༄༅།། གནད་ཀྱི་དོན་བཅུ་དྲུག་མ་ཞེས་བྱ་བ་བཞུགས་སོ།།

པཎྚིཏ་ཆེན་པོ་ལྷ་སྡེ་༧ཡེ་ཤེས་རྒྱ་མཚོ།

རྒྱལ་ཀུན་སྙིང་རྗེའི་རང་གཟུགས་སྤྱན་རས་གཟིགས༎

ངུར་སྨྲིག་རྣམ་རོལ་བླ་མ་རྡོ་རྗེ་འཆང་༎

བདག་ཅག་དེང་ནས་བྱང་ཆུང་མ་འཐོབ་བར༎

འབྲལ་མེད་རྗེས་སུ་ཟུངས་ཤིག་རྡོ་རྗེ་འཆང་༎

རང་ཤོང་སྤྱི་བོར་བསྡད་པའི་ཁ་ན་མེད༎

རང་སེམས་ནང་དུ་སྐོར་བ་གནད་ཀྱི་དོན༎

བླ་མའི་རྗེས་སུ་བཟུང་བའི་ཁ་ན་མེད༎

རང་གི་བསྟེན་ཚུལ་ལེགས་པ་གནད་ཀྱི་དོན༎

རྒྱལ་བའི་བསྟན་དང་མཇལ་བའི་ཁ་ན་མེད༎

བསྟན་རྩ་རང་ལ་ཡོད་པ་གནད་ཀྱི་དོན༎

བློ་ཁ་ཆོས་ལ་ཕྱོགས་པའི་ཁ་ན་མེད༎

ཉིན་མཚན་དགེ་ལ་འབད་པ་གནད་ཀྱི་དོན༎

དལ་འབྱོར་མི་ལུས་ཐོབ་པའི་ཁ་ན་མེད༎

དལ་བ་དོན་ཡོད་བྱེད་པ་གནད་ཀྱི་དོན༎

ད་ལྟ་ནད་མེད་བདེ་བའི་ཁ་ན་མེད༎

རང་སྡིག་རྗེས་ནས་མེད་པ་གནད་ཀྱི་དོན༎

གཞུང་ལུགས་མང་དུ་ཐོས་པའི་ཁ་ན་མེད༎

ཐོས་དོན་རྒྱུད་ལ་སྦྱོར་བ་གནད་ཀྱི་དོན༎

ཚིག་འཁྲི་ཤགས་འགྱེད་བྱང་བའི་ཁ་ན་མེད༎

དངོས་ཤུགས་དོན་ལ་རྟོན་པ་གནད་ཀྱི་དོན༎

ཀུན་འབྱུང་རབ་དབྱེ་ཤེས་པའི་ཁ་ན་མེད༎

དེ་དག་གཉེན་པོ་བསྟེན་པ་གནད་ཀྱི་དོན༎

སྡོམ་གསུམ་ཁས་ལེན་དཔའ་བའི་ཁ་ན་མེད༎

བཅས་ཁྲིམས་ཚུལ་བཞིན་སྲུང་བ་གནད་ཀྱི་དོན༎

སྐྱབས་གནས་བསླུ་མེད་བསྟེན་པའི་ཁ་ན་མེད༎

དེ་ལ་ཡིད་ཆེས་བྱེད་པ་གནད་ཀྱི་དོན༎

བདེན་བཞིའི་མཚན་ཉིད་ཤེས་པའི་ཁ་ན་མེད༎

སྡུག་བདེན་ཉེས་དམིགས་མཐོང་བ་གནད་ཀྱི་དོན༎

ཆོས་ལ་འབད་འབུངས་བྱས་པའི་ཁ་ན་མེད༎

ཚེ་འདིའི་སྣང་ཤེས་ཟློག་པ་གནད་ཀྱི་དོན༎

བདེན་སྟོང་ཁ་ཕོ་སྒྲོག་པའི་ཁ་ན་མེད༎

ལས་འབྲས་བསླུ་མེད་ཤེས་པ་གནད་ཀྱི་དོན༎

དམ་ཆོས་བདུད་རྩིར་སྤྱོད་པའི་ཁ་ན་མེད༎

སྡིག་ལ་རང་གིས་འཛེམ་པ་གནད་ཀྱི་དོན༎

འགྲོ་རྣམས་མར་གྱུར་ཟེར་བའི་ཁ་ན་མེད༎

དེ་དོན་བྱང་ཆུབ་བསྒྲུབ་པ་གནད་ཀྱི་དོན༎

ཆལ་ཆོལ་ངག་སྒྲོས་སོགས་ལ་མི་བརྩོན་པར༎

ཡབ་རྗེའི་གཞུང་བཟང་གདམས་པའི་མཆོག་ཏུ་ཟུངས༎

རྒྱལ་བསྟན་ཉི་མ་ཕྱོགས་བརྒྱར་གསལ་བའི་དུས༎

རང་མཐོངས་སྲིན་བུའི་སྣང་བར་མ་ཞེན་ཅིག།

བསླབ་བྱ་འདི་ནི་པཎྚིཏ་ཆེན་པོ་ལྷ་སྡེ་༧ཡེ་ཤེས་རྒྱ་མཚོ་དཔལ་བཟང་བོས་ཞལ་ཆེམས་ཀྱི་ཚུལ་དུ་མཛད་པའོ༎

རྩོམ་ཡིག་མཁོ་སྤྲོད་པ། གསར་འགོད་པ་བན་ཤུལ་འབྲུག་ལྷ་རྒྱལ།