བྱམས་དང་སྙིང་རྗེའི་ཀློང་གི་འཕགས་པ་སྤྱན་རས་གཟིགས།
-----སྤྱན་རས་གཟིགས་དང་བོད་མི་རིགས་བར་གྱི་འབྲེལ་བ་ལ་ཅུང་ཟད་དཔྱད་པ།
རྩོམ་པ་བོ། ཤེས་རབ་བསྟན་དར།
བོད་ཀྱི་ལྷ་སྐལ་སྤྱན་རས་གཟིགས་ཡིན་པས་བོད་མི་བྱམས་བརྩེ་ཆེ་ལ་རྒྱ་ནག་གི་ལྷ་སྐལ་འཇམ་པའི་དབྱངས་ཡིན་པས་རྒྱ་ནག་ཤེས་རབ་ཆེ་ཞེས་བཤད་སྲོལ་ཡོད་པ་བཞིན་
བོད་ཀྱི་བྱིས་པར་སློབ་མི་དགོས་པས་ཨ་མ་དང་མ་ཎི་མཉམ་དུ་ངོ་ཤེས་འགྲོ་བ་ནི་སྤྱན་རས་གཟིགས་བོད་ཀྱི་ལྷ་སྐལ་དུ་གྲུབ་པའི་རྟགས་ཡིན་ཞེས་བོད་ཀྱི་མཁས་པ་ཆེན་པོ་དག་གིས་བཞེད།
བོད་མི་ཞིག་ཡིན་ན་སྤྱན་རས་གཟིགས་ཀྱི་མིང་མི་ཤེས་མཁན་ཞིག་མེད་ལ། མི་ཞིག་ཤི་བའམ་ཡང་ན་སྲོག་ཆགས་གང་ཞིག་སུ་ཞིག་གིས་གསོད་པ་མཐོང་ན་མ་ཎི་མི་འདོན་པ་ཞིག་ཀྱང་གཏན་ནས་མི་སྲིད། དེ་བས་བོད་ཀྱི་ལོ་རྒྱུས་ཀྱི་ངོས་ནས་བལྟས་ན་ཡང་བོད་མི་རིགས་འདི་ཡང་སྤྱན་
རས་གཟིགས་ཀྱི་ཐུགས་རྗེ་ལས་གྲུབ་པ་དང་ཁོང་གི་ཐུགས་རྗེ་ལས་བོད་ལ་དམ་པའི་ཆོས་དར་ཞིང་།
ལོ་རྒྱུས་ཀྱི་འཕེལ་འགྲིབ་ག་འདྲ་བརྒྱུད་ཀྱང་བོད་མི་རིགས་སྤྱན་རས་གཟིགས་ཀྱི་ཐུགས་རྗེ་ལས་འཚོ་ཐུབ་པར་སྙམ་གྱིན་ཡོད་པས་བོད་མི་རིགས་ཀྱི་སེམས་ཁོང་དུ་སྤྱན་རས་གཟིགས་ཀྱི་གོ་ས་ཆེ་བ་ལྟ་བུ་གཞན་སུ་ཞིག་གིས་བཟུང་མེད།
དེ་བས་བདག་གིས་བོད་བརྒྱུད་ནང་བསྟན་དང་འབྲེལ་ནས་སྤྱན་རས་གཟིགས་ཀྱི་སྐོར་ཅུང་ཟད་བརྗོད་པར་བྱ།
དང་བོ།
སྤྱན་རས་གཟིགས་དང་བོད་གངས་ཅན་བར་གྱི་ལས་འབྲེལ།
སྤྱན་རས་གཟིགས་སྔོན་ཡུལ་སྒྲ་གཅན་དུ་ཡབ་སྒྲ་དབྱངས་རྒྱལ་བོ་དང་ཡུམ་དྲི་མ་མེད་པ་གཉིས་ཀྱི་སྲས་སུ་འཁྲུངས།
མཚན་ལ་འཇིག་རྟེན་དབང་ཕྱུག་ཅེས་བྱ་བར་སྐྱེ་བ་བཞེས་པའི་ཚེ་སངས་རྒྱས་འོད་མཛད་ཡེ་ཤེས་ཏོག་གི་སྤྱན་སྔར་ཐུགས་བསྐྱེད།
རྒྱལ་བོ་རྩིབས་ཀྱི་མུ་ཁྱུད་ཀྱི་བུའི་ཐུ་བོ་མིག་མི་འཛུམ་དུ་སྐྱེ་བ་བཞེས་པའི་ཚེ་སངས་རྒྱས་རིན་ཆེན་སྙིང་བོའི་སྤྱན་སྔར་ཐུགས་བསྐྱེད་ཅིང་མཚན་ལ་སྤྱན་རས་གཟིགས་དབང་ཕྱུག་ཅེས་གསོལ།
སངས་རྒྱས་འོད་ཟེར་ཀུན་འཕགས་དཔལ་བརྩེགས་རྒྱལ་བོའི་ངོ་བོར་འཚང་རྒྱ་བར་ལུང་བསྟན། སངས་རྒྱས་འོད་དཔག་མེད་ཀྱི་སྤྱན་སྔར་སེམས་ཅན་ཐམས་ཅད་འཁོར་བ་ལས་མ་བསྒྲལ་བར་དུ་བདག་འཚང་མི་རྒྱ་ཞེས་དམ་བཅས།
སངས་རྒྱས་སྣང་བ་མཐའ་ཡས་ཀྱི་སྤྱན་སྔར་སྨོན་ལམ་ཆེན་པོ་གྲངས་མེད་པ་བཏབ་ནས་ཞལ་བཅུ་གཅིག་དང་ཕྱག་གྲངས་མེད་པ་སྤྲུལ་བར་མཛད།
