འཇར་མན་གྱི་དུས་ཚོད2023ལོའི་ཟླ10ཚེས24ཉིན་གྱི་ཆུ་ཚོད17：30ཙམ་ལ། ཀྲུང་གོའི་འཐུས་མི་རུ་ཁག་ལIBMའཛམ་གླིང་བག་སོབ་བཟོ་བའི་འགྲན་སྡུར་གྱི་ཨང་དང་པོ་ཐོབ་པ་མ་ཟད། རྣམ་གྲངས་རྐྱང་པ་གཉིས་ཀྱི་ཨང་དང་པོ་བླངས་ནས། ཧྥ་རན་སེ་དང་། རི་པིན། འཇར་མན་སོགས་གཡོས་སྦྱོར་སྐད་གྲགས་ཡོད་པའི་རྒྱལ་ཁབ་ལས་རྣམ་པར་རྒྱལ་ཏེ། ལོ་རྒྱུས་ཀྱི་ཟིན་ཐོ་བཏོད་ནས་སླར་ཡང་ཨང་དང་པོ་བླངས་ཡོད།

    ད་ཐེངས་འགྲན་སྡུར་ལ་ཞུགས་མཁན་ཀྲུང་གོའི་འཐུས་མི་རུ་ཁག་གི་འཚོ་བཅུད་ལྡན་པའི་བག་སོབ་ལ་ཧྲང་ཧའེ་བོད་སྐྱོར་གྱིས་རྒྱབ་སྐྱོར་ཤུགས་ཆེན་བྱས་པ་དང་གཞིས་རྩེ་བོད་ལྗོངས་ཞིབ་འཇུག་བཟའ་བཅའ་ཚད་ཡོད་ཀུང་སིས་མཉམ་དུ་གསར་སྤེལ་དང་མཁོ་འདོན་བྱས་པའི་གཞིས་རྩེའི་ནས་བསྙལ་བའི་ས་བོན་དང་རྩམ་པ། དེ་བཞིན་ཀྲུང་གོའི་སྲོལ་རྒྱུན་རིག་གནས་ཀྱི་གཞི་རྒྱུ་མཉམ་དུ་བསྲེས་པས། འཛམ་གླིང་དུ་ཀྲུང་གོའི་བག་སོབ་ཀྱི་ཐུན་མོང་མ་ཡིན་པའི་ཆ་མངོན་ཐུབ་ཡོད། 

    ཤེས་རྟོགས་བྱུང་བར་གཞིགས་ན། འཛམ་གླིང་གཡོས་སྦྱོར་ལས་རིགས་ཀྱི་རྒྱུན་སྤྱོད་གྲོ་ཞིབ་མང་ཆེ་བ་ནུབ་ཕྱོགས་རྒྱལ་ཁབ་ཆེ་ཁག་ནས་ཐོན་གྱི་ཡོད། ཡིན་ནའང་ད་ཐེངས་བོད་ཀྱི་རྩམ་པ་འཛམ་གླིང་གི་འགྲན་སྡུར་ལ་ཐོན་པ་དང་ཀྲུང་གོའི་རུ་ཁག་ལ་ཨང་དང་པོ་ཐོབ་པ་ལས། ས་མཐོའི་བདེ་ཐང་གི་བཟའ་བཅའ་འདིར་འཛམ་གླིང་གཡོས་སྦྱོར་ལས་རིགས་ཀྱི་ཁས་ལེན་ཐོབ་པ་མ་ཟད། གཡོས་སྦྱོར་ལས་རིགས་རྩེར་སོན་ལ་གདམ་ག་གསར་པ་ཞིག་མཁོ་འདོན་བྱས་ཡོད། ཧྲང་ཧའེ་བོད་སྐྱོར་གྱི་འབྲེལ་ཡོད་འགན་འཁུར་བས། ད་ཐེངས་ཀྱི་འགྲན་སྡུར་ལ་ཨང་དང་པོ་ཐོབ་པ་དེས་རྒྱལ་སྤྱིའི་སྤྱི་ཚོགས་ལ་ཀྲུང་གོའི་གཡོས་སྦྱོར་ལག་རྩལ་ངོམས་པ་མ་ཟད། འཛམ་གླིང་ལ་བོད་ཀྱི་ནས་སོན་ལེགས་སུ་གཏོང་བའི་ལག་རྩལ་གྱི་ཕུལ་བྱུང་གྲུབ་འབྲས་མངོན་པར་བྱས་ཡོད། སླད་ཕྱིན་བོད་ཀྱི་ནས་ལ་མི་དེ་བས་མང་བས་ངོས་འཛིན་དང་ཁས་ལེན་འཐོབ་པའི་ཡིད་ཆེས་ཡོད་ཅེས་བཤད།