༄༅། ། ཕྱི་ཚུལ་འཁྱུག་འཁྱུག་བཅོས་མའི་སྤྱོད་ལམ།
རྫ་དཔལ་སྤྲུལ་པས་སོ།།
ཆོས་གོས་ཟད་ཟད་ཆོས་གྲལ་འགྲིམས་ཀྱང་།།
ཉིས་བརྒྱ་ལྔ་བཅུའི་མིང་ཙམ་གླེང་ན།།
བཞིན་གྱི་རྣམ་འགྱུར་ཁྲོ་གཉེར་ངོམ་པའི།།
དགེ་སློང་དེ་ལ་རྒྱལ་བ་མི་མཉེས།།
རྡོར་དྲིལ་ཟད་ཟད་ཚོགས་གྲལ་འགྲིམས་ཀྱང་།།
རིམ་གཉིས་ལམ་ལ་ཐན་དུ་བརྩི་བའི།།
སྔགས་པ་དེ་འདྲ་ཕྱག་ལེན་མཁས་ཀྱང་།།
རྡོ་རྗེ་འཆང་གི་རྗེས་འཇུག་མ་ཡིན།།
ཆོས་སྒོར་ཞུགས་ནས་ཆོས་མིན་སྤྱོད་ཅིང་།།
ཆོས་བཞིན་སྤྱོད་ལ་ཁྲེལ་གྱིས་འདེབས་པ།།
དུས་ངན་བདོ་བའི་མཐའ་དམག་སྟོང་ལས།།
སྙིགས་མའི་སྤྱོད་ཚུལ་འདི་རང་ཐུའོ།།
ལས་ངན་དུད་འགྲོའི་ལུས་མང་དོར་ལ།།
དུས་ཀྱི་མཐའ་ཞེས་ཐམས་ཅད་སྔངས་ཀྱང་།།
ངན་འགྲོར་ལྟུང་བ་དུས་ངན་མ་ལགས།།
དུས་ངན་དངོས་ནི་སྤྱོད་ངན་ལགས་སོ།།
སྤྱོད་ངན་འཕེལ་བའི་དུས་ངན་བདོ་བ།།
སྙིགས་མའི་དུས་ཀྱི་རང་གཟུགས་ལགས་ཀྱང་།།
ཆོས་མཐུན་སེམས་ལ་སྐྱིད་དགུ་འཆར་བ།།
དྲང་པོའི་བློ་ཡི་བྱིན་རླབས་ལགས་སོ།།
གཡོ་སྒྱུའི་ཚུལ་གྱིས་ཕྱི་སྤྱོད་བཅོས་བཅོས།།
ཟོལ་མའི་མཁར་ལ་རེ་ཞིག་བརྟེན་ཡང་།།
རྟོག་ངན་དུག་རོ་ཁོང་དུ་ཉལ་བ།།
འཆི་ཁ་ཚུན་ལ་མི་མངོན་མི་སྲིད།།
རང་སེམས་ཟོལ་མེད་དཔང་དུ་བཙུགས་ནས།།
དྲང་པོའི་ལམ་ལ་རང་བཞིན་གནས་ན།།
ཆོས་དང་འཇིག་རྟེན་དེ་ལ་འདུ་སྟེ།།
དེང་སང་འགྲོ་བ་དེ་ལ་མི་འགུ།།
དྲང་པོའི་གཏམ་ལ་རྩུབ་མོར་བརྩི་ཞིང་།།
དྲང་པོའི་སེམས་ལ་གླེན་པར་བརྩི་བའི།།
དྲང་པོ་མེད་པའི་དེང་སང་འགྲོ་བས།།
དྲང་པོའི་ལམ་ལ་སྨད་མཁན་མང་ངོ།།
ཕྱི་ཚུལ་འཁྱུག་འཁྱུག་བཅོས་མའི་སྤྱོད་ལམ།།
ནང་ཚུལ་འཁྱུག་འཁྱུག་གཡོ་སྒྱུའི་རྣམ་རྟོག།
དེང་སང་སྐྱེ་བོ་ཤིང་རྩེའི་བྱི་ཆུང་།།
འཁྱུག་ཤིང་འཁྱུག་ཤིང་མདོ་མེད་བྱེད་དོ།།
གྲྭ་ས་ཡིན་ཞེས་འགྲིག་འགྲིག་ཡིན་ཡིན།།
གཡོ་སྒྱུའི་ལོ་མ་སྒྲིབ་བྱེད་བཟང་སྟེ།།
རྒྱལ་བའི་ལམ་བཟང་བསླབ་པ་མེད་ན།།
ཐར་ལམ་གྲྭ་ས་འཆོར་བར་འདུག་གོ།
རྩོམ་ཡིག་མཁོ་སྤྲོད་པ། གསར་འགོད་པ། རྒྱ་འདུ་སངས་རྒྱས།
|