བདེན་པ་མང་བོ་བརྗོད་པའི་མཐུ་ལས་སྤྱན་རས་ གཟུགས་དབང་ཕྱུག་ལྷར་བསྟེན་ན་བདེ་བ་ཅན་གྱི་ཞིང་ཁམས་སུ་སྐྱེ་བའི་སྨོན་ལམ་འགྲུབ་སླ་གསུངས། ལྷག་པར་སྤྱན་རས་གཟིགས་ནི་བྱམས་དང་སྙིང་རྗེ་བདག་ཉིད་དུ་གྱུར་པས་ན་གདུལ་བྱ་རྣམས་གང་ལ་གང་འདོད་དུ་སྤྲུལ་བར་མཛད་པ་ཡིན་ཏེ་དམ་ཆོས་པད་མ་དཀར་བོ་ལས། སེམས་ཅན་ཁ་ཅིག་ལ་ནི་སྤྱན་རས་གཟིགས་ཀྱིས་སངས་རྒྱས་ཀྱི་རྣམ་པས་ཆོས་སྟོན། དེ་བཞིན་ཁ་ཅིག་ལ་བྱང་ཆུབ་སེམས་དཔའི་གཟུགས་ཀྱིས།
ཁ་ཅིག་ལ་ཚངས་པ། བརྒྱ་བྱིན། དྲི་ཟ། གནོད་སྦྱིན། ཤ་ཟ། དམག་དཔོན། བྲམ་ཟེ། འཁོར་སྒྱུར།
དབང་ཕྱུག་གིས་འདུལ་བའི་སེམས་ཅན་ལ་ནི་དབང་ཕྱུག་གི་གཟུགས་ཀྱིས་ཆོས་སྟོན། ཞེས་གསུངས་པས་སོ།
། འོ་ན་སྤྱན་རས་གཟིགས་དང་བོད་གངས་ཅན་བར་ལ་ལས་འབྲེལ་ག་འདྲ་ཡོད་ཅེ་ན།
དམ་ཆོས་པད་མ་དཀར་བོ་སོགས་སུ། སྤྱན་རས་གཟིགས་དབང་ཕྱུག་གི་སྔོན་བྱང་ཆུབ་སེམས་དཔའི་སྤྱོད་པ་སྤྱོད་པའི་ཚེ།
སངས་རྒྱས་སྟོང་གི་སྤྱན་སྔར་སྨོན་ལམ་བཏབ་སྟེ། སྔོན་དུས་གསུམ་སངས་རྒྱས་གང་གིས་ཀྱང་ཞབས་ཀྱིས་མ་བཅགས་པའི་གནས།
མཐའ་འཁོབ་ཁ་བ་ཅན་གྱི་རྒྱལ་ཁམས་ན་ཡོད་པའི་སེམས་ཅན་འདུལ་དཀའ་བ་དེ་རྣམས་ཐར་བ་བྱང་ཆུབ་ཀྱི་ལམ་ལ་འཁོད་པར་གྱུར་ཅིག མཐའ་འཁོབ་དེ་ཡང་བདག་གིས་གདུལ་བའི་ཞིང་དུ་གྱུར་ཅིག བདག་འདྲེ་སྲིན་ལ་སོགས་སེམས་ཅན་དེ་དག་ཐམས་ཅད་ཀྱི་ཕ་མ་ལྟ་བུར་གྱུར་ཅིག
འགྲོ་བ་སྒྲོལ་བའི་དེད་དཔོན་ལྟ་བུར་གྱུར་ཅིག མུན་པ་སེལ་བའི་སྒྲོན་མེ་ལྟ་བུར་གྱུར་ཅིག
ཅེས་པ་སོགས་སྨོན་ལམ་རྒྱ་ཆེན་པོ་བཏབ་པར་གསུངས་པ་དང་། སྔོན་ལྷའི་བཟོ་བོ་བི་ཤྭ་ཀརྨས་ད་ལྟའི་སྐུ་བརྙན་ཇོ་བོ་ཤཱཀྱ་མུ་ནི་འདི་བཞེངས་དུས་སྟོན་པས་འདིའི་དབུ་ལ་ཕྱག་བཞག་ནས་མ་འོངས་པར་སྐུ་གཟུགས་འདིས་ངའི་ཚབ་བྱས་ཏེ་ཁ་བ་ཅན་གྱི་ཞིང་ཁམས་སུ་སངས་རྒྱས་ཀྱི་བསྟན་པ་དར་བར་བྱེད་པ་དང་།
དེ་ཚེའི་རྒྱལ་སྲས་སྤྱན་རས་གཟིགས་ཀྱིས་རྗེས་སུ་འཛིན་ཚུལ་སོགས་ལུང་བསྟན་པ་དང་། སྟོན་པ་འཁོར་བཅས་གླང་རིར་བཞུགས་དུས་རྒྱལ་སྲས་རྒྱ་མཚོའི་དབུས་སུ་བོད་གདོང་དམར་ཅན་གྱི་ཡུལ་དུ་བསྟན་པ་སྤེལ་མཁན་སུ་ཡོད་དྲིས་པར་སྤྱན་རས་གཟིགས་བཞེངས་ཏེ་ཁོང་གིས་མཛད་པར་ཁས་བླངས་པ་དང་།
དཀོན་མཆོག་འབངས་ཀྱི་སྐྱེས་རབས་སུ། ཀྱེ་གངས་རིའི་མགོན་པོ་སྤྱན་རས་གཟིགས། །གནས་དེ་ན་ཁྱོད་ཀྱི་ཞིང་ཁམས་ཡོད།
།ཞིང་དེ་ན་ཁྱོད་ཀྱི་གདུལ་བྱ་ཡོད། །ཅེས་ལུང་བསྟན་པ་དག་གིས་སྤྱན་རས་གཟིགས་བོད་ཀྱི་མེ་ཏོག་ཕོག་པའི་ལྷ་སྐལ་དུ་
བཤད་ན་འགལ་བ་ཅི་ཡང་མེད་པ་ཡིན་ནོ། །
གཉིས་པ།
བོད་ཁམས་སྤྱན་རས་གཟིགས་ཀྱི་གདུལ་ཞིང་དུ་གྱུར་པ།
དུས་རབས་བདུན་པར་བྱུང་བའི་བོད་ཀྱི་རྒྱལ་བོ་སྲོང་བཙན་སྒམ་པོའི་མ་ཎི་བཀའ་འབུམ་ལས།
