེན་ཐམས་ཅད་མཁྱེན་པ་བཅུ་བ་ཆེན་མོ་དགོངས་པ་གཞན་དུ་གཏད་པའི་ཚུལ་མཛད་ནས་ལོ་འཁོར་ཉེར་དགུ་སོང་བའི་སྐབས་འདིར་བཀའ་དྲིན་རྗེས་སུ་དྲན་པའི་གདུང་དབྱངས་གསོལ་འདེབས་ཀྱི་ཚུལ་དུ་དམ་པ་གང་གི་སློབ་བུའི་ཐ་ཤལ་བ་༧བསེ་ཚང་བློ་བཟང་དཔལ་ལྡན་ཆོས་ཀྱི་རྡོ་རྗེ་ནས་༢༠༡༧ལོའི་ཧོར་ཟླ་༤བའི་ཚེས་༢༠བྲིས་པའོ།།
|