མགོ་ལོག་ས་ཁུལ་གྱི་སྐབས་དང་བོའི་གངས་ལྗོངས་ཤེས་རིག་ནོར་བུའི་སློབ་གླིང་གི་དགེ་སློབ་དགྱེས་འཛོམས།

       ༢༠༡༦ལོའི་སྤྱི་ཟླ༡༠བའི་ཚེས༡ཉིན་གྱི་ཞོགས་པའི་ཆུ་ཚོད་དགུ་དང་ཕྱེད་ཀའི་སྟེང་ཡང་ཝའི་རྫ་དམར་མཐོན་པོའི་གཡས་ཟུར་གྱི་ཡང་ཝའི་ཉག་ཁ་ནས་དགེ་རྒན་རྣམ་པར་ཆིབས་བསུ་བྱས་ཏེ་མཉམ་གཅིག་ཏུ་རྟེན་འབྲེལ་གྱི་ལྷ་བསང་དཀར་བོ་ཕུད་པ་དང་། རླངས་འཁོར་གྱི་ཕྲེང་བས་མདུན་བསུས་ཏེ་སློབ་དཔོན་རྣམས་དུང་དཀར་གསོལ་ཚིགས་གླིང་དུ་བསུ་བ་རྒྱ་ཆེན་པོ་བྱས། ཐེངས་འདིའི་མགོ་ལོག་ས་ཁུལ་གྱི་སྐབས་དང་བོའི་དགེ་སློབ་དགྱེས་འཛོམས་སྟེང་གངས་ལྗོངས་ཤེས་རིག་ནོར་བུའི་སློབ་གླིང་གི་སློབ་དཔོན་ཆེན་མོ་རྭ་རྒྱ་འཇིགས་མེད་རྒྱལ་མཚན་མཆོག་དང་སློབ་དཔོན་ཆེན་མོ་བཛྲ་ཚུལ་ཁྲིམས་རྒྱ་མཚོ། ལྡོང་ཡོན་ཏན་རྒྱ་མཚོ་དང་གྲགས་པ་བཟང་པོ་བཅས་སློབ་དཔོན་རྣམས་གཙོ་བྱས་ཏེ་མགོ་ལོག་ས་ཁུལ་གྱི་སློབ་མ་བརྒྱ་ལྷག་ཅིག་དང་། གཞན་གངས་ལྗོངས་རྩྭ་ཐང་བུ་མོའི་སློབ་གྲྭའི་འཐུས་ཚབ་མི་སྣ།  གངས་ལྗོངས་འབྲི་མོའི་སྤྲི་ཆུར་བཟོ་གྲྭའི་འཐུས་ཚབ་མི་སྣ།  གངས་ལྗོངས་ཤེས་རིག་ནོར་བུའི་སློབ་གླིང་གི་ཐོན་མིའི་སློབ་ཚོགས་ཀྱི་ལས་འཛིན་མི་སྣ་སོགས་དགེ་སློབ་ལྷན་འཛོམས་ཀྱི་སྤྲོ་ཚོགས་སྟེང་དུ་ཞུགས་ཡོད། ཐོག་མར་སློབ་གྲོགས་ཡོངས་ཡར་བཞེངས་ནས་མཉམ་གཅིག་ཏུ་སློབ་གླུ་བླངས་པ་དང་།  དེ་ནས་གཙང་སྐོར་ཐུབ་བསྟན་ཡེ་ཤེས་ཀྱིས་མགོ་ལོག་ས་ཁུལ་གྱི་མཐར་ཕྱིན་སློབ་མའི་གནས་ཚུལ་དང་དགྱེས་འཛོམས་ཀྱི་དམིགས་ཡུལ། དགོས་མཁོ་སོགས་སྙན་ཞུ་བྱས།  སློབ་དཔོན་ཆེན་མོ་འཇིགས་མེད་རྒྱལ་མཚན་དང་སློབ་དཔོན་ཆེན་མོ་བཛྲ་ཚུལ་ཁྲིམས་རྒྱ་མཚོ་མཆོག   སློབ་དཔོན་ལྡོང་ཡོན་ཏན་རྒྱ་མཚོ་མཆོག  སློབ་དཔོན་གྲགས་པ་བཟང་པོ་བཅས་ཀྱིས་སློབ་མ་ཡོངས་ལ་མི་ཚེའི་ཁ་ཕྱོགས་མ་ནོར་བའི་བསམ་བློ་དང་མི་གཞི་ཡོད་དགོས་ཚུལ་སོགས་རིན་ཐང་བྲལ་བའི་བསླབ་བྱ་གནང་བར་མ་ཟད།  རྩྭ་ཐང་བུ་མོའི་སློབ་གྲྭའི་སློབ་གཙོ་ཡུལ་ལྷ་ཐར་གྱིས་རྩྭ་ཐང་བུ་མོའི་སློབ་གྲྭའི་སློབ་བསྒྲུབ་ཀྱི་ཁ་ཕྱོགས་དང་སློབ་ཁྲིད་ཀྱི་སྒྲིག་གཞིའི་སྐོར་ནས་གཏམ་བཤད་གནང་བ་དང་།   མཐར་དགེ་རྒན་རྣམས་ལ་སློབ་གྲོགས་རྣམས་ཀྱིས་སེམས་འདུན་མཚོན་པའི་ལེགས་སྐྱེས་ཕུལ་བ་དང་། དགེ་སློབ་ལྷན་འཛོམས་ཀྱི་དྲན་རྟེན་མཉམ་པར་བླངས་ཏེ་མགོ་ལོག་ས་ཁུལ་གྱི་སྐབས་དང་པོའི་གངས་ལྗོངས་ཤེས་རིག་ནོར་བུའི་སློབ་གླིང་གི་དགེ་སློབ་དགྱེས་འཛོམས་ཆེན་མོ་རྒྱལ་ཁ་དང་གཟི་བརྗིད་ངང་མཇུག་བསྡུས།

སློབ་དཔོན་རྣམས་ཀྱིས་སློབ་མ་ཡོངས་ལ་མི་ཚེའི་ཁ་ཕྱོགས་མ་ནོར་བའི་བསམ་བློ་དང་མི་གཞི་ཡོད་དགོས་ཚུལ་སོགས་རིན་ཐང་བྲལ་བའི་བསླབ་བྱ་གནང་བ།

གཟབ་ནན་གྱིས་དགེ་རྒན་རྣམས་ཀྱི་བཀའ་སློབ་ལམ་སྟོན་ལ་ཉན་བཞིན་པ།

ཚོགས་རའི་ཡུལ་དངོས།

རྫོང་ཁག་སོ་སོའི་སློབ་གྲོགས་རྣམས་ཀྱིས་གྲོས་ཀ་གནང་བཞིན་པ།

མཐར་དགེ་རྒན་རྣམས་ལ་སློབ་གྲོགས་རྣམས་ཀྱིས་སེམས་འདུན་མཚོན་པའི་ལེགས་སྐྱེས་འབུལ་བཞིན་པ།

ཚོགས་ཞུགས་ཡོངས་ཀྱི་མཉམ་པར།

གསར་འགྱུར་མཁོ་སྤྲོད་པ། གསར་འགོད་པ།  རྨ་གཞུང་བཙན་སྲས།