སྔོན་ཆད་བོད་ཀྱི་ས་ཆ་འདིར་སྲིན་པོ་དང་བདུད་ལ་སོགས་པ་མ་རུངས་དག་གིས་ཁྱབ་པ་ལས་འཕགས་པ་སྤྱན་རས་གཟིགས་ཀྱིས་བཀའ་གནང་བཞིན་སྤྲེལ་བྱང་ཆུབ་སེམས་དཔའ་དང་བྲག་སྲིན་མོ་གཉིས་གཉེན་དུ་བསྡེབས་པ་ལས་བོད་མི་རིགས་བྱུང་ནས་སྤྱན་རས་གཟིགས་ཀྱིས་དམ་ཆོས་གསུང་བའི་སྣོད་རུང་དུ་བྱིན་གྱིས་བརླབས། བོད་ཀྱི་རྒྱལ་བོ་ཐོ་ཐོ་རི་གཉན་བཙན་གྱི་རིང་ལ་ཕོ་བྲང་གི་ཡང་ཐོག་ཏུ་གླེགས་བམ་གྱི་ཆར་བབས་ཞེས་པའི་ངོ་མཚར་བའི་བཤད་རྒྱུན་དེ་ནི་བོད་དུ་དམ་པའི་ཆོས་དར་བའི་རྟེན་འབྲེལ་ཡིན་ཞེས་བོད་ཀྱི་ལོ་རྒྱུས་སུ་གསལ་བོར་འཁོད་ཡོད།
དེ་ལས་སྤྱན་རས་གཟིགས་ཀྱི་ཆོས་སྐོར་ཐོག་མར་བོད་དུ་བྱུང་བ་དང་། དེ་བཞིན་བཀའ་གདམས་གླེགས་བམ་ལས་ཀྱང་གསལ་བོར་བསྟན་ཏེ།
ང་གངས་རིའི་མགུལ་དུ་ཆོས་ཀྱི་རྒྱལ། །སེམས་གཡོ་སྒྱུ་མེད་པ་སྲོང་བོར་སྨྲ། །ཆོས་ནུས་མཐུ་བཙན་པས་གཞན་ལ་ཕན།
།མི་བདག་གི་ཡོན་ཏན་སྒམ་པོར་སྤེལ། །ཞེས་གསུངས་པ་བཞིན་སྲོང་བཙན་སྒམ་པོས་བོད་ལ་དམ་པའི་ཆོས་གསར་དུ་སྤེལ་དུས་བོད་སྤྱིའི་མཆོད་གནས་སུ་སྤྱན་རས་གཟིགས་ཀྱི་སྐུ་ཞིག་བཞེངས་པར་དགོངས་པ་ན་ཐུགས་རྗེ་ཆེན་པོ་བཅུ་གཅིག་ཞལ་གྱི་སྐུ་སྟེ་རྗེས་སུ་ཇོ་བོ་རང་བྱོན་ལྔ་ལྡན་དུ་གྲགས་པ་ངོ་མཚར་བའི་ལོ་རྒྱུས་ཅན་དེ་རང་བྱོན་དུ་བྱོན་པ་དང་།
ཐོན་མི་སམ་བྷོ་ཊས་དམ་པའི་ཆོས་ཀྱི་ཐོག་མར་སྤྱན་རས་གཟིགས་ཀྱི་མདོ་རྒྱུད་ཉེར་གཅིག་བསྒྱུར་ཅིང་།
རྒྱལ་བོའི་ཐུགས་དམ་ཉམས་ལེན་གྱི་གཙོ་བོར་མཛད་པའི་སྤྱན་རས་གཟིགས་ཀྱི་ཆོས་སྐོར་དེ་དག་ཕྱོགས་བསྡུས་བྱས་པའི་གསུང་རབ་མ་ཎི་བཀའ་འབུམ་ཞེས་པ་ད་ལྟ་ཡང་བཞུགས་ཡོད།
གླེགས་བམ་འདི་ནི་བོད་དུ་སྤྱན་རས་གཟིགས་ཀྱི་ཆོས་སྐོར་བྱུང་བའི་ཟིན་བྲིས་ཆ་ཚང་བ་ཞིག་དང་།
བོད་ཀྱི་སྤྱན་རས་གཟིགས་ཀྱི་ཆོས་སྐོར་ཆ་ཚང་བ་ཞིག་རེད།
བོད་མིའི་བསམ་པར་སྤྱན་རས་གཟིགས་ཀྱི་ཆོས་སྐོར་བོད་དུ་དར་བར་བྱེད་པ་ནི་ངེས་པར་སྤྱན་རས་གཟིགས་ཀྱི་སྤྲུལ་བ་ཞིག་གིས་བྱ་དགོས་པའི་དོན་ཞིག་ལས་གཞན་སུ་ཞིག་གིས་ཀྱང་བསྒྲུབ་མི་ནུས་པས་སྲོང་བཙན་སྒམ་པོ་ནི་བོད་ཀྱི་རྒྱལ་བོའི་ཚུལ་བཟུང་
བའི་སྤྱན་རས་གཟིགས་གསོན་པོ་ཞིག་ཏུ་འདོད་པ་ཡིན།
དེ་ནས་བཟུང་བོད་དུ་སྤྱན་རས་གཟིགས་བསམ་བཞིན་དུ་སྐུའི་སྐྱེ་བ་བཞེངས་པར་གསུངས་ཏེ།
དཔེར་ན། འབྲོམ་སྟོན་པ་རྒྱལ་བའི་འབྱུང་གནས་དང་རྒྱལ་བ་སྐུ་ཕྲེང་རིམ་བྱོན་ལྟ་བུ་བོད་ཀྱི་བསྟན་པ་དང་འགྲོ་བའི་སླད་དུ་བསྟན་པ་སྐྱོང་བའི་སྐྱེས་བུ་དམ་པ་དག་གི་སྐྱེ་བ་བཞེས་པར་འདོད་ཅིང་།
