༄༅།། སྤུན་ཆུང་བཛྲ་འོད་ཟེར་ལ་སྤྲིངས་པ་སྨོན་ཚིག་བདུད་རྩིའི་ཉིང་བཅུད།
བཛྲ་ཚུལ་ཁྲིམས་རྒྱ་མཚོ།
གང་གིས་བསྟེན་ན་དེ་ལ་མཆོག་ཐུན་གྱི། །
དངོས་གྲུབ་མཐའ་དག་སྩོལ་བའི་ནུས་ལྡན་ཞིང་།
།རྣམ་གྲོལ་གླིང་དུ་འཁྲིད་པའི་དེད་དཔོན་མཆོག །
བཀའ་དྲིན་མཉམ་མེད་རྩ་བའི་བླ་མ་ལ། །
རྩེ་གཅིག་སྙིང་ནས་གསོལ་བ་འདེབས་ནུས་ན།
།སེམས་རྒྱུད་ཆོས་ཀྱིས་བསྣུམ་པར་ཐེ་ཚོམ་མེད།
།རྣམ་དག་སྨོན་དོན་འགྲུབ་པར་སོམ་ཉི་མེད། །
ཉམས་ལེན་མཐའ་རུ་ཕྱིན་པར་དོགས་པ་མེད། །
སྟོན་པ་ཤཱཀ་ཐུབ་རྗེ་བཙུན་འཇམ་དབྱངས་དང་། །
ཨཱརྱ་དེ་བ་དམ་པ་སངས་རྒྱས་སོགས། །
སྡུག་བསྔལ་ཞི་བྱེད་བདག་འཛིན་གཅོད་པ་ཡི། །
ཕ་རྒྱུད་ཐབས་ཀྱི་བརྒྱུད་པའི་བླ་མ་ལ། །
རྩེ་གཅིག་སྙིང་ནས་གསོལ་བ་འདེབས་ནུས་ན། །
སེམས་རྒྱུད་ཆོས་ཀྱིས་བསྣུམ་པར་ཐེ་ཚོམ་མེད།།
རྣམ་དག་སྨོན་དོན་འགྲུབ་པར་སོམ་ཉི་མེད། །
ཉམས་ལེན་མཐའ་རུ་ཕྱིན་པར་དོགས་པ་མེད།
།
ཡུམ་ཆེན་ཤེར་ཕྱིན་རྗེ་བཙུན་སྒྲོལ་མ་དང་། །
སུ་ཁ་སིདྡྷི་མ་ཅིག་ལབ་སྒྲོན་སོགས། །
སྡུག་བསྔལ་ཞི་བྱེད་བདག་འཛིན་གཅོད་པ་ཡི། །
མ་རྒྱུད་ཤེས་རབ་བརྒྱུད་པའི་བླ་མ་ལ། །
རྩེ་གཅིག་སྙིང་ནས་གསོལ་བ་འདེབས་ནུས་ན། །
སེམས་རྒྱུད་ཆོས་ཀྱིས་བསྣུམ་པར་ཐེ་ཚོམ་མེད། །
རྣམ་དག་སྨོན་དོན་འགྲུབ་པར་སོམ་ཉི་མེད། །
ཉམས་ལེན་མཐའ་རུ་ཕྱིན་པར་དོགས་པ་མེད། །
ཟག་མེད་བདེ་སྟེར་རྗེ་བཙུན་རྣལ་འབྱོར་མ། །
བསླུ་མེད་བླ་མ་ཡི་དམ་དཀོན་མཆོག་གསུམ། །
དཔའ་བོ་མཁའ་འགྲོ་ཆོས་སྐྱོང་བསྲུང་མ་ལ། །
རྩེ་གཅིག་སྙིང་ནས་གསོལ་བ་འདེབས་ནུས་ན། །
བདག་མེད་གནས་ལུགས་རྟོགས་པར་ཐེ་ཚོམ་མེད། །
བདུད་བཞི་རང་སར་ཞི་བར་སོམ་ཉི་མེད། །
མར་གྱུར་འགྲོ་དོན་ནུས་པར་དོགས་པ་མེད། །
དེ་ཕྱིར་ཁྱེད་ཅག་དེ་ལྟར་གསོལ་བ་ཐོབས། །
ཇི་ལྟར་དྲག་ཅིང་རྒོད་པའི་འཐོར་རླུང་དང་། །
འཕྲད་པའི་ཆུ་འཛིན་ཇི་བཞིན་གང་ཞིག་གིས། །
ཚུལ་བཞིན་བསྒྲུབ་ན་ཕྱི་ནང་བདུད་ཀྱི་སྡེ། །
མ་ལུས་ཞི་བྱེད་གཅོད་ལས་གཞན་ན་གང་། །
ཤེས་རབ་ཕ་རོལ་ཕྱིན་གཞུང་ཟབ་མོའི་གནད། །
ཀུན་བསྡུས་གཅོད་ཀྱི་ཉམས་ལེན་ངོ་མཚར་བ། །
ཆོས་བརྒྱད་རླུང་གིས་མ་གཡོས་སེམས་ཀྱི་གསང་། །
ཇི་བཞིན་གསལ་བྱེད་འཚོལ་འདི་ཨེ་མ་མཚར། །
དུས་ཀྱི་མཐར་ཡང་སྔོན་བྱོན་དམ་པ་བཞིན། །
འདུ་འཛིས་དབེན་པའི་ཆུ་མིག་གཙང་མའི་འགྲམ། །
བྱམས་དང་སྙིང་རྗེ་བྱང་ཆུབ་སེམས་མཆོག་དང་། །
དམ་དུ་འབྲེལ་བའི་ཡང་དག་ལྟ་བའི་གནད། །
གུས་རྟག་ཟུང་གིས་བརྩོན་པ་མི་ལྷོད་པའི། །
ཁྱེད་ཅག་ལུས་ལ་ན་ཚ་མེད་པར་ཤོག།།
བསམ་པའི་དོན་རྣམས་ཡིད་བཞིན་འགྲུབ་པར་ཤོག །
ཐོག་མཐའ་བར་གསུམ་བཀྲ་ཤིས་བདེ་ལེགས་ཤོག །
ཅེས་པ་ནི་བཛྲ་ཚུལ་ཁྲིམས་རྒྱ་མཚོས་ཆོས་སྡེ་ཆེན་པོ་བླ་བྲང་བཀྲ་ཤིས་འཁྱིལ་ནས་ཤར་མར་བྲིས་པའོ།།
|