སྤྱན་རས་གཟིགས་ཀྱི་བྱིན་རླབས་སྙིང་ལ་ཞུགས་པའི་ལོ་ཙཱ་བ་མང་བོ་བྱུང་ནས་གང་གི་ཆོས་སྐོར་མང་བོ་བོད་དུ་བསྒྱུར་བ་ལས་བོད་ཡུལ་འདི་སྤྱན་རས་གཟིགས་ཀྱི་ཡུལ་དུ་གྱུར་ཅིང་བོད་མི་རིགས་འདི་སྤྱན་རས་གཟིགས་ཀྱི་གདུལ་བྱར་གྱུར་པས་ཆོས་མགོ་ཡི་གེ་དྲུག་མ་དང་ལྷའི་མགོ་སྤྱན་རས་གཟིགས་ཀྱིས་འཛིན་པ་སྲོལ་དུ་གྱུར།
བོད་མི་རྒན་གཞོན་ཆེ་ཆུང་སུ་ཡིན་རུང་མ་ཎི་མི་འདོན་པ་མེད། ཐུགས་རྗེ་ཆེན་པོའི་སྒྲུབ་ཆེན་སྒྲུབ་ཆུང་སོགས་ཆོས་ཀྱི་སྲོལ་གྱིས་བོད་ཡུལ་ཁྱབ་པས་ན་བོད་ཕྲེང་བཟུང་གི་
ལུང་བ་ཞེས་གྲགས་ཤིང་། བོད་ཀྱི་ཁ་དཔེ་ལ་ཡང་། ཐུགས་རྗེ་ཆེན་པོ་མ་གཏོགས་ལྷ་མེད། ཡི་གེ་དྲུག་མ་མ་གཏོགས་ཆོས་མེད།
ཅེས་དང་། ལྷ་སྐལ་ཐུགས་རྗེ་ཆེན་པོ་ཡིན། །ཆོས་སྐལ་ཡི་གེ་དྲུག་མ་ཡིན། །ཞེས་དང་། འདུག་ས་ཁ་བ་ཅན་ཡིན།
།འགྲོ་ས་བདེ་བ་ཅན་ཡིན། །ཞེས་བཤད།
གསུམ་པ།
བོད་དུ་དར་བའི་སྤྱན་རས་གཟིགས་དང་དེའི་ཆོས་སྐོར།
གོང་དུ་བཤད་པ་ལྟར་བོད་དུ་དམ་པའི་ཆོས་ཀྱི་ཐོག་མའི་གླེགས་བམ་ནི་སྤྱན་རས་གཟིགས་ཀྱི་ཆོས་སྐོར་ཡིན་པ་དང་དེ་ནས་བཟུང་སྟོན་པའི་གསུང་དང་རྒྱ་བོད་མཁས་པ་དག་གིས་གསུངས་པའི་སྤྱན་རས་གཟིགས་ཀྱི་ཆོས་སྐོར་མཐའ་ཡས་པ་བྱུང་།
ད་ལྟ་བོད་དུ་བསྒྱུར་བའི་བཀའ་འགྱུར་ཁྲོད་དུ་སྙིང་རྗེ་པད་མ་དཀར་བོ་དང་། མདོ་སྡེ་ཟ་མ་ཏོག སྙིང་རྗེ་ཆེན་པོ་ངེས་པར་བསྟན་པའི་མདོ། སྤྱན་རས་གཟིགས་ཀྱི་མཚན་བརྒྱ་རྩ་བརྒྱད།
རྩ་རྒྱུད་པད་མའི་དྲ་བ། དོན་ཞགས་ཆོ་ག་ཞིབ་མོ་སོགས་སྤྱན་རས་གཟིགས་ཀྱི་ཆོས་སྐོར་པོད་བཅུ་ལྷག་བཞུགས་ཤིང་སློབ་དཔོན་ཀླུ་སྒྲུབ་ཀྱི་ཕྱག་སྟོང་སྤྱན་སྟོང་གི་སྒྲུབ་ཐབས་དང་།
སྲོང་བཙན་སྒམ་པོའི་ཐུགས་རྗེ་ཆེན་པོའི་སྒྲུབ་ཐབས་ཆེན་མོ། སློབ་དཔོན་པད་མའི་ཡི་གེ་དྲུག་མའི་སྒྲུབ་ཐབས།
ཡི་གེ་དྲུག་པའི་སྔགས་ཀྱི་རིམ་པ། ཇོ་བོ་རྗེའི་ཁ་སར་པ་ཎིའི་སྒྲུབ་ཐབས། དགེ་སློབ་མ་དཔལ་མོའི་བཅུ་གཅིག་ཞལ་གྱི་སྒྲུབ་ཐབས།
ཐང་སྟོང་རྒྱལ་བོའི་ཡི་གེ་དྲུག་མའི་ཉམས་ལེན། རྗེ་ཙོང་ཁ་བའི་སྔགས་ཕྱོགས་དང་། མཁས་གྲུབ་ཀྱི་རྒྱུད་སྡེ་སྤྱིའི་རྣམ།
ལྷ་བཙུན་སྐལ་བཟང་ཆོས་འཕེལ་གྱི་ཐུགས་རྗེ་ཆེན་པོའི་བེའུ་བུམ་སོགས་མཐའ་ཡས་སོ། ། བོད་དུ་བསྒྱུར་བའི་སྤྱན་རས་གཟིགས་ཀྱི་སྒྲུབ་ཐབས་སྐོར་དག་ན་རྣམ་པ་མི་འདྲ་བར་གདུལ་བྱ་ལ་སྣ་ཚོགས་ཚུལ་སྟོན་མཛད་པའི་སྤྱན་རས་གཟིགས་མི་འདྲ་བ་རེ་དགུ་
ཙམ་ཡོད་ལ། དེ་དག་ཀྱང་གདུལ་བྱའི་སླད་དུ་ཚུལ་མི་འདྲ་བ་བསྟན་པ་དང་རྒྱུད་པ་སོ་སོའི་ལུགས་མི་འདྲ་བ་ལས་ངོ་བོའི་ཆ་ནས་རིགས་གཅིག་ཏུ་མ་འདུས་པ་མེད་དེ་སྤྱན་རས་གཟིགས་ནི་གང་ལ་གང་འདུལ་བསྟན་པ་ཙམ་ཡིན་ནོ།
།
སྤྱན་རས་གཟིགས་དེ་དག་ལ་སྒྲུབ་བྱེད་ཀྱི་ཆོ་ག་ཡང་མི་འདྲ་བ་རེ་ཡོད་དེ་ཆོ་ག་དག་ཏུ་ཡང་ལམ་དང་འབྲས་བུ་དག་པ་ལ་གཞིའི་དཔེ་སྦྱར་ནས་གསུངས་ཡོད་ཅིང་།
ཁོང་གི་སྐུ་གཟུགས་དང་ཕྱག་མཚན་དག་གིས་ཀྱང་གཞི་ལམ་འབྲས་གསུམ་གྱི་རྣམ་གཞག་ཆ་ཚང་སྟོན་སྟེ་དོན་ཞགས་ཆོ་ག་ཞིབ་མོའི་རྒྱུད་ལས།
རིན་པོ་ཆེ་སྣ་ཚོགས་འདོད་ན་ཡིད་བཞིན་ནོར་བུ་ཐོགས་པ་དང་། མིག་མི་གསལ་ན་མིག་ཤེལ་ནོར་བུ་ཐོགས་པ་དང་།
ཡོན་ཏན་སྣ་ཚོགས་འདོད་ན་པད་མ་དཀར་བོ་ཐོགས་པ་དང་། ཞིང་དམ་པར་སྐྱེ་བར་འདོད་ན་པད་མ་སྔོན་པོ་ཐོགས་པ་དང་།
དེ་བཞིན་གཤེགས་པ་མཐོང་བར་འདོད་ན་པད་མ་དམར་བོ་ཐོགས་པ་ལ་མཆོད་དོ། །ཞེས་གསུངས་པ་སོགས་ཕྱག་མཚན་གྱི་སྒོ་ནས་ཀྱང་ལས་རབ་འབྱམས་སྒྲུབ་ཚུལ་མཐའ་ཡས་པར་གསུངས།
བཞི་བ།
ཐུགས་རྗེ་ཆེན་པོའི་ཆོས་སྐོར་གྱི་སྙིང་བོ་མ་ཎི་ཡི་གེ་དྲུག་མའི་གོ་དོན་དང་ཕན་ཡོན།
ཡི་གེ་དྲུག་མ་འདི་ནི་སངས་རྒྱས་ཐམས་ཅད་ཀྱི་དགོངས་པ་གཅིག་ཏུ་བསྡུས་པའི་བདག་ཉིད་དང་།
ཆོས་ཀྱི་ཕུང་བོ་བརྒྱད་ཁྲི་བཞི་སྟོང་གི་རྩ་བ་གཅིག་ཏུ་བསྡུས་པའི་སྙིང་བོ། སངས་རྒྱས་རིགས་ལྔ་དང་གསང་བའི་བདག་པོ་རྣམས་ཀྱི་སྙིང་བོ་ཡིག་འབྲུ་རེ་རེ་ནས་བསྡུས་པའི་གཟུངས་སྔགས།
དགེ་ལེགས་ཡོན་ཏན་ཐམས་ཅད་ཀྱི་འབྱུང་གནས། ཕན་ བདེ་དངོས་གྲུབ་ཐམས་ཅད་ཀྱི་རྩ་བ། མཐོ་རིས་དང་ཐར་བ་ཆེན་པོའི་ལམ་ཆེན་ཡིན་ཏེ།
དེ་ལས་ཨོཾ་ནི་མཆོག་གི་དངོས་གྲུབ་གཏན་གྱི་བདེ་བ་བླ་ན་མེད་པའི་སངས་རྒྱས་ཀྱི་གོ་ འཕང་དང་།
ཐུན་མོང་གི་དངོས་གྲུབ་བཀྲ་ཤིས་པ་དང་། ནོར་དང་། དཔལ་དང་། སྐལ་བ་བཟང་བོ་སོགས་དོན་དུ་གཉེར་བྱའི་དངོས་གྲུབ་རྣམ་གཉིས་ལ་གོ་ཞིང་། མ་ཎི་ཞེས་པ་ནོར་བུ་སྟེ་འཕགས་མཆོག་ཐུགས་རྗེ་ཆེན་པོའི་རྩ་ཕྱག་གཉིས་ཐུགས་ཀར་ཐལ་མོ་སྦྱར་བའི་བར་དུ་འཛིན་པའི་ནོར་བུ་སྟེ་དེས་འཕགས་མཆོག་གང་ལ་དད་པས་བསྙེན་པའི་འགྲོ་བ་རིས་སུ་མ་ཆད་པ་རྣམས་ལ་གནས་སྐབས་དང་མཐར་ཐུག་གི་དགོས་དོན་མཐའ་དག་ཡིད་བཞིན་དུ་སྩོལ་བ་མཚོན། པད་མ་ནི་འཕགས་པ་སྤྱན་རས་གཟིགས་ཀྱིས་ཕྱག་ན་བསྣམས་པའི་རྡུལ་དང་བྲལ་བའི་པད་མ་དཀར་བོ་སྟེ་དེས་སྲིད་པར་གནས་ཀྱང་སྲིད་པའི་སྐྱོན་ཕྲ་མོ་ཙམ་ཡང་མ་གོས་པ་མཚོན།
པད་མ་ལ་ཨེ་ཡིག་སྦྱར་ནས་པད་མེ་ཞེས་གྲུབ་པ་ནི་པད་མ་དང་ནོར་བུ་འཛིན་པའི་ལྷ་མཆོག་དེ་ལ་འབོད་པའི་དོན་ཡིན། ཧཱུཾ་ཞེས་སྨོས་པ་ནི་འཕགས་མཆོག་ཐུགས་རྗེ་ཆེན་པོའི་ལྷ་མཆོག་དེས་བསྐུལ་ནས་ཨོཾ་གྱིས་མཚོན་པའི་གནས་སྐབས་དང་མཐར་ཐུག་གི་འདོད་དོན་གྱི་དངོས་གྲུབ་དེ་དག་བདག་ལ་སྩོལ་བར་མཛད་དུ་གསོལ་ཞེས་པའི་དོན་ཡིན།
ཨོཾ་མ་ཎི་པད་མེ་ཧཱུཾ། ཞེས་སྒྲུབ་པ་བོ་ལ་མཆོག་དང་ཐུན་མོང་གི་དངོས་གྲུབ་སྩོལ་ཅིག་ཅེས་གསོལ་བ་འདེབས་པ་ཡིན་ནོ།
། མ་ཎི་ཡི་གེ་དྲུག་མ་འདི་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་པས་ཕན་ཡོན་ལ་མཐའ་མེད་ཀྱང་མ་ཎི་བཀའ་འབུམ་ལས་འབྱུང་བ་ལྟར་ན།
འགྲོ་བ་རིགས་དྲུག་གི་སྐྱེ་སྒོ་གཅོད་ཅིང་སྒྲིབ་པ་སྦྱོང་བ་ཡིན་ཏེ། ཨོཾ་གྱིས་ལྷ་འཆི་འཕོ་ལྟུང་བའི་སྡུག་བསྔལ་སྦྱངས་ནས་ལྷའི་སྐྱེ་སྒོ་གཅོད། མས་ལྷ་མ་ཡིན་གྱི་འཐབ་རྩོད་ཀྱི་སྡུག་བསྔལ་སྦྱངས་ནས་ལྷ་མ་ཡིན་གྱི་སྐྱེ་སྒོ་གཅོད། ཎིས་མི་ཡིས་སྐྱེ་རྒ་ན་འཆིའི་སྡུག་བསྔལ་སྦྱངས་ནས་མིའི་སྐྱེ་སྒོ་གཅོད། པད་ཀྱིས་བྱོལ་སོང་གླེན་ལྐུགས་བཀོལ་སྤྱོད་ཀྱི་སྡུགས་བསྔལ་སྦྱངས་ནས་དུད་འགྲོའི་སྐྱེ་སྒོ་གཅོད། མེས་ཡི་དྭགས་བཀྲེས་སྐོམ་གྱིས་སྡུག་བསྔལ་སྦྱངས་ནས་ཡི་དྭགས་ཀྱི་སྐྱེ་སྒོ་གཅོད། ཧཱུཾ་གིས་དམྱལ་བའི་ཚ་གྲང་སྡུག་བསྔལ་སྦྱངས་ནས་དམྱལ་བའི་སྐྱེ་སྒོ་གཅོད་པར་གསུངས་པ་མ་ཟད་མ་ཎི་ཡི་གེ་དྲུག་མ་འདི་དད་པས（1）མཐོང་བས་ཕྱིར་མི་ལྡོག་པའི་ས་འཐོབ་ནས་འགྲོ་བ་སྒྲོལ་བའི་དེད་དཔོན་དུ་འགྱུར་བ།（2）ཐོས་པས་བདེ་འགྲོ་མཐོ་རིས་ཀྱི་ལུས་འཐོབ་པ།（3）བཀླགས་པས་ལས་ངན་སྡིག་སྒྲིབ་མཐའ་དག་དག་ཅིང་འདི་ཕྱི་བསམ་པའི་དོན་ཀུན་འགྲུབ་པ།（4）དྲན་པས་ཚེ་འཁོར་བ་ཐོག་མ་མེད་པ་ནས་བསགས་པའི་ལས་ངན་སྡིག་སྒྲིབ་མཐའ་དག་འདག་པ།（5）རེག་པས་སངས་རྒྱས་དང་བྱང་ཆུབ་སེམས་དཔའ་དཔག་མེད་ཀྱི་དབང་བསྐུར་ཐོབ་པ།（6）ལུས་ལ་བཅང་ན་ནད་རིགས་བཞི་བརྒྱ་རྩ་བཞི་དང་གཟའ་གདོན་དག་གིས་གནོད་པས་མི་ཚུགས་པ།（7）བྲིས་ན་ཆོས་ཀྱི་ཕུང་བོ་བརྒྱད་ཁྲི་བཞི་སྟོང་བྲིས་པ་དང་མཉམ་པས་ཚེ་འདིར་བདེ་སྐྱིད་ལོངས་སྤྱད་ནས་ཚེ་གཅིག་ལུས་གཅིག་ལ་སངས་རྒྱས་པའི་འབྲས་བུ་ཐོབ་པ།（8）འཆི་ཁ་མའི་སྲོག་ཆགས་དང་དུད་འགྲོའི་རྣ་བར་བསྒྲགས་ན་ལུས་དེ་ལས་གྲོལ་ཏེ་བདེ་བ་ཅན་དུ་སྐྱེ་བར་འགྱུར།（9）འཁོར་ལོ་བསྐོར་ན་མཚམས་མེད་ལྔ་སོགས་མི་དགེ་བ་སྦྱོང་ཞིང་ནད་གདོན་གནོད་བྱེད་ཀྱིས་མི་ཚུགས་ཤིང་བསམ་པའི་དོན་ཀུན་འགྲུབ།（10）ཕྱི་མར་བདེ་བ་ཅན་དུ་སྐྱེས་ནས་ས་བཅུ་ལམ་ལྔ་རིམ་གྱིས་བགྲོད་པ་སོགས་ཕན་
ཡོན་མཐའ་ཡས་པ་འབྱུང་སྟེ་རི་རྒྱལ་བོ་རི་རབ་སྲང་ལ་གཞལ་ནུས་ཀྱི་ཡི་གེ་དྲུག་མ་ལན་ ཅིག་བཟླས་པའི་བསོད་ནམས་ནི་སུས་ཀྱང་བགྲང་བར་མི་ནུས་སོ།
།ཞེས་གསུངས་སོ། ། དེ་བས་སྐབས་གང་དང་གང་དུ་ཡང་ཐེ་ཚོམ་མེད་པར་བློ་སེམས་རྩེ་གཅིག་གིས་འགྲོ་བ་རིགས་དྲུག་དང་དགྲ་གཉེན་རིས་སུ་མ་ཆད་པའི་སེམས་ཅད་ཐམས་ཅད་ཀྱི་དོན་དུ་ཡི་གེ་དྲུག་མ་འདི་ཀློག་པ་དང་།
སྒོམ་པར་བྱས་ན་སྒྲིབ་པ་སྦྱོང་བ་དང་། བྱིན་གྱིས་བརླབས་པ་སོགས་གནས་སྐབས་དང་མཐར་ཐུག་གི་འབྲས་བུ་ཐོབ་པར་བྱེད།
ལྔ་བ།
བོད་ཀྱི་འཚོ་བའི་ཁྲོད་སྤྱན་རས་གཟིགས་ཀྱི་ཆོས་ཀྱི་ཉམས་ལེན།
འཕགས་པ་སྤྱན་རས་གཟིགས་ཀྱིས་བྱིན་གྱིས་རླབས་ནས་ལོ་ངོ་ཆིག་སྟོང་ལྷག་གི་རིང་ལ་སྤྱན་རས་གཟིགས་ཀྱི་ཆོས་སྐོར་འདི་དག་བོད་མི་རིགས་ཀྱི་སེམས་ཁམས་དང་གོམས་སྲོལ།
རིག་གནས་བཅས་ཕྱོགས་གང་ཐད་ལ་ཤུགས་རྐྱེན་ཆེན་པོ་ཞིག་ཐེབས་ཡོད། བོད་མི་ཕལ་བ་དག་གིས་བསམ་པར་ཡང་སྤྱན་རས་གཟིགས་ཀྱིས་རྟག་ཏུ་བདག་ཅག་ལ་གཟིགས་ཡོད་པར་འདོད་ཅིང་བོད་མི་ཀུན་གྱིས་སྤྱན་རས་གཟིགས་ཀྱི་དབང་གསན་ནས་ཉམས་ལེན་བྱེད་པས་བོད་ཀྱི་ཁ་དཔེར།
རྒྱལ་སའི་མི་ལས་རི་ཁྲོད་ཀྱི་སྒོམ་ཆེན་མང་ཟེར། དེ་བས་བོད་ཀྱི་རྒྱུན་ལྡན་གྱི་འཚོ་བའི་ཁྲོད་དུ་སྤྱན་རས་གཟིགས་ཀྱི་ཆོས་སྐོར་གྱི་ཤུགས་རྐྱེན་ཐེབས་ཡོད་པ་འདི་ལྟར།
1བསམ་བློའི་ཐད་ནས་སྤྱན་རས་གཟིགས་ཀྱི་གཞན་ཕན་གྱི་བསམ་བློ་ལ་བདག་གཞན་དང་སྲོག་ཆགས་ཐམས་ཅད་ལ་འདྲ་མཉམ་གྱི་ལྟ་ཚུལ་འཛིན་པ་དང་།
གཞན་ཕན་གྱི་བྱ་བ་སྒྲུབ་མཁན་ཞིག་ཡིན་ཕྱིན་དེ་ནི་སྐྱེས་བུ་དམ་པ་ཞིག་ཡིན་པར་འདོད་ཅིང་།
དེ་ནི་འཇིག་རྟེན་འདིར་ཆེས་ཕུལ་དུ་བྱུང་བ་ཞིག་ཡིན་པར་བསམ་གྱིན་ཡོད། བོད་མི་རིགས་ཀྱི་དགེ་སྒྲུབ་སྡིག་སྤོང་གི་ཕྱོགས་དང་སྤྱི་ཚོགས་བདེ་དགེའི་ཆེད་དུ་ནུས་པ་ཆེན་པོ་ཞིག་ཐོན་པ་རེད། 2རི་ཁ་དང་རི་རྩེ་དག་གི་མ་ཎི་ཡི་གེ་དྲུག་མའི་དར་ལྕོག་སྣ་ཚོགས་གང་འགར་སྐྱོད་པར་བྱེད་པ་དེ་ནི་ནད་རིམས་འཐབ་རྩོད་ཞི་ཞིང་སད་སེར་མུ་གེ་ལ་སོགས་མི་འབྱུང་བར་བདེ་དགེ་ལེགས་ཚོགས་འཕེལ་བའི་ཆེད་དུ་ཡིན།
བོད་མིས་ནམ་ཡང་མ་ཎིའི་དར་ལྕོག་སློང་བ་ནི་མ་ཎི་འདོན་པ་ལྟ་བུའི་དགེ་བ་ཆེ་བར་འདོད་པས་རྒྱུན་དུ་དར་ལྕོག་འཛུགས།
3བོད་མི་དག་གིས་བྱ་བ་གང་ལ་ཐུག་ཀྱང་མ་ཎི་འདོན་པ་དང་ཤི་བའི་མིའི་མིང་
ཐོས་ན་དགྲ་གཉེན་ལ་མི་ལྟ་བར་དེའི་ཆེད་དུ་མ་ཎི་འདོན། ཐ་ན་སྲོག་ཆགས་ཤིག་ཤི་བ་མཐོང་བ་དང་ཤ་ཟ་བའི་དུས་སུ་ཡང་སྲོག་ཆགས་དེ་དག་གི་ཆེད་དུ་མ་ཎི་འདོན་པ།
བོད་དུ་རང་ག་བའི་སྐྱེ་བོ་ཕོ་མོའི་ནང་དུ་མ་ཎི་དུང་ཕྱུར་འགའ་རེ་འདོན་མཁན་མང་ལ་བློ་རྩེ་འགྱུར་བ་མེད་པར་མ་ཎི་དུང་ཕྱུར་འདོན་པར་ཁས་ལེན་མཁན་ཡང་མང་།
ལྷག་པར་མི་ཤི་བའི་ཚེ་རྒན་གཞོན་ཕོ་མོ་མཐའ་དག་ཁྱིམ་དེར་འཛོམས་ནས་མ་ཎི་དབྱངས་སུ་གྱེར་ནས་ལེན།
མ་ཎི་བཏོན་པས་སྤྱན་རས་གཟིགས་ཀྱི་ཞལ་མཐོང་བ་དང་ལོང་བར་མིག་ཐོབ་པ་དང་འོན་པས་སྒྲ་ཐོས་པས་མངོན་ཤེས་ཐོབ་པ།
ལོ་བདུན་བཅུ་བརྒྱད་ཅུ་བར་དུང་སོ་གསར་བ་སྐྱེ་བ་སོགས་ཅི་བསམ་གྲུབ་པའི་ལོ་རྒྱུས་ཀྱང་ཤིན་ཏུ་མང་།
4མ་ཎི་འཁོར་ལོ་ནི་རྒྱུད་སྡེ་ལས་སྔགས་ཀྱི་འཁོར་ལོ་བསྐོར་བ་དེའི་དོད་དུ་གཟུངས་སྔགས་ཡི་གེར་བྲིས་ཏེ་འཁོར་ལོ་བསྐོར་བས་དེ་བསྒོམ་པའི་ཕན་ཡོན་ཇི་བཞིན་འབྱུང་བ་མདོ་སྡེ་པད་མ་དཀར་བོ་ལས་གསུངས།
བོད་ཀྱི་སྡེ་བ་རེ་ན་མ་ཎི་ཁང་རེ་ཡོད་ལ་དེ་ན་འཁོར་ལོ་ཆེན་པོ་མ་ཎི་དུང་ཕྱུར་འགའ་གཅིག་ཏུ་དྲིལ་ནས་བསྐོར་ཡོད།
དུས་ཆེན་གྱི་ཚེ་སྐྱེས་བོ་ཕོ་མོ་མཐའ་དག་དེར་འཛོམས་ནས་མ་ཎི་འཁོར་ལོ་བསྐོར་བ་དང་སྡེ་བ་ལ་ལས་ལོ་ཉི་ཤུའི་ལྷག་ལ་རྒྱུན་མ་ཆད་པར་བསྐོར་བ་ཡང་མང་།
མ་ཎི་མང་བོ་ལས་བདུད་རྩི་བཞུར་བ་ཡང་ཤིན་ཏུ་མང་བོ་མཐོང་རྒྱུ་ཡོད།
5རི་བྲག་གི་ངོས་སུ་མ་ཎི་ཡི་གེ་དྲུག་མ་བརྐོས་ནས་དེ་མཐོང་བ་དག་ལ་ཐར་བའི་ས་བོན་བསྐྲུན་པ་དང་།
བཞེངས་མཁན་གྱི་ངོས་ནས་ཚོགས་བསག་སྒྲིབ་སྦྱོང་བྱེད་པ།
6བཞི་བའི་ནང་དུ་མ་གཅིག་དཔལ་མོ་ནས་བརྒྱུད་པའི་སྤྱན་རས་གཟིགས་དང་འབྲེལ་བའི་སྨྱུང་གནས་གཏོང་བ་ཡིན་ལ་དེ་ལ་ཁྱིམ་རེ་ནས་ཕལ་ཆེར་མི་རེ་ངེས་པར་དགོས་ཤིང་དེ་ཡང་ཉིན་དང་བོར་གུང་ཚིགས་ལ་ཟས་གཅིག་ཟ་བ་ལས་གཞན་དུ་ཟས་མི་ཟ་ཞིང་།
ཕྱི་ཉིན་ཟས་མི་ཟ་ཞིང་བཟླས་བརྗོད་ལས་གཞན་པའི་ངག་མི་སྨྲ་བའི་ཆོ་ག་ཞིག་སྟེ་མི་ཞིག་ཚེ་ལས་འདས་ཚེ་སྨྱུང་གནས་ཆོག་བརྒྱད་ཅིག་ངེས་པར་བསྲུང་དགོས་ལ་ཚེ་
གང་བོར་སྨྱུང་གནས་སྲུང་མཁན་ཡང་ཡོད།
7ཁྱིམ་ཚང་ལ་ཆ་རྐྱེན་ཡོད་པའི་ཁྱིམ་ཚང་གིས་ལོ་རེ་བཞིན་ཚོགས་བསག་སྒྲིབ་སྦྱངས་ཀྱི་ཆེད་དུ་སྤྱན་རས་གཟིགས་ཀྱི་སྟོང་མཆོད་འབུལ་བ་དང་།
ཡང་ན་ནད་པ་དང་ཚེ་འདས་སོགས་ཀྱི་དགེ་རྩར་སྟོང་མཆོད་འབུལ་བའི་སྲོལ་ཡོད།
མཇུག་གི་གཏམ།
འཕགས་པ་སྤྱན་རས་གཟིགས་དང་བོད་མི་རིགས་བར་གྱི་ལས་འབྲེལ་ནི་ཆེས་དམིགས་བསལ་ཞིག་ཡིན་ལ།
བོད་མིས་སྤྱན་རས་གཟིགས་ཀྱི་ཆོས་སྐོར་ཉམས་སུ་བླངས་པས་ཆོས་དངའཇིག་རྟེན་གང་གི་ཕྱོགས་ནས་བཤད་ཀྱང་དགེ་མཚན་ཆེན་པོ་བྱུང་ཡོད།
ང་ཚོས་ལོ་རྒྱུས་ཀྱི་ཉམས་མྱོང་གཞིར་བཟུང་ནས་སྤྱན་རས་གཟིགས་ཀྱི་ཆོས་སྐོར་འདི་མུ་མཐུད་དུ་ཕྱོགས་ཡོངས་ནས་དར་སྤེལ་དུ་གཏོང་བ་ནི་སྤྱན་རས་གཟིགས་ཀྱི་ཆེད་ཡིན། འགྲོ་བ་འབའ་ཞིག་གི་ཆེད་དུ་བསམ་པའི་ཐུགས་དགོངས་རླབས་ཆེན་མངོན་དུ་གྱུར་པས་བདག་ཅག་ཀུན་གྱིས་མུ་མཐུད་དུ་བརྩོན་པ་བྱ་དགོས